“Həm cümhuriyyətin, həm də parlamentin yüz illiyinin qeyd olunması ilə bağlı işlərə start verilib". APA-nın məlumatına görə, bunu Milli Məclisin sədri Oqtay Əsədov deputat Fazil Mustafanın çıxışına cavab olaraq deyib.
F.Mustafa Azərbaycan Prezidentinin Xalq Cumhuriyyətinin 100 illiyinin qeyd olunması barədə sərəncamını xatırladaraq bildirib ki, cumhuriyyətin yaradıcı Məhəmməd Əmin Rəsulzadənin və cumhuriyyətin ayaqda qalmasına dəstək olan Nuri Paşanın xatirələrinin əbədiləşdirilməsi üçün addımlar atılmalıdır. O deyib ki, Nuri paşanın abidəsinin qoyulması ilə əlaqədar həmkarı Qüdrət Həsənquliyevlə birlikdə Nazirlər Kabinetinə müraciət etsə də, cavab yoxdur.
Sədr Oqtay Əsədov isə cavab olaraq bəyan edib ki, Milli Məclis prezidentin sərəncamından dərhal sonra lazımi işlərə başlayıb: “Həm cumhuriyyətin, həm də parlamentin yüz illiyi ilə bağlı işlərə start verilib. İşlər gedir. Yaxın zamanda nəticəsini görəcəksiniz”.
Milli Məclisin iclasında spiker Oqtay Əsədov bəzi deputatlara intizamsızlıqla bağlı irad tutub. Belə ki, iclasın gündəliyinə səsvermə zamanı deputatların səsvermədən yayınması spikerin narazılığına səbəb olub: “Bir az sakit olun! Burda iclas gedir, siz orada ikinci iclas açmısınız. Diqqətiniz burada olsun”.
Azay Quliyev bir qrup beynəlxalq QHT-dən şikayətləndi…
Azərbaycanla Avropa İttifaqı (Aİ) arasında keçirilməsi planlaşdırılan 5-ci “Şərq Tərəfdaşlığı” sammiti ərəfəsində bir sıra beynəlxalq qeyri-hökumət təşkilatları Azərbaycana qarşı hücuma başlayıb. “Trend”in məlumatına görə, bunu Milli Məclisin deputatı, ATƏT PA-nın vitse-prezidenti Azay Quliyev parlamentin bu gün keçirilən plenar iclasında deyib.
A.Quliyev bildirib ki, bir qrup beynəlxalq QHT Azərbaycana qarşı yenidən fəallaşıb.
Deputat bildirib ki, həmin QHT-lər Azərbaycanla Aİ arasında gedən proseslərə zərbə vurmağa çalışır: “Hər dəfə Azərbaycanla Avropa İttifaqı arasında mühüm proseslər baş verəndə QHT-lərin həmin şəbəkəsi fəallıq göstərir. Onların siyahısına nəzər salsaq görərik ki, bəlli təşkilatlardır və hansısa qüvvələr tərəfindən yönəldilirlər. Bu təşkilatlar arasında “PİN” adlı bir təşkilat var ki, Ermənistan-Azərbaycan Dağlıq Qarabağ münaqişəsinin fəal dövründə Azərbaycan əsirlərinin daxili orqanlarını satmaqla məşğul idi. Azərbaycanla Avropa İttifaqının arasını vurmaq istəyən belə QHT-lər bu həssas məqdamda da Azərbaycana qarşı kampaniyanı davam etdirir”.
A.Quliyev ümid etdiyini bildirib ki, belə QHT-lərin fəaliyyətinə baxmayaraq, Azərbaycanla Aİ arasında münasibətlər dərinləşəcək: “Ümid edirəm ki, münasibətlər daha da dərinləşəcək və biz qarşıya qoyulan məqsədlərə nail olacağıq”.
