FİFA prezidenti Canni İnfantino dünya futbolunun ən böyük kommersiya aktivləri olan Kişilər və Qadınlar arasında Dünya kuboklarının və Klublararası Dünya Kubokunun kommersiya hüquqlarını özəl investorlara ötürməyə hazırlaşır. The Times qəzetinin əldə etdiyi məlumata görə, FİFA turnirləri idarə etmək üçün yeni bir şirkət yaratmağı və bu strukturdakı azlıq paylarını milyardlarla dollara kapital qruplarına satmağı planlaşdırır. Bu fonda Donald Tramp administrasiyasına yaxın şəxslərlə gaparılan izli danışıqlar futbol dünyasında "nüvə bombası" effekti yaradıb.
Maliyyə məsləhətçiliyi JP Morgan tərəfindən təmin edilən gizli layihənin əsas fiqurları arasında ABŞ prezidenti Donald Trampın kürəkəni Cared Kuşnerin qardaşı Coşua Kuşner də var. Kuşnerin “Thrive Capital” şirkətinin rəhbərlik edəcəyi gözlənilən konsorsium yeni şirkətdə 20-30 faiz pay əldə etməyi hədəfləyir.
Plan çərçivəsində FİFA-nın üzvü olan 211 milli federasiyaya da təxminən 20 milyon dollar dəyərində səhmlərin paylanması nəzərdə tutulur. Sənaye mənbələri bildiriblər ki, səhmlərin paylanması FİFA Konqresində plana qarşı müxalifəti azaltmaq və təsdiq prosesini asanlaşdırmaq məqsədi daşıyır.
Layihənin ən çox müzakirə olunan aspekti Canni İnfantinonun şəxsi gələcəyidir. Layihəyə əsasən, İnfantino 2031-ci ildə FİFA prezidenti kimi sonuncu müddəti başa çatdıqdan sonra yaradılacaq yeni şirkətin baş meneceri və ya "komissarı" təyin ediləcək.
Həmçinin iddia edilir ki, İnfantinonun bu yeni vəzifədə Amerika Futbol Liqası (NFL) komissarı Rocer Qudelin qazandığı məbləğlə - yəni ildə təxminən 64 milyon dollar qazana biləcəyi bildirilir. Bu rəqəm İnfantinonun hazırkı FIFA gəliri və bonuslarının təxminən on qatıdır. FIFA isə bu iddiaların müzakirə mövzusu olmadığını, təşkilatın şirkətdəki əksər payı və nəzarəti həmişə əlində saxlayacağını bildirib.
Gizli planın sızmasından sonra Avropa Futbol Assosiasiyaları Birliyi (UEFA) yazılı açıqlama yayaraq, bu prosesi heç vaxt qəbul etməyəcəklərini bildirib: "Bu plan futbolun idarəetmə orqanlarının heç vaxt keçməməli olduğu bir sərhədi keçir. Futbolun ruhu və idarəçiliyi ticarətə alət ediləcək aktivlər deyil. Kimin maliyyə qazanc əldə edəcəyi barədə sıfır şəffaflıq varkən futbolu satmaq FİFA-nın işi ola bilməz".
Özəl investorların sistemə daxil olması ilə kommersiya mənfəətini artırmaq üçün Dünya Kuboku formatında köklü dəyişikliklərin edilə biləcəyi ilə bağlı da narahatlıqlar var. Turnirdəki komandaların sayını 64-ə çatdırmaq və ya tədbiri hər dörd ildən bir deyil, iki ildən bir keçirmək kimi variantların müzakirə olunduğu bildirilir.
Həmçinin, kapital qruplarının kommersiya potensialını maksimum dərəcədə artırmaq məqsədilə turnirləri Körfəz ölkələrinə köçürmək üçün təzyiq göstərə biləcəyi və bunun da Avropa liqalarının cədvəllərinə və oyunçuların sağlamlığına ciddi təhlükə yarada biləcəyi irəli sürülüb.
Tahir TAĞIYEV
