Rəsul Cahangirli: “Son illər aparılan köklü islahatlar qeyri-neft sektorunun inkişafında ciddi canlanma yaradıb”
“Azərbaycan iqtisadiyyatının şaxələndirilməsi ilə bağlı gündəliyimiz var və bu proses uğurla davam edir”. Bunu Prezident İlham Əliyev Yaponiyanın “Nikkei” qəzetinə müsahibəsində bildirib.
Ölkə başçısı qeyd edib ki, iqtisadiyyatın şaxələndirilməsi ilə bağlı proqramlar uğurla icra edilir: “Baxmayaraq ki, bu il ümumdaxili məhsulumuz aşağı düşür - çox ciddi deyil, indiyə qədər geriləmə 4%-dən aşağı olub. Bəzi başqa ölkələrlə müqayisədə bu, pis nəticə deyil. Lakin qeyri-neft sənayesinə gəldikdə, bizdə artım var. Bu, onu göstərir ki, bizim şaxələndirmə proqramımız çox uğurla icra olunur. Sənaye, biznes imkanları, turizm, innovasiya sektoru və kənd təsərrüfatı, əlbəttə ki, pandemiyadan əvvəl sürətlə inkişaf edirdi”.
Prezident onu da qeyd edib ki, işğal altında olan ərazilərin azad edilməsi kənd təsərrüfatının inkişafına yeni təkan verəcək: “Biz əraziləri geri qaytarandan sonra, - bu, müxtəlif məhsullar becərmək, mal-qara saxlamaq üçün çox münbit torpaqlardır, - əlbəttə ki, bu, kənd təsərrüfatımızın inkişafına yeni təkan verəcək. Biz ərazilərin azad edilməsi ilə əlaqədar kənd təsərrüfatımızın gələcək inkişafını artıq planlaşdırmağa başlamışıq. Əlbəttə, düşünürük ki, insan kapitalına investisiyalar bizə inkişaf üçün yaxşı imkanlar yaradacaq. Çünki bir gün neft və qaz tükənəcək, baxmayaraq ki, bizim ehtiyatlarımız çox böyükdür. Biz böyük həcmdə təbii qaz ixrac etməyə yenicə başlamışıq və neft istehsalı sahəsi qarşıdakı onilliklərdə, ümumilikdə, sabit olacaq. Lakin, əlbəttə ki, qeyri-neft sektoru prioritetdir”.
Görünən odur ki, pandemiya və hərbi əməliyyatların olmasına baxmayaraq, ölkə iqtisadiyyatının şaxələndirilməsi prioritet məsələdir.
- “Müşahidələr də göstərir ki, sözügedən sahəyə qoyulan sərmayələr batmır, səmərəli nəticələr verir”
Məsələyə münasibət bildirən ekspert Rəsul Cahangirlinin sözlərinə görə, hərbi əməliyyatlar bitəndən sonra qeyri-neft sektorunun inkişafına diqqət daha da artacaq: “Prezident də qeyd etdi ki, ÜDM-də 4 faizlik azalma olsa da, bu, digər ölkələrlə müqayisədə elə də böyük rəqəm deyil. Ən başlıcası odur ki, qeyri-neft sənayesində azalma qeydə alınmayıb. Tam əksinə, bu sahədə artım müşahidə edilir. Hesab edirəm ki, bu, çox müsbət tendensiyadır. Çünki Azərbaycanda qarşıya qoyulan başlıca hədəflərdən biri qeyri-neft sektorunun inkişaf etdirilməsidir. Müşahidələr də göstərir ki, sözügedən sahəyə qoyulan sərmayələr batmır, səmərəli nəticələr verir. Belə olmasaydı, qeyri-neft sənayesində artım olmazdı. Bəzi xarici dövlətlərdə belə təsəvvür var ki, Azərbaycan yalnız neft ölkəsidir. Lakin son illər aparılan köklü islahatlar qeyri-neft sektorunun inkişafında ciddi canlanma yaradıb. Bu isə həmin sektorun perspektivli olmasını ortaya qoyur”.
Ekspertin fikrincə, işğaldan azad edilən ərazilər iqtisadiyyatın inkişafına əlavə stimul verəcək.
Vidadi ORDAHALLI
