Natiq Cəfərli: “Torpaqlarımızın işğaldan azad olunması ilə kifayət qədər ciddi iqtisadi fürsətlər açılacaq”
Sentyabrın 27-dən başlayaraq, Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutur.
Azərbaycan Ordusu düşməni cavab atəşilə susdurur, bununla kifayətlənməyib irəli gedərək əzəli torpaqlarımızı işğaldan azad edir. Müharibə həm ordunun təchizatı baxımından, həm binaların dağıdılması, infrastrukturun itirilməsi, həm də işləyən əhalinin azalması baxımından ciddi iqtisadi xərclər yaradır.
Danılmaz faktdır ki, işğal altında olan torpaqlarımız ölkəmizin ən zəngin bölgəsidir. Torpaqlarımızın tamamilə işğaldan azad ediləcəyi təqdirdə bu ərazilər ölkəmizin iqtisadi artımına səbəb olacaq.
- “…ölkəmizin kənd təsərrüfatının bütün sahələrinin inkişafına dəstək verəcək”
İqtisadçı Natiq Cəfərli bildirdi ki, torpaqlarımızın işğaldan azad edilməsi davam edir: “İnanıram ki, işğal altında olan torpaqlarımızın hamısı düşmən tapdağından azad ediləcək. Dağlıq Qarabağ və ətraf rayonların Ermənistan silahlı qüvvələri tərəfindən işğalı iqtisadi cəhətdən bizə çox ziyan vurub. Yəni burada söhbət sadə məbləğlərdən deyil, milyardlarla dollardan gedir. Lakin bu gün torpaqlarımızın işğaldan azad edilməsi yenidən bu əraziləri bərpa edib, yeraltı və yerüstü sərvətlərindən faydalanmağımıza şərait yaradacaq. Bu gün başda Suqovuşan olmaqla, digər işğaldan azad edilən torpaqlarımız yararlı, məhsuldar torpaqlardır. Bu isə, istər-istəməz, ölkəmizin kənd təsərrüfatının bütün sahələrinin inkişafına dəstək verəcək. Eyni zamanda, bu torpaqlar həm də bolsulu ərazilərdir. Bildiyiniz kimi, Suqovuşan ərazisində iki su elektrik stansiyası və yaxınlıqda Sərsəng su anbarı yerləşir. Bu ərazilər ölkəmizin tez-tez üzləşdiyi quraqlıq probleminin də əsaslı bir həlli olacaq.
Dağlıq Qarabağ və ətraf ərazilər xüsusilə qızıl, gümüş, dəmir kimi yataqlarla zəngindir. Bu torpaqların turizm potensialı isə xüsusilə vacibdir. İşğaldan azad edilən torpaqlarımız gələcəkdə turizm sahəsinin inkişaf etməsinə, hətta pandemiya dövründə uğradığı ziyanın qatbaqat kompensasiyasına səbəb olacaq”.
İqtisadçının sözlərinə görə, Qarabağ probleminin həlli Azərbaycanın önündə ciddi iqtisadi fürsətlər də yaradacaq: “Torpaqlarımızın işğaldan azad olunması ilə kifayət qədər ciddi iqtisadi fürsətlər açılacaq, ölkəmiz xarici investorlar üçün daha cəlbedici olacaq. İşğaldan azad olunmuş ərazilərin iqtisadiyyata qazandırılması prosesində əlavə gəlir götürüləcək”.
Günel CƏLİLOVA
