Azərbaycanın reytinqləri BB+ səviyyəsində saxlanıb. Bu barədə "RAEX Europe" reytinq agentliyi məlumat verib.
Agentliyin Azərbaycanla bağlı iqtisadi reytinqində bildirilib ki, hazırda Azərbaycan Respublikası Dövlət Neft Fondunun (ARDNF) gəlirləri ölkədəki maliyyə vəziyyətini sabit saxlamağa kifayət edir. Pandemiya və hərbi qarşıdurmalara baxmayaraq, hökumətin ARDNF-də güclü maliyyə resursları mövcuddur. ARDNF-nin aktivlərinin 2020-ci ilin III rübündə əsasən valyuta dəyişikliyi ilə əlaqəli büdcədənkənar gəlirlər hesabına bərpa olunduğu vurğulanıb.
Bundan əlavə, Azərbaycan Mərkəzi Bankının (AMB) beynəlxalq ehtiyatlarının səviyyəsi də məqbul hesab edilib. Eyni zamanda, qeyd edilib ki, 2020-ci ildə Azərbaycanın bank sistemindəki göstəricilər indiyə qədər maliyyə sabitliyi baxımından ən yaxşı göstəricilər hesab edilə bilər.
Onu da qeyd edək ki, pandemiya və müharibə ölkə iqtisadiyyatında geriləməyə səbəb olmayıb. Ölkə iqtisadiyyatının reytinqi stabil səviyyədə qalıb.
“Müharibənin və virusun iqtisadiyyata təsirləri olsa da, iqtisadiyyatımıza köklü zərər vurmadı və vurmayacaq”
İqtisadçı-ekspert Turab Rzayev bildirdi ki, koronavirus pandemiyası bütün dünyada olduğu kimi, Azərbaycanda da iqtisadiyyata zərər vurub: "Virusla mübarizə apardığımız ilk günlərdə iqtisadi aktivlik aşağı düşdü, ticarət nöqtələri bağlandı, turizm sahəsi demək olar ki, dayandı. Müharibə zamanı isə iqtisadi fəal əhalinin bir hissəsi iş yerlərindən uzaqlaşır və cəbhəyə yollanır. Karantindən əlavə, komendant saatı tətbiq olunub və bununla da bağlı iqtisadi aktivlik aşağı düşüb. Hər gün axşam 9-da işlər dayanır. Bu da iqtisadi effektivliyə mənfi təsir göstərən amildir”.
Ekspertin sözlərinə görə, müharibənin və virusun iqtisadiyyata təsirləri olsa da, iqtisadiyyatımıza köklü zərər vurmadı və vurmayacaq: "Düzdür, hərbi əməliyyatlar kifayət qədər xərc tələb edir və nəzərə alsaq ki, biz ən son istehsal olunan, müasir silahlarla döyüşürük, bu avadanlıqların qiyməti də yüksəkdir. Amma düşünürəm ki, müharibə Azərbaycan iqtisadiyyatına ciddi ziyan vurmayacaq. Çünki biz illərlə buna hazırlaşıb, bu günü gözləmişik. Düzdür, bahalı silahlardan istifadə edirik, bu, iqtisadi xərcdir. Amma biz onsuz da bəzi dronları özümüz istehsal edirik və xaricdən aldığımız silahları öncədən almışdıq. Bunun üçün ölkə büdcəsindən pul xərcləmirik. Bu, kağız üzərində zərər kimi görünsə də, bizə əlavə xərc yaratmır. İşğaldan azad olunan ərazilərdə iqtisadi aktivlik yaranacaq. Azad olunan ərazilər yenidən qurulacaq. Bu ərazilərə qoyulan sərmayələr iqtisadiyyatı yenidən gücləndirəcək. Biz Dağlıq Qarabağın turizm potensialından geniş istifadə edə bilərik. Nə pandemiya, nə də müharibə iqtisadiyyatımıza köklü zərər vura biləcək. Çünki iqtisadi potensialımız bu çətinliklərin öhdəsindən gəlməyə imkan verir”.
Günel CƏLİLOVA
