Azərbaycanda COVID-19 virusunun yayılma sürətinin artması və daha çox insanın virusa yoluxması hökuməti yenidən sərt karantin qaydalarını tətbiq etməyə məcbur etdi. Nazirlər Kabinetinin qərarına əsasən, dekabrın 14-dən 2021-ci il yanvarın 18-nə kimi Bakı şəhərində və respublika əhəmiyyətli bir sıra şəhərlərdə ictimai və iqtisadi fəaliyyətə ciddi məhdudiyyətlər tətbiq olunacaq.
Məhdudlaşdırıcı tədbirlərin tətbiq olunacağı sahələr arasında iqtisadi fəaliyyətlə bağlı sahələr də var. Əvvəlki dövrlərdə tətbiq edilən sərt karantin təcrübəsi göstərdi ki, bu vəziyyət biznes dairələrinə, onların iqtisadi dövriyyəsinə, mənfəətinə ciddi neqativ təsirə malikdir. Buna görə də əksər sahədə iqtisadi fəallığın aşağı düşəcəyi proqnozlaşdırılır. Xüsusən kiçik biznesin məhdudlaşdırıcı tədbirlərdən əziyyət çəkəcəyi gözlənir. Bu səbəbdən də pandemiya dövründə iqtisadi, sosial və digər sahələrə dəstək məqsədilə 2,5 milyard dollarlıq paket təsdiq olunub. Güzəştli kreditlər üçün sahibkarlara 500 milyon manatlıq kredit portfeli təklif ediləcək.
“Yenidən sərtləşdirilən karantin dövründə iqtisadi paket çərçivəsində sahibkarlara dəstəyin artırılması gözlənir”
Millət vəkili Vüqar Bayramov qeyd etdi ki, bölgələrdə fəaliyyət göstərən sahibkarlar kreditə müraciət edərkən onlardan çox vaxt paytaxtda girov tələb olunurdu. Sahibkarlığın İnkişafı Fondu tərəfindən təklif olunan kreditlərdə bu sistem dəyişdirilib: “Məlumdur ki, pandemiya dövründə iqtisadi, sosial və digər sahələrə dəstək məqsədilə 2,5 milyard dollarlıq paket təsdiq olunub. İqtisadi paketə əsasən, Sahibkarlığın İnkişafı Fondu vasitəsilə güzəştli kreditlərin verilməsinə başlanıb. Güzəştli kreditlər üçün 500 milyon manatlıq kredit portfeli təklif olunub. Həmin kreditlər yeni mexanizmlə verilir. Belə ki, artıq elektron kredit portalı yaradılıb. Orada sahibkarlar bankları seçib kreditə müraciət etmək imkanı qazanıblar. Pandemiya dövründə və xüsusən karantin rejimində onlayn formada müraciət imkanı sayəsində banka və ya hansısa dövlət qurumuna getməyə ehtiyac qalmır. Elektron portal həm də şəffaflığı təmin edir. Atılan mühüm addımlardan biri də odur ki, 2020-ci il martın 10-dək götürülən kreditlərə dövlət tərəfindən subsidiyalar tətbiq edilib. Bu o deməkdir ki, biznes kreditlərinin 10 faizi dövlət tərəfindən ödənilir. Məsələn, sahibkar 14 faizlə kredit götürübsə, onun 10 faizini dövlət subsidiya edir. Hazırda təxminən 1 milyard manatlıq kredit portfelinə 10 faizlik subsidiya tətbiq olunur".
Həmsöhbətimiz onu da əlavə etdi ki, yenidən sərtləşdirilən karantin dövründə iqtisadi paket çərçivəsində sahibkarlara dəstəyin artırılması gözlənir: "İqtisadi paket sahibkarlara iki istiqamətdə birbaşa dəstək göstərir. Bunlardan biri fərdi və mikro sahibkarlara maliyyə yardımının həyata keçirilməsidir. Yardım çərçivəsində fərdi və mikro sahibkarlara 250 manatdan 5000 manatadək yardım göstərildi. Eyni zamanda, muzdlu əməkhaqqı müqaviləsi olan özəl sektor sahibkarları üçün də işçilərin əməkhaqlarının tam və ya qismən kompensasiyası həyata keçirilib. Sərt karantin tətbiq olunduğuna görə hazırda yenidən eyni dəstək müzakirə olunur. İqtisadi paket çərçivəsində dəstəyin artırılması və gücləndirilməsi nəzərdə tutulur. Növbəti ildə də pandemiyanın təsirlərinin qalacağı güman olunur və belə olan halda, eyni tədbirlər növbəti ildə də nəzərdə tutulacaq".
Günel CƏLİLOVA
