Təranə Xudabaxşiyeva: "Qızların, qadınların idmanla məşğul olması onların həyatda möhkəm addımlarla irəli getməsi, erkən yaşdan özünə inamın qazanılması..."
"Qızlarımızın idmanla məşğul olmasına əsas əngəllərdən biri cəmiyyətdə olan stereotiplərdir. Bədən tərbiyəsi və idmanla məşğul olmaq, cinsindən asılı olmayaraq, hər bir fərdin hüququdur". Bunu Ailə, Qadın və Uşaq Problemləri üzrə Dövlət Komitəsinin sədri Hicran Hüseynova IV İslam Həmrəyliyi Oyunlarına həsr olunmuş "Qızların fiziki sağlamlığı: Gələcək nəsillərin inkişafı" adlı konfransda çıxışı zamanı deyib.
Dövlət Komitəsinin sədri qeyd edib ki, Azərbaycanda hər iki cinsin nümayəndələri arasında idmana maraq böyükdür:
"Bəzən deyirlər ki, idman qadınlar üçün deyil. Ancaq tarixə baxanda görürük ki, qədim dövrlərdə qadınlarımız kişilərlə birgə at çapıb. Qadınlarımız kişilərin ardınca boks, futbol, ağır atletikada iştirak etməyə başladılar. Sağlam qadın sağlam nəsil deməkdir".
Bu gün, bəylərlə yanaşı, zərif cinsin nümayəndələri olan xanımlar da idman yarışlarında iştirak edir, uğurlar qazanır, Azərbaycan bayrağını zirvələrə qaldırır.
Qadın idmançılarımız müxtəlif idman növləri ilə məşğul olur. Ancaq bəzən elə hal olur ki, ailələrdə qızlara idmanla məşğul olmağa icazə vermirlər. Beləliklə, o xanımlar öz gücünü, bacarığını nümayiş etdirə bilmir.
Taekvondo üzrə milli hakim Təranə Xudabaxşiyeva bizimlə söhbətində bildirdi ki, idmanla tək bəylər deyil, eyni zamanda, xanımlar da məşğul olmalıdır: "Bəllidir ki, ölkəmizdə idmana maraq əvvəllər olduğundan daha yüksəkdir və bu baxımdan az uğur qazanmamışıq. Diqqət etsək görərik ki, dünya çempionlarımızın əksəriyyəti ali təhsil sahibləridir. Demək, idmanla yanaşı, təhsili də yüksək səviyyədə davam etdirmək mümkündür. Şükürlər olsun ki, ölkəmiz müstəqillik əldə etdikdən sonra idmana maraq xüsusilə artıb və bu baxımdan nailiyyətlərimiz günü-gündən çoxalır. Sevindirici haldır ki, qızların da idmana marağı ildən-ilə artır. Qız övladlarını belə ürəkli, qüvvətli yetişdirən valideynlərə xüsusi təşəkkür düşür. Çünki ölkəmizin igid döyüşçülərə ehtiyacı olduğu qədər də, cəsur, ürəkli xanımlara ehtiyacı var. Bu kimi göstəricilər 90-cı illərlə müqayisədə, toplum olaraq, düşüncə tərzimizin müasir şəkildə formalaşmasına işarədir. Məsələn, on, on beş il bundan öncə mənim atama desəydilər ki, qızın Təranə idmançı olacaq, hər halda, bunun böyük bir zarafat olduğunu düşünərdi. Qızların, qadınların idmanla məşğul olması onların həyatda möhkəm addımlarla irəli getməsi, erkən yaşdan özünə inamın qazanılması və fiziki düsturlarının formalaşması deməkdir".
Həmsöhbətimizin sözlərinə görə, əksər hallarda, valideynlər qızlarını gimnastikaya qoyur: "Ancaq o valideynlər, gimnastika ilə yanaşı, qızlarının hansı idman növünə marağı olduğunu öyrənməlidir. Ola bilsin ki, onların taekvondo, güləşi və ya digər idman növlərinə marağı olar. Bəzən elə hal olur ki, valideyn məcburi şəkildə qızını texniki sahəyə yönəldir. Ancaq, əslində, o qızın idmanla məşğul olmağa meyli var. Valideyn qızın istəyinə qarşı çıxmasa, o, hansısa idman yarışında müxtəlif dərəcəli qalibiyyət əldə edə bilər. Bu üzdən, valideyn övladlarının tək peşə seçiminə deyil, həmçinin, hansısa idman növü üzrə məşğul olmasına da mane olmamalıdır".
Günel CƏLİLOVA
