Erməni əsarətindən çıxmış infrastruktur obyektlərimizə daxili və beynəlxalq investisiya axınları başlayır…
Oktyabrın 3-ü tariximizə bir çox yaşayış məntəqəmizin azad olunduğu gün kimi daxil oldu. “Bu gün Azərbaycan Ordusu Madagizdə Azərbaycan bayrağını qaldırdı. Madagiz bizimdir. Qarabağ Azərbaycandır!” xəbərini “Twitter” səhifəsində paylaşan Prezident, Ali Baş Komandan İlham Əliyev daha sonra isə Madagizin tarixi adının bərpa edildiyini, bundan sonra Suqovuşan adlandırılacağını bildirdi.
Üçrəngli bayrağımızın Suqovuşanda dalğalanması hər birimizdə böyük qürur hissi doğurdu, bütün torpaqlarımızın işğaldan azad ediləcəyinə inamı daha da artırdı.
Suqovuşan su anbarının işğaldan azad edilməsi ölkənin iqtisadi inkişafında mühum rol oynayacaq.
Məlumdur ki, Suqovuşandan Tərtər çayına buraxılan sudan səmərəli istifadə məqsədilə kanalların yenidən qurulması barədə tender elanı verilib. Nazirlər Kabinetinin yaydığı məlumatda qeyd olunur ki, “Su ehtiyatlarından səmərəli istifadənin təmin edilməsi ilə bağlı əlavə tədbirlər haqqında” Azərbaycan Respublikası Prezidentinin 27.07.2020-ci il tarixli, 2178 nömrəli Sərəncamı ilə təsdiq edilmiş Tədbirlər Planına əsasən, yenidən qurulması nəzərdə tutulan 22 hidroqovşaq, kollektor və suvarma kanallarının içərisindən prioritet layihə olaraq Tərtərçay hidroqovşaq suvarma sisteminə daxil olan Tərtərçay Sol Sahil və Xanarx kanallarının yenidən qurulması üçün texniki-iqtisadi əsaslandırmanın hazırlanması və layihələndirmənin həyata keçirilməsi ilə bağlı məsləhətçi layihə şirkətinin seçilməsi məqsədilə “Azmelsutəsərrüfat” ASC tərəfindən tender elanı verilib. Bu kanalların yenidən qurulması ilə Tərtər, Goranboy, Yevlax və Bərdə rayonlarının 20 min hektara yaxın əkin sahələrinin su təminatı yaxşılaşdırılacaq.
Qeyd edək ki, Suqovuşana investisiya yatırmaqda yerli və xarici şirkətlər maraqlıdırlar.
- “...bölgənin inkişafı üçün çox vacib elementdir”
İqtisadçı-ekspert Natiq Cəfərli qeyd etdi ki, Azərbaycanın Dağlıq Qarabağ ərazisinə investisiya cəlb etməsi çox önəmlidir: “Ölkəmizin daxili resurslarından əlavə, xarici investorların da iqtisadi obyektlərin tikintisinə, infrastrukturun yenilənməsinə cəlb olunması həm bölgənin inkişafı, həm legitimliyinin artırılması, həm də təhlükəsizlik üçün çox vacib elementdir. Suqovuşana sərmayə yatırmaq üçün Avropa ölkələri də, Çin də maraq göstərə bilər. Türk şirkətləri də bu əraziyə daha çox maraq göstərəcək. Onların təkliflərini müsbət dəyərləndirməyə ehtiyac var”.
Həmsöhbətimiz hesab edir ki, işğal olunmuş ərazilərdəki layihələrin birlik prinsipi əsasında işlənməsi daha məntiqlidir: “Ola bilsin ki, burada yerli şirkətlərlə xarici şirkətlər birgə iştirak etsin, çünki xarici şirkətlərin birdən-birə cəlb olunması bəzi hüquqi problemlər yaradar. Layihələrin birgəlik prinsipi əsasında işlənməsi daha məntiqlidir. Çox güman ki, yerli kapitalın iştirakı ilə tender yaradılacaq. Burada məhdudiyyət yoxdur. Yeganə məhdudiyyət işğal altında olan torpaqlarda Ermənistanla birlikdə qanunsuz iqtisadi fəaliyyət göstərən şirkətlərə qoyulmalıdır. Həmin şirkətlərin siyahısı isə Xarici İşlər Nazirliyində var”.
Günel CƏLİLOVA