Son vaxtlar Avropanın bir sıra strukturları Azərbaycana qarşı qərəzli hücuma keçib
Son vaxtlar Avropanın bir sıra strukturları Azərbaycana qarşı qərəzli hücuma keçib. Milli Məclisin deputatı Məlahət İbrahimqızı parlamentin plenar iclasında deyib ki, Avropa Parlamentinin son hesabatında Azərbaycanın işğal olunmuş torpaqları ilə bağlı fəsillərdə ölkəmizə qarşı qərəzli məsələlər öz əksini tapıb: “Hansı ki, Azərbaycanın işğal olunmuş torpaqları, 1 milyondan çox qaçqın və məcburi köçkünü, eləcə də Ermənistan Silahlı Qüvvələrinin işğal olunmuş torpaqlardan qeyd şərtsiz çıxarılması ilə bağlı qətnamələr var. Belə olan halda nə baş verdi? Ayın 15-də qəbul olunan sənədlər bir daha göstərdi ki, Avropa Parlamenti müstəqil təşkilat deyil və Azərbaycana qarşı olan qüvvələr orada öz mövqeyini gizlədə bilmirlər. Bu ölkəmizə qəzərli mövqenin nümayişidir”.
Deputat çıxışı zamanı Milli Məclisin sədrindən Avronest PA nümayəndə heyəti adından Avropa Parlamentinə müraciət hazırlanmasını xahiş edib.
Qeyd edək ki, noyabrın 15-də Avropa Parlamentində Ermənistan-Azərbaycan Dağlıq Qarabağ münaqişəsi ilə bağlı qətnamə qəbul edilib. Qətnamədə erməni lobbisinin təkidi ilə Dağlıq Qarabağın öz müqəddəratını təyin etməsi məsələsi əksini tapıb.
Zeynəb Xanlarova Rasim Balayevin səhhətindən danışdı…
Milli Məclisin deputatı, xalq artisti Zeynəb Xanlarova parlamentin iclasında xalq artisti Rasim Balayevin səhhəti ilə bağlı müraciət edib. Z.Xanlarova R.Balayevin səhhətinin, vəziyyətinin yaxşı olmadığını bildirib.
Millət vəkili məsələ ilə bağlı Səhiyyə və Mədəniyyət nazirliklərindən dəstək vermələrini xahiş edib: "Rasim Balayev bütün ömrünü sənətə həsr edib. Bu məsələyə bir əncam çəkmək lazımdır. Mən millətin adından xahiş edirəm ki, müvafiq qurumlar bu işlə məşğul olsunlar".
Z.Xanlarovanın çıxışına cavab olaraq Milli Məclisin spiker Oqtay Əsədov bildirib ki, məsələ diqqətdə saxlanacaq.
Azərbaycanda "Rəşadət” ordeni təsis edilib
Milli Məclisin iclasında Azərbaycan silahlı qüvvələri üçün yeni “Rəşadət” ordeni təsis edilməsi ilə bağlı layihə müzakirə olunub. APA-nın məlumatına görə, layihə Prezident İlham Əliyev tərəfindən Milli Məclisə təqdim olunub.
Layihəyə görə, “Rəşadət” ordeni Azərbaycan Respublikası Silahlı Qüvvələrində hərbi qulluqçulara aşağıdakı xidmətlərinə görə təqdim olunacaq:
- Əhəmiyyətli və ya strateji ərazinin, yaşayış məntəqəsinin, rayonun və ya şəhərin düşmən işğalından azad olunması ilə nəticələnmiş döyüş əməliyyatları zamanı hərbi hissə və birləşmələrə yüksək peşəkarlıqla rəhbərlik etdiklərinə görə;
- Azərbaycanın müstəqilliyinin, ərazi bütövlüyünün və təhlükəsizliyinin təmin edilməsində xüsusi xidmətlərinə görə;
- Fövqəladə hallarda və ya ekstremal şəraitdə insanların xilas edilməsində xüsusi xidmətlərinə görə;
- Dövlət sərhədinin mühafizəsinin təmin edilməsində xüsusi xidmətlərinə görə və s.
Layihədə bildirilir ki, “Rəşadət” ordeninin 3 dərəcəsi var. 1-ci dərəcəli “Rəşadət” ordeni ən yüksək dərəcədir. Layihə səsə qoyularaq qəbul olunub.
