“Prezident İlham Əliyev həqiqətən də bütün dünyada yaxşı tanınan və yaxşı qəbul edilən dövlət başçısıdır”
Məlum olduğu kimi, Rusiya Jurnalistlər İttifaqının sədri Vladimir Solovyov Azərbaycana səfəri zamanı Prezident İlham Əliyevlə görüşünün təəssüratları barədə danışıb. Belə ki, Solovyov Prezident İlham Əliyevin Rusiya və Azərbaycan mətbuatında baş verənlərdən çox ətraflı məlumatlı olduğunu söyləyib.
O, Prezident İlham Əliyevin söhbət zamanı dünyanın müxtəlif ölkələrindən, o cümlədən Rusiyadan bir çox jurnalistlərin soyadlarını çəkdiyini bildirib: “Hiss edirdim ki, Prezident gün ərzində mətbuatı şəxsən izləyir. İş burasındadır ki, Prezident İlham Əliyev Qərb mediasını ingilis, bizimkini rus, Türkiyə mətbuatını isə türk dilində izləyir. Məhz dil bilikləri sayəsində dövlət başçısının bu cür materialları izləməklə problemi olmur”.
Solovyov onu da əlavə edib ki, Azərbaycan və Rusiya prezidentlərinin xarakterində bir çox oxşar cəhətlər var. Onlar inanılmaz siyasi üfüqə sahibdirlər. Çətin ki, digər prezidentlər onlarla müqayisə olunsun.
Solovyovun açıqlamasından belə aydın olur ki, ölkə Prezidenti həm də medianın vəziyyətini bilir. Ümumilikdə, yüksək intellektə malik olan Prezident İlham Əliyevin yerli və dünya mətbuatını mütəmadi izləməsi çox böyük göstəricidir. Bütün bu deyilənlərin fonunda, Prezidentin mətbuatı fasiləsiz izləməsi media üçün, ölkənin idarəçiliyi üçün nə deməkdir?
Məsələyə münasibət bildirən media eksperti Azər Həsrətin sözlərinə görə, bu həm media, həm də ölkənin idarəçiliyi üçün yaxşı göstəricidir: “Vladimir Solovyovla Mətbuat Şurasında görüşümüz olmuşdu. O hətta Prezident İlham Əliyevlə görüşməzdən əvvəl onun haqqında çox yüksək fikirlər səsləndirmişdi. Təbii ki, biz buna təəccüblənmirdik. Çünki cənab Prezident İlham Əliyev həqiqətən də bütün dünyada yaxşı tanınan və yaxşı qəbul edilən dövlət başçısıdır. Prezident İlham Əliyevin müxtəlif dillərdə dünya mətbuatını izləməsi çox böyük göstəricidir. Biz mətbuat nümayəndələri olaraq bu və ya digər şəkildə onunla təmaslarımız olub. Bu zaman həmişə bir şeyi sezmişik. O da ondan ibarətdir ki, ölkə başçısı hətta bizi təəccübləndirəcək qədər mediadan xəbərdar olduğunu nümayiş etdirib. İstər Azərbaycan mediasından, istərsə də dünya mediasından. Biz işimizlə əlaqədar dünyanın hər yerində Azərbaycanla bağlı yayılan xəbərləri izləyirik. Yaxud bu və ya digər şəkildə tədbirlərdə iştirak edirik, müxtəlif təmaslarımız olur. Ancaq ölkə başçısı bizi təəccübləndirəcək qədər media haqqında məlumatlı olduğunu hər dəfə bizə nümayiş etdirib. Bu da təsadüfi deyil. Ona görə ki, onun özü şəxsən medianı izləyir. O üzdən, bu qədər məlumatlıdır. Bir dəfə Mətbuat Şurasının İdarə Heyətinin üzvlərini qəbul edəndə cənab Prezident çox maraqlı bir fikir səsləndirmişdi ki, “siz jurnalistlər cəmiyyətdə olan neqativ məsələlər haqqında həmişə yazmağa davam edin, tənqid edin. Çünki bəzən məmurlar mənə yetərincə məlumat vermirlər. Ən doğru informasiyaları sizdən alıram”. Bu fikirlər bir daha təsdiq etdi ki, cənab Prezident şəxsən özü mətbuatı yaxından izləyir. Əlbəttə ki, Azərbaycan jurnalisti, vətəndaşı olaraq buna sevinirəm. Sevinirəm ki, ölkə başçısı bəzi informasiyaları birbaşa mətbuatdan alır. Yaxşı haldır ki, bir sıra aparıcı dillərdə medianı izləyir. Bu, medianın, ölkə idarəçiliyinin inkişafı üçün çox yaxşı göstəricidir. O üzdən, bunu təqdir edirəm”.
Vidadi ORDAHALLI
