Son illər dövlət tərəfindən pambıqçılığa diqqətin ayrılması, texnoloji avadanlıqlardan istifadə, subsidiyalaşdırma sisteminin tətbiqi göstərir ki, bu sahəyə kifayət qədər diqqət yetirilib.
Pambıqçılığın inkişafına göstərilən diqqət sayəsində bu il Azərbaycanda pambıq yığımı başa çatmasa da, artıq fermerlər sahələrdən 320 542 ton məhsul yığaraq qəbul məntəqələrinə təhvil veriblər. Kənd Təsərrüfatı Nazirliyinin yaydığı məlumatda qeyd olunur ki, bu, ötən ilin yekun göstəricisindən 25,5 min ton (8,6 %) çoxdur. Qeyd edək ki, 2019-cu il pambıq mövsümünün yekununda ölkə üzrə 295 min ton pambıq yığılaraq məntəqələrə təhvil verilib.
Qeyd edək ki, bu günə pambıq yığımında orta məhsuldarlıq 32,09 sentner təşkil edir. Bu, Azərbaycanın pambıqçılıq tarixinin ən yüksək göstəricilərindən biridir. Hazırda sahələrdə pambıq yığımı davam edir, mövsümün yekununda həm məhsul həcmi, həm orta məhsuldarlıq göstəricilərinin daha da artacağı gözlənir. Pambıq yığımının optimal müddətdə başa çatdırılması nəzərdə tutulur.
Məlumat üçün onu da vurğulayaq ki, 2020-ci ildə Azərbaycanın 21 rayonunda 100 min hektara yaxın sahədə pambıq əkilib. İndiyədək ən yüksək orta məhsuldarlıq Salyan (40,12 sent/ha), Neftçala (38,15 sent/ha), Beyləqan (34,42 sent/ha), Yevlax (34,05 sent/ha), Ağcabədi (33,44 sent/ha), Goranboy (33,25 sent/ha), Tərtər (32,32 sent/ha), Saatlı (32,27 sent/ha), Sabirabad (31,81 sent/ha), Bərdə (31,66 sent/ha) və Ağdam (30,78 sent/ha) rayonlarında qeydə alınıb.
Qeyd edək ki, Azərbaycanda pambıqçılığın inkişafı dövlət tərəfindən dəstəklənir.
“…xaricə ilkin emal məhsulu olan mahlıc, iplik və pambıq yağı satılır”
Pambıqçılığın inkişafı haqqında danışan iqtisadçı-ekspert Kamran Məmmədli qeyd etdi ki, Azərbaycan iqtisadiyyatı bölgədə ən dayanıqlı və inkişafda olan iqtisadiyyatdır: “Pambıqçılığın inkişafının isə təkcə iqtisadi deyil, həm də sosial əhəmiyyətini vurğulamaq lazım gəlir. Kənd təsərrüfatı dövlətin dəstəyinə ehtiyacı olan bir sahədir. Dövlətin də əsas siyasətindən biri bundan ibarətdir ki, Azərbaycanda kənd təsərrüfatı üzrə pambıqçılıq inkişaf etdirilməlidir. Çünki daxili bazarda yüngül sənayenin inkişafı əsas məsələlərdəndir. Dövlət proqramı əsasında pambıqçılıqda ən yüksək nəticə əldə edilib. Onu da vurğulamaq lazım gəlir ki, İlham Əliyev Prezident seçiləndən sonra ölkədə pambıqçılığın inkişafı daim diqqətdə saxlanıb və rəqəmlərə nəzər salsaq ciddi nəticələrin əldə edildiyinin və on minlərlə yeni iş yerləri yaradıldığının şahidi olarıq”.
Həmsöhbətimiz onu da vurğuladı ki, ölkəmizdə yüngül sənayenin inkişafı bu sahə ilə bağlı olan yerli və xarici ticarəti də gücləndirəcək. Pərakəndə ticarət dövriyyəsi haqqında açıqlanan məlumatlara əsasən, pambıqdan hazırlanan geyim ləvazimatlarına xərclənən illik vəsaitin məbləği bir neçə milyard manatı ötür: “Geyim məhsullarına tələbin yüksək olması ilə əlaqədar onun ticarət şəbəkəsi də genişlənir. Hazırda minlərlə insan bu məhsulların ticarəti ilə məşğul olur. Əgər yerli tekstil sənayesi inkişaf edərsə, o halda geyim ləvazimatlarının daxili ticarəti ilə yanaşı, xarici ticarəti də böyüyəcək. Bunun nəticəsində ölkəmizin xarici valyuta gəlirləri artmaqla yanaşı, məşğulluq, o cümlədən, ticarət sahəsində fəaliyyət göstərən sahibkarlıq fəaliyyəti genişlənəcək.
Hazırda ölkəmiz pambıqçılığın ilkin inkişaf dövrünü yaşayır və xaricə ilkin emal məhsulu olan mahlıc, iplik və pambıq yağı satılır”.
Günel CƏLİLOVA
