Azərbaycan xalqı tarixinin ən yaddaqalan və şanlı dönəmlərindən birini yaşayır. Müzəffər Ali Baş Komandan, Prezident İlham Əliyevin strateji rəhbərliyilə Azərbaycan Ordusu vaxtilə nağıl kimi görünən həqiqətləri günbəgün bərqərar etdi, işğal olunmuş ərazilərdən didərgin düşmüş əhalinin uzun illərki həsrətinə son qoyuldu.
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi müzəffər Azərbaycan Ordusunun işğaldan azad etdiyi ərazilərdən olan vətəndaşların kiçik bizneslərinin qurulması üçün özünüməşğulluq proqramı çərçivəsində aktivlərlə təminatını davam etdirir. Nazirliyin yaydığı məlumatda qeyd olunur ki, Bakının bir neçə rayonunda həmin kateqoriyadan olan daha bir qrup proqram iştirakçısına biznes planlarına uyğun aktivlər verilərək, istehsal və xidmət sahələri üzrə kiçik müəssisələri yaradıldı. Proqramın mahiyyəti ondan ibarərdir ki, işğaldan azad olunmuş ərazilərin sakinləri sahibkarlıqla rahat şəkildə məşğul ola bilsinlər.
“…həmin ərazilərdə sahibkarlıqla məşğul olmaq istəyənlərə…”
İqtisadçı Kamran Məmmədli qeyd etdi ki, Azərbaycan dövləti həmişə sahibkarların yanında olub və bütün mümkün yollarla onlara dəstək verib: "Bu gün on illər boyu işğal altında qalan torpaqlarımızın işğaldan azad edilməsi uğrunda apardığımız Vətən Müharibəsi dönəmində də dövlət həmin rayonlarda və cəbhəyanı ərazilərdə qeydiyyatda olan mikro və kiçik sahibkarlıq subyektlərinə baş vermiş hadisələr nəticəsində dəymiş maddi zərərin təsirinin azaldılması, sahibkarlıq fəaliyyətinin normal bir formada davam etdirilməsi məqsədilə həmin subyektlərə kömək əlini uzadır. İşğaldan azad olunan ərazilərdə kiçik bizneslərin qurulması üçün aidiyyəti qurumlar tərəfindən bölgə sakinlərinə, o cümlədən, həmin ərazilərdə sahibkarlıqla məşğul olmaq istəyənlərə müəyyən dəstək göstərilir. Gələcəkdə bu tip dəstəklərin həcmi və miqyası böyük olacaq”.
Günel CƏLİLOVA
