28/10/2020 14:59
728 x 90

Xalis ziyanla işləyən 5 Azərbaycan bankı – bağlanma qaçılmaz ola bilər…

Əkrəm Həsənov: “Vəziyyəti pisləşən banklar barədə məlumatlar yayıldıqdan bir qədər sonra onlar bağlanırlar”

img

Azərbaycan banklarının bir neçəsinin ciddi problemlərinin olması heç kimə sirr deyil. Məlumata görə, yaxın müddət ərzində bir neçə bankla bağlı sərt addımlar atılacaq. Bu addımlardan biri bankların birləşməsini nəzərdə tutur. İlin sonunadək problemləri olan 4-5 bankın daha yaxşı vəziyyətdə olan banklara birləşdiriləcəyi gözlənir.

Xatırladaq ki, bu ilin aprelində bank sektorunun tənzimləyicisi olan Mərkəzi Bankın qərarı ilə 4 bankın lisenziyası geri alınıb. Bunlar “AtaBank”, “Amrah Bank”, “AG Bank” və “NBC Bank”dır. Bu bankların vəziyyəti ilə bağlı danışan Mərkəzi Bankın rəhbəri Elman Rüstəmov qalan bankların bəzilərində də problemlərin olduğunu bildirmişdi.

Qeyd edək ki, 31 iyul 2020-ci il tarixinədək Azərbaycandakı 26 bank 2020-ci ilin ilk 6 ayı üzrə maliyyə göstəricilərini açıqlayıb. Açıqlanan məlumatlardan aydın olur ki, 2020-ci ilin ilk 6 ayını 26 bankdan 21-i xalis mənfəətlə, 5-i isə xalis zərərlə başa vurub.

Ən çox xalis zərəri olan banklar isə “Yelo Bank” (13 milyon 583 manat), “Muğan Bank” (1 milyon 880 min manat), “Bank Avrasiya”dır (1 milyon 578 min manat). Pakistan Milli Bankının Bakı filialının zərəri 233 min manat, “Bank BTB”-ninki isə 107 min manat təşkil edib.

Maraqlıdır, hazırkı dönəmdə bankların birləşməsi bank əmanətçiləri, onlardan kredit götürən şəxslər üçün hər hansı problem yarada bilərmi?

  • “Pandemiya şəraitində əhali banklardan əmanətlərini çıxarır, kredit vermək imkanları məhdudlaşır”

Məsələ ilə bağlı fikir bildirən Əkrəm Həsənov qeyd etdi ki, vəziyyəti pisləşən banklar barədə məlumatlar yayıldıqdan bir qədər sonra onlar bağlanırlar: “Bankların vəziyyətini pisləşdirən bir neçə amil var. Bunların ən birincisi pandemiyadır. Pandemiya şəraitində əhali banklardan əmanətlərini çıxarır, kredit vermək imkanları məhdudlaşır və sair. Bu baxımdan, bankların durumunun daha da pisləşməsi gözləniləndir. Düşünmürəm ki, vəziyyəti pisləşən bankların birləşdirilməsi ilə uğurlu nəticə əldə etmək mümkün olsun. Səmərəni o zaman əldə etmək mümkündür ki, yaxşı işləyən bankla problemləri olan bank birləşdirilsin. Bu zaman problemli bankın çətinlikləri aradan qaldırılar və nəticədə hər iki tərəf səmərə əldə edər. Amma indiki şəraitdə belə birləşməni real görmürəm. Yeganə yol çətin vəziyyətdə olan bankların sahiblərinin onlara əlavə vəsait qoymaqla problemlərini həll etməsi ola bilər.

Bu il dekabrın 4-dən sonra hansısa bank bağlanarsa, qorunmayan əmanəti olan şəxslər üçün ciddi problemlər yaranar. Buna görə də vətəndaşlar bu amili nəzərə almalıdırlar. Bankların bağlanmasından ən çox zərəri hüquqi şəxslər və müəssisələr çəkirlər. Onların bank hesablarında olan vəsaitlər, demək olar ki, bütünlüklə itirilir. Dörd bankın bağlanması təcrübəsində biz bunu bir daha açıq gördük. Bu baxımdan, sahibkarları bank seçərkən son dərəcə diqqətli olmağa çağırıram”.

Günel CƏLİLOVA

Son xəbərlər