Regionların bank kreditlərinə çıxış imkanları məhdud olaraq qalmaqdadır. Mərkəzi Bankın statistikasına görə, 14 milyard 204 milyon manatlıq kredit qoyuluşunun 11 milyard 482 milyon manatı Bakının payına düşür. Bu o deməkdir ki, kredit portfelinin 80 faizdən çoxu paytaxtda təklif olunur. Deməli, banklar hər 100 manat kreditdən yalnız 20 manatını Bakıdan kənarda yaşayan vətəndaşlarımıza və sahibkarlara təqdim edirlər.
Onu da qeyd edək ki, regionlarda yaşayan insanların kredit əldə etmək problemi uzun müddətdir yaşanır. Bu problemin həll olunması istiqamətində aidiyyəti qurumlar hələ ki, hər hansı bir iş görməyiblər.
Banklar regionlarda kredit verməkdə maraqlı deyil. Onu da bildirək ki,bölgələrlə verilən kredit faizi paytaxtla müqayisədə yüksəkdir. Araşdırmalara görə, regionlar üzrə verilən kreditlərin orta faiz dərəcəsinə görə ən bahalı kreditlər Yuxarı Qarabağ iqtisadi rayonunun payına düşüb. Bu iqtisadi rayon üzrə verilən kreditlərin orta faiz dərəcəsi 24.8% təşkil edib. Hesabat dövründə ölkədə ən aşağı faizlə kreditlər Bakı şəhərində verilib. Paytaxtda orta kredit faizi 10,4% olub
“…Mərkəzi Bank tərəfindən yeni girov mexanizmi hazırlanmalıdır”
Məsələ ilə bağlı fikir bildirən millət vəkili Vüqar Bayramov qeyd etdi ki, problemin əsas səbəbi regionlarda fəaliyyət göstərən sahibkarların girov təqdim etmək imkanlarının məhdud olması və paytaxtla region arasında rəsmi əməkhaqqı məbləğində 2 dəfəyə yaxın fərqin olmasıdır: “Ümumiyyətlə, regionlarda olan banklar kredit təklif etməkdə maraqlı deyil. Bankların əksəriyyəti regionda daha çox kredit təklif etməkdə maraqlı görsənmir".
Həmsöhbətimiz hesab edir ki, vəziyyətdən çıxış yolu olaraq regionlarda fəaliyyət göstərən sahibkarların kreditlərə çıxış imkanlarının genişləndirilməsi üçün Mərkəzi Bank tərəfindən yeni girov mexanizmi hazırlanmalıdır. Eyni zamanda, bir sıra kreditlər, xüsusən də ipoteka kreditləri üçün differensial dərəcələr müəyyənləşdirilsin. Məsələn, regionlarda sosial və adi ipoteka kreditlərində daha aşağı faiz dərəcələrinin tətbiqi imkanları var. Bunlar regionlarda yaşayan vətəndaşlarımızın kreditlərə çıxış imkanlarını artıra bilər.
Günel CƏLİLOVA