Azərbaycanda şəxsiyyət vəsiqələrinin müddəti dəyişdirildi
Azərbaycanda yeni nəsil şəxsiyyət vəsiqəsinin tətbiqi müddəti ilə əlaqədar qanunvericiliyə bəzi dəyişikliklər edilb. Milli Məclisin iclasında "Azərbaycan Respublikası vətəndaşının şəxsiyyət vəsiqəsi haqqında" qanuna müvafiq dəyişikliklər müzakirə olunub.
Dəyişikliyə əsasən, 2019-cu il yanvarın 1-dək verilən şəxsiyyət vəsiqələri vətəndaş 25, 35, 50 yaşına çatanadək və ya vətəndaşın soyadı, adı, atasının adı, yaşayış yeri, ailə vəziyyəti, hərbi vəzifəsi dəyişilənədək, yaxud şəxsiyyət vəsiqəsi itənədək, yararsız hala düşənədək və ya vəsiqənin üzərindəki məlumatların səhv olduğu müəyyənləşdirilənədək qüvvədə qalır. Bu dəyişiklik 2019-cu il yanvarın 1-dən qüvvəyə minir.
Qanunun hazırkı variantında bu müddət “2018-ci il 1 yanvar” kimi göstərilir.
Yeni dəyişikliklərə əsasən, 15 yaşı tamam olmamış Azərbaycan Respublikası vətəndaşının fərdi identifikasiya kartının 2020-ci il yanvarın 1-dən tətbiq ediləcəyini nəzərə alaraq, 15 yaşı tamam olmamış vətəndaşlara da 2019-cu il yanvarın 1-dən 2020-ci il yanvarın 1-dək olan müddətdə şəxsiyyət vəsiqəsi veriləcək.
Qanunun hazırkı variantında bu dəyişikliyin 2018-ci il yanvarın 1-dən tətbiqi nəzərdə tutulur.
Dəyişikliklər səsə qoyularaq qəbul edilib.
Sürücünün söhbətə görə cəzalandırılması və zədələnmiş avtomobilin təmirinə icazə məhdudiyyəti aradan qaldırılıb
Azərbaycanda nəqliyyat vasitələrinin saxlanması qaydasının pozulması ilə bağlı maddəyə dəyişiklik edilir, nəqliyyat vasitəsini idarə etməkdən diqqəti yayındıra biləcək söhbətdə iştirakla bağlı və banı zədələnmiş nəqliyyat vasitələrinin müvafiq icra hakimiyyəti orqanının təmirə aparmaqla bağlı icazə məhdudiyyəti ləğv edilir.
Milli Məclisin iclasında İnzibati Xətalar Məcəlləsinin 342.1.2-ci maddəsinə (nəqliyyat vasitəsini idarə etməkdən diqqəti yayındıra biləcək söhbətdə iştirak etməyə görə), 345-ci maddəsinə (2-ci bənd - banı zədələnmiş nəqliyyat vasitələrinin müvafiq icra hakimiyyəti orqanının icazəsi olmadan təmirə qəbuluna görə 250 manat cərimə cəzası təyin olunma) dəyişiklik müzakirəyə çıxarılıb.
Təklif olunan dəyişiklikdə bildirilir ki, təcrübəyə əsasən, 345-ci maddədə ləğv edilməsi təklif edilən 2-ci bənd tətbiq olunmur. Bu bəndin tətbiqinə ehtiyac olmadığından çıxarılması təklif edilir. Qeyd olunur ki, son dövrlər Daxili İşlər Nazirliyinin maddi texniki bazasının və elektron informasiya sistemlərinin, ehtiyyatlarının inkişaf etdirilməsi hər hansı qanun pozuntusunun aşkarlanmasına imkan yaradır. Bu səbəbdən də banı zədələnmiş nəqliyyat vasitələrini təmirə qəbul edərkən müvafiq icra hakimiyyəti orqanının icazəsinin olmasına ehtiyac qalmır.
Layihə səsə qoyularaq qəbul edilib.
