Mötəbər beynəlxalq idman tədbirlərinin təşkilatçılığı baxımından artıq xeyli təcrübə qazanmış Azərbaycan bir neçə gün sonra daha bir idman yarışına evsahibliyi edəcək.
Dörd il öncə dünyada 500 milyondan çox azarkeşi olan “Formula-1” Qran-Prisinə qapı açan Bakı artıq bu yarışların təşkilində də əhəmiyyətli təcrübəyə malikdir. Həyata keçirilən hazırlıq işləri, demək olar ki, yekunlaşmaq üzrədir. Bir neçə gün sonra dünyanın dörd bir yanında yaşayan tamaşaçıların əsas diqqəti ölkəmizdə keçiriləcək “Formula-1”Qran-Prisində olacaq.
Məlumdur ki, “Formula-1” Qran-Prisi olduqca populyar olan idman növüdür. Adıçəkilən yarışın paytaxtımızda təşkil olunması Azərbaycan üçün olduqca əhəmiyyətlidir. Bu Qran-Prinin Azərbaycanda təşkil olunması, ilk növbədə, ölkəmizin gündən-günə artan beynəlxalq nüfuzunun göstəricisidir və dövlətimizə olan böyük etimadla bağlıdır. Adıçəkilən yarışın Bakıda keçirilməsi, ilk növbədə, ölkəmizi dünyaya tanıtmaq üçün əlverişli fürsətdir. Həmçinin, adıçəkilən yarışlar Azərbaycanın iqtisadiyyatına xeyir verəcək bir amildir. Çünki “Formula-1” Qran-Prisinə baxmaq üçün ölkəmizə xaricdən çoxlu sayda qonaq gəlir. Yarışlar ölkəmizin mədəniyyətini dünyaya təqdim etmək baxımından da əhəmiyyətlidir. Bununla yanaşı, Azərbaycan iqtisadiyyatının mühüm sahəsi olan turizmin inkişafına da mühüm töhfə verəcək.
Onu da bildirək ki, “Formula-1” Qran-Prisi bir tərəfdən əyləncəli tədbirdir, digər tərəfdən isə keçirildiyi ölkənin dünyada təbliğində böyük rol oynayır. Yarışlar ərəfəsində internet resurslarında “Formula-1” Qran-Prisi keçirilən ölkə ilə bağlı axtarışların sayı milyonları keçir. Həmçinin, bu yarışların respublikamızda keçirilməsi dünyanın həm Azərbaycanın tarixi, həm də mədəniyyəti ilə tanış olmasına, Dağlıq Qarabağ münaqişəsi haqqında həqiqətləri daha dərindən başa düşməsinə imkan yaradır. Bundan əlavə, ölkəmizin sivil, inkişaf edən bir ölkə olması qənaətinə gəlməsindən xəbər verir. Təşkilatçılar da Azərbaycanın yarışların təşkilinə diqqətindən çox razılıq edirlər. Son iki ilin təcrübəsi nəzərə alınaraq, bu il yarışa hazırlıq işləri daha qısa zamanda və yüksək səviyyədə ortaya qoyuldu. Heç şübhəsiz ki, bu həftəsonu başlayacaq yarışlar bütün dünya tərəfindən böyük maraqla izlənəcək.
O da bəllidir ki, “Formula-1” fanatlarının sayı 500 milyon adamdan çoxdur. Bu yarış məşhurluğuna görə dünyanın futbol çempionatları və olimpiya oyunları ilə rəqabət aparır. Bundan başqa, “F-1” digər beynəlxalq yarışlarla müqayisədə ən çox auditoriya toplayır. Çempionat birbaşa efirdə yayımlanır və beş qitənin 200 ölkəsini əhatə edir. Təkcə 2018-ci ildə Azərbaycanda keçirilən “Formula-1” Qran Prisini 82,3 milyon insan izləyib, bu da, öz növbəsində, böyük sayda insanın Bakı haqqında məlumat alması deməkdir, onların xeyli hissəsi bizim şəhəri görmək fikrinə düşüb.
Açıqlanan statistik rəqəmlərdə qeyd olunur ki, adıçəkilən yarışı izləmək üçün 2016-cı ildə Bakıya dünyanın 42, 2017-ci ildə 65, 2018-ci ildə isə 78 ölkəsindən qonaqlar gəlib. Bu il keçiriləcək yarışlarda yarışmanı izləmək üçün ölkəyə gələcək qonaqların sayının daha çox olacağı proqnozlaşdırılır.
“Formula-1” yarışlarının Azərbaycanda keçirilməsinin bir çox sahələrə müsbət təsiri var. İlk olaraq iqtisadiyyada verdiyi fayda haqqında məlumat verək. Paytaxtda baş tutmuş “Formula-1” yarışlarının iqtisadiyyata göstərdiyi təsirlərə dair araşdırma aparılıb. Araşdırmanın nəticələrinə dair hazırlanmış hesabatda qeyd olunur ki, 2016 və 2017-ci il Qran-Prilərindən ölkəmizə gələn ümumi gəlirlərin məbləği 277 milyon dollar təşkil edib. Yarışların iki ilinə yatırılan 100 milyon dollar iki dəfədən çox qazanc verib. Nəzərə almaq lazımdır ki, əsas xərcləri - müvafiq avadanlıqlar alınması, bu və ya digər infrastruktur qurğuların quraşdırılması yarışın ilk ili həyata keçirilir, sonrakı illər xərclər get-gedə azalır.
