Məlum olduğu kimi, Ermənistanın hərbi təxribatına cavab olaraq müzəffər Azərbaycan Ordusunun sentyabrın 27-dən başlanan uğurlu əks-hücum əməliyyatları nəticəsində 30 ilə yaxın düşmən tapdağı altında olan torpaqlarımız işğaldan azad olunub. Beynəlxalq hüququn Azərbaycanın tərəfində olması, ordumuzun hərbi-texnoloji üstünlüyü, əsgərlərimizin qəhrəmanlığı, xalqımızın Ali Baş Komandana hədsiz sevgisi, böyük döyüş ruhu və s. faktorlar ölkəmizin tezliklə ərazi bütövlüyünü tam təmin edəcəyini şərtləndirirdi.
İşğaldan azad edilən torpaqlarımızın zəngin resursları və iqtisadi potensialı isə Azərbaycanın iqtisadi gücünə güc qatacaq, ölkəmizin sosial-iqtisadi inkişafına mühüm töhfə verəcək. Məlumdur ki, uzun müddət işğalda olan torpaqlarımızda bütün infrastruktur dağıdılıb, əksər kənd və şəhər tamamilə talan edilib.
“…potensialına və xüsusiyyətinə uyğun olaraq iqtisadi fəaliyyətlər, sərmayə qoyuluşları müəyyənləşəcək”
İşğaldan azad edilən rayon və kəndlərimizdə nə kimi işlərin görüləcəyini öyrənmək üçün millət vəkili Vüqar Bayramova müraciət etdik.
O bildirdi ki, işğaldan azad olunan rayonlarımızın kənd təsərrüfatının inkişafı və bütövlükdə iqtisadiyyatının yenidən qurulması ilə bağlı ayrıca tədbirlər planı hazırlanacaq: “Məlumat üçün bildirim ki, artıq işğaldan azad edilən ərazilərin ilkin qiymətləndirilməsi ilə bağlı Prezident İlham Əliyev müvafiq göstəriş verib. Burada məqsəd bundan ibarətdir ki, həmin rayonlarda mövcud infrastruktur qiymətləndirilsin, işğal altında olduğu dövrdə dəyən zərər hesablansın və eyni zamanda, kənd təsərrüfatının inkişafı ilə bağlı istiqamətlər müəyyənləşdirilsin.
Qeyd edim ki, artıq uyğun dövlət qurumları tərəfindən işğaldan azad edilən bölgələrdə kənd təsərrüfatı ilə bağlı istiqamətlərin müəyyənləşdirilməsinə başlanıb. Bununla bağlı yerlərdə konkret tədqiqatlar, araşdırmalar aparılır”.
Həmsöhbətimiz onu da vurğuladı ki, işğaldan azad edilən bölgələrin kənd təsərrüfatı potensialı kifayət qədər böyükdür: “Sözügedən ərazilər işğaldan əvvəl kənd təsərrüfatı məhsullarına görə aparıcı olub. Məsələn, Füzuli rayonunda pambıq istehsalı, taxılçılıq, üzümçülük, Cəbrayıl rayonunda üzümçülük, digər yerlərdə isə həm əkinçilik, həm də heyvandarlıq sahələri inkişaf edib. İlkin olaraq işğaldan azad olunan ərazilərdə bərpa mərhələsi baş tutacaq. Bəzi ərazilərimizdə buna başlanıb. Kommunal xidmətlərlə təminat üzrə işlər gedir, yollar bərpa edilir və s. Bərpadan sonra isə iqtisadi inkişaf mərhələsi başlayacaq. Birmənalı olaraq deyə bilərəm ki, işğaldan azad olunan bölgələrimiz növbəti dövrdə Azərbaycanın iqtisadi inkişafının əsas lokomotivlərindən birinə çevriləcək.
Seçkiqabağı təbliğat-təşviqat kampaniyasında vəd etdiyim kimi, Füzulinin aparıcı iqtisadçıları ilə birlikdə Füzuli rayonunun sosial-iqtisadi inkişaf proqramının hazırlanmasını düşünürdük. Artıq rayonun işğaldan azad edilməsi buna imkan verir. Burada hər bir yaşayış məntəqəsinin potensialına və xüsusiyyətinə uyğun olaraq iqtisadi fəaliyyətlər, sərmayə qoyuluşları müəyyənləşəcək. Konkret iqtisadi və sosial tədbirlər planı təklif ediləcək. Bildirim ki, bununla bağlı artıq ilkin müzakirələrə başlamışıq. Böyük qələbədən sonra hər bir kəndin mövcud infrastrukturunun qiymətləndirilməsinə başlayacağıq”.
Millət vəkilinin sözlərinə görə, işğaldan azad olunan ərazilər kifayət qədər təbii ehtiyatlarla zəngin rayonlar hesab olunur: “Burada dəmir filizi daxil olmaqla, tikinti materiallarından istifadə olunacaq. Xeyli sayda material var. Təbii ki, bunlar məhz həmin bölgələrin iqtisadi baxımdan əhəmiyyətini göstərən faktorlardan biridir”.
Günel CƏLİLOVA
