"Neftçi" adının danışılmış oyunlarda hallanmasına sərt reaksiya verdi
"Keşlə" danışılmış oyunlarda şübhəli bilinən futbolçularla bağlı açıqlama yayıb. Goal.az klub saytına istinadən xəbər verir ki, əsas komandanın futbolçuları - Nizami Hacıyev və Mirhüseyn Seyidov Topaz Premyer Liqası çərçivəsində keçirilmiş son 5-6 oyununda danışılmış oyunlarda iştirak etdiklərinə dair şübhələrin olmasına görə 4 gün öncə onlarla imzalanmış müqaviləyə rəsmən xitam verilib.
“Baş verənləri mən də eşitmişəm. Nə deyəcəyimi bilmirəm. Belə şeylər haqda danışmaq çox çətindir”. Bu sözləri isə “Apasport”a açıqlamasında “Keşlə” klubunun futbolçusu Adrian Skarlatake deyib. Premyer Liqanın 13-cü turu çərçivəsində baş tutan “Neftçi” – “Keşlə” (3:1) oyununda qonaqların 2 futbolçusu Nizami Hacıyev və Mirhüseyn Seyidov bilərəkdən zəif çıxış etməkdə ittiham olunurlar. “Keşlə”dən uzaqlaşdırılan həmin futbolçuların oyunu satdıqları üçün müvafiq orqanlar tərəfindən saxlanıldığı və hazırda dəmir barmaqlıqlar arxasında olduqları bildirilir. Məsələ haqda danışan Skarlakate “Neftçi” ilə qarşılaşmada qəribəlik hiss etdiyini təsdiqləyib: “Kimlərinsə “Neftçi” və ya digər matçlarda bilərəkdən oynamadığını bilmirəm. Amma konkret olaraq, “Neftçi” ilə görüşdə qəribəlik hiss olunurdu. Əmin olmadığım üçün nəsə demək istəmirəm”.
Rumıniyalı müdafiəçi “Neftçi” ilə oyundan sonra keçirilən mətbuat konfransında “Keşlə”nin baş məşqçisi Ramiz Məmmədovun səsləndirdiyi fikirlərə də toxunub. Təcrübəli futbolçu komandanın çalışdırıcısının paltardəyişmə otağında onlara heç nə demədiyini vurğulayıb: “Bəli, baş məşqçi həmin oyundan sonra mətbuat konfransında bu haqda danışmışdı. Paltardəyişmə otağında isə heç nə demədi. Lakin çox əsəbi idi. Məsələ ilə bağlı baş məşqçi daha çox məlumata sahibdir, onun danışması düzgün olar. Çünki ətraflı fikir səsləndirə bilər. Nələrin baş verdiyini, kimlərin oyun satdığını baş məşqçi bilir”.
“Kimsə sizə oyun satmaq təklifi edibmi” sualına Skarlatakenin cavabı belə olub: “Xeyr. Mənə heç kim elə təklif etməyib. Bəlkə də, qorxduqları üçün mənə heç nə deməyiblər. Çünki xarakterimi bilirlər. Həyatımda heç vaxt belə şey etməmişəm. Oyun satmaq məsələsini kimin təşkil etdiyini, həqiqətən, bilmirəm”.
"Neftçi" Azərbaycan futbolunda çirkin oyunlarla məşğul olan hər kəsin layiqli cəzasını almasının tərəfdarıdır. Bu barədə isə "Neftçi" PFK-nın yaydığı bəyanatda deyilir.
Bəyanatda qeyd olunur ki, son günlər klubun ictimai nüfuzuna xələl gətirən və heç bir həqiqətə uyğun olmayan məlumatlar yayılır: "Komandamızın oyununun və nəticələrinin yaxşılaşdığı bir vaxtda bu cür qərəzli xəbərlərlə "Neftçi"nin gündəmə gətirilməsi bizi növbəti dəfə mövqeyimizi ortaya qoymaga məcbur etdi. "Neftçi" həm klub daxilində, həm də azarkeşlərlə münasibətlərdə son illərin ən yaxşı dövrünü yaşayır - əsl komanda olaraq birləşib, bütövləşib, vahid məqsəd uğrunda mübarizə aparır. İstər klub rəhbərliyi və baş məşqçi, istərsə də futbolçular arasında birlik yaranıb. Belə bir məqamda klubdaxili atmosferi pozmağa və "Neftçi”nin adının ləkələnməsinə yönələn bu xəbərləri qətiyyətlə pisləyirik.
"Neftçi" PFK rəsmən bəyan edir ki, futbolumuzda çirkin oyunlarla məşğul olan hər bir kəsin layiqli cəzasını almasının tərəfdarıdır və bu yöndə hüquq-mühafizə orqanlarının apardıgı işləri dəstəkləyirik. Bildiririk ki, "Neftçi"nin adını çirkin oyunlarda hallandıranlara qarşı ölkə qanunvericiliyinə uyğun şəkildə hərəkət ediləcək".