“Formula-1” idman yarışının ölkəmizdə keçirilməsi əsasən turizm sektorunun inkişaf etməsinə səbəb olur. Məlumdur ki, adıçəkilən yarış 2023-cu ilə qədər ölkəmizdə keçiriləcək. O üzdən, “Formula-1” Azərbaycan Qran-Prisinin keçirilməsi sayəsində 2023-cü ilədək ölkəyə turist axınının 4 milyon nəfərə qədər artacağı gözlənir.
Ötən illər ərzində keçirilən “Formula-1” yarışlarında Bakıya gələn turistlərin sayı sürətlə artıb. Yarışlardan sonra Bakı otellərindən verilən bilgilərə görə, bütün otellərin otaqları, demək olar ki, tam sifariş olunmuşdu. Orta hesabla bir turistin 3 gün ərzində bütün xərci 1000 dollar ətrafında qiymətləndirilir. Bu isə əlavə olaraq 10 milyon dollar ölkəyə gəlirin gəlməsi deməkdir.
Onu da bildirək ki, Bakıda keçirilən “Formula-1” yarışı haqqında dünyanın tanınmış media orqanlarında silsilə materiallar yayımlandı. Hətta 2018-ci ildə Bakıda baş tutmuş “Formula-1” yarışı İngiltərənin məşhur “The Times” və “The Guardian” nəşrləri kimi dünyanın aparıcı kütləvi informasiya vasitələri tərəfindən “2018-ci ilin ən yaxşı yarışı” adlandırılıb.
Statistik rəqəmlərdə o da qeyd olunur ki, televiziya auditoriyasında da builki Azərbaycan Qran-Prisi bir çox yarışdan üstün olub. Azərbaycan Qran-Prisini dünya üzrə bütün həftəsonu yarışları daxil olmaqla 83 milyon insan izləyib.
Dövlət başçısı İlham Əliyev də “Formula-1” yarışının əhəmiyyəti barədə danışıb. O qeyd edib ki, biz gözəl iqlimimizi, gözəl mətbəximizi, tarixi abidələrimizi, 9 iqlim qurşağını əlavə etsək, bir daha görərik ki, biz, doğrudan da, xoşbəxt insanlarıq, belə gözəl ölkədə yaşayırıq və belə gözəl ölkəni daha da gözəlləşdiririk: “Ona görə “Formula-1” yarışının əhəmiyyəti bundan sonra da illərlə özünü göstərəcək. Turizmdən gələn gəlir ölkə iqtisadiyyatını gücləndirir, yeni iş yerlərinin açılmasına xidmət göstərir və iqtisadi şaxələndirməni təmin edir”.
Rüfət Quliyev: “… ölkəmizin etibarlı tərəfdaş kimi tanınması ölkəyə investisiyaların axması, əməkdaşlığa açıq olması və yeni texnologiyaların gəlməsinə səbəb olur”
“Formula-1” Qran-Prisinin ölkəmizdə keçirilməsinin sosial-iqtisadi əhəmiyyəti barədə “Bakı-Xəbər”ə məlumat verən millət vəkili Rüfət Quliyev qeyd etdi ki, belə tədbirlərin keçirilməsi Azərbaycana həm iqtisadi, həm də strateji baxımdan böyük fayda gətirir. Etibarlı tərəfdaş kimi tanınması ölkəyə investisiyaların axmasına, əməkdaşlığa açıq olması ölkəyə yeni texnologiyaların gəlməsinə səbəb olur. Bunlarla bərabər, bu tədbirlər Azərbaycan həqiqətlərinin, Azərbaycanın ədalətli mövqeyinin dünyaya yayılmasına böyük təkan verir.
Millət vəkilinin sözlərinə görə, “Formula-1” Qran-Prisi də bütün dünyada çox geniş tamaşaçı auditoriyasına malikdir. Bu yarışı bütün qitələrdə təxminən 500 milyon tamaşaçı izləyir. “Formula-1” Qran-Prisinin Azərbaycanda keçirilməsi ölkəmizin təbliği, turist cəlbediciliyinin artırılması üçün böyük əhəmiyyət daşıyır: “Burada, heç şübhəsiz ki, 6 kilometr uzunluğa malik Bakı trekinin özünəməxsus cəhətlərini də xüsusi vurğulamaq lazımdır. Yarış treki şəhərin ən görməli yerlərindən keçir. Trek Bakının müasirliyini və qədimliyini, həmçinin, Xəzərin əsrarəngiz gözəlliyini təqdim etmək üçün əla imkanlar açır. Bakı şəhər halqası elə qurulub ki, yarış zamanı pilotlar və milyonlarla televiziya tamaşaçısı UNESCO-nun Ümumdünya mədəni irs siyahısına daxil olan İçərişəhəri, Qız qalasını, paytaxtın müasir memarlıq abidələrini və Xəzərin sahilboyu hissəsini özündə birləşdirən ecazkar mənzərəni görə bilirlər. Ümumiyyətlə, bəri başdan yarışların bütün trek boyunca çox maraqlı keçəcəyini söyləmək mümkündür”.
Günel CƏLİLOVA
