26/10/2020 02:41
728 x 90

Rusiya Azərbaycana taxıl daşınması tariflərini 50 faiz azaldır – qərarın hansı iqtisadi nəticələri ola bilər…

Natiq Cəfərli: “Logistikanın ucuzlaşması Azərbaycana gətirilən taxılın ucuzlaşması ilə müşahidə olunacaq”

img

Rusiya Azərbaycana taxıl daşınması tariflərini 50 faiz endirəcək. Bunu "Rusiya Dəmir Yolları" ASC-nin Korporativ Nəqliyyat Xidməti Mərkəzinin rəhbəri Aleksey Şilo deyib. O bildirib ki, Rusiyanın qlobal taxıl bazarındakı rəqibləri Ukraynada, Avropa İttifaqı ölkələrində, o cümlədən, Fransada bu il taxıl istehsalında azalma var. Odur ki, ixracla bağlı vəziyyət Rusiya üçün əlverişlidir.

 

Aleksey Şilo qeyd edib ki, rəhbərlik etdiyi şirkət taxıl daşınmasını artırmaq üçün müəyyən addımlar atır: "Məsələn, Xəzər və Azov-Qara dəniz hövzələri istiqamətində qısa məsafələrə (400 km-ə qədər) ixrac olunan taxıl daşımalarında 38% endirim, habelə Samur sərhəd-keçid məntəqəsindən (Rusiya-Azərbaycan sərhədi) taxıl daşınması üçün 50% endirim nəzərdə tutulur".

Xatırladaq ki, 2019/2020-ci mövsüm ilində Azərbaycan Rusiyadan 1,4 milyon ton taxıl idxal edib. Bu, qonşu ölkənin taxıl ixracının 3-4%-ni təşkil edib.

Maraqlıdır, Azərbaycana taxıl daşınması tariflərinin azalması iqtisadiyyata, un məhsullarının qiymətlərinə, xüsusilə çörəyin qiymətinə necə təsir edəcək?

  • “Çünki Rusiya əsas buğda təminatçısı olan 3 ölkədən biridir”

İqtisadçı-ekspert Natiq Cəfərli bildirib ki, tarif qiymətlərinin dəyişməsi məhsulun qiymətinin də müəyyən faizlə dəyişməsinə səbəb olur: “Tarif qiymətləri, daşınma, logistika qiymətləri ümumi qiymətlərə təsir edəcək səbətin içində təxminən 20-25 faizlik paya malikdir. Yəni ümumi qiymətin formalaşmasında logistik xərclər ortalama 20 faiz təşkil edir. O tariflərdə müəyyən azalmalar olsa, təbii ki, logistika ucuzlaşacaq. Logistikanın ucuzlaşması Azərbaycana gətirilən taxıl məhsullarının, taxılın ucuzlaşması ilə müşahidə olunacaq. Bu da çoxməhsullu istehsalçıdan, yəni Rusiya buğdasından istehsal olunmuş un, un məmulatlarının son qiymətlərinə müəyyən dərəcədə təsir göstərməlidir”.

Həmsöhbətimiz hesab edir ki, qiymətlərdə ciddi azalmaların olması ehtimalı çox aşağıdır: “Çünki 20 faizin 50 faizi güzəşt olunacaq. Yəni logistika xərclərində 50 faiz ucuzlaşma olacaq. Bunun qiymətlərə böyük təsiri yoxdur. Azərbaycana taxıl daşınması tariflərinin azalması ümumi qiymətlərdə təqribən 5 faiz civarında təsiretmə potensialına malikdir. Doğrudan da taxılın Azərbaycana daşınması tarifləri azalacaqsa, qiymətlərdə müəyyən dərəcədə pozitiv təsir gözləniləndir. Çünki Rusiya əsas buğda təminatçısı olan 3 ölkədən biridir. Ukrayna və Qazaxıstanla yanaşı, Rusiya da Azərbaycanın əsas buğda təminatçısı olan ölkələrdən biridir. Rusiyadan da kifayət qədər böyük həcmdə buğda alırıq. Yəni bu logistik qiymətlərin ucuzlaşması, təbii ki, məhsula da pozitiv təsir göstərməlidir”.

Günel CƏLİLOVA

Son xəbərlər