Ötən gecə İranın Bəndər Abbas şəhəri və Qeşm adası ətrafında güclü partlayışlar baş verib. Əvvəlcə hücumun BƏƏ tərəfindən törədildiyi iddia edilsə də, “Fox News”a danışan ABŞ-ın yüksək vəzifəli rəsmisi Qeşm adası yaxınlığındakı hücumun ABŞ tərəfindən gerçəkləşdirildiyi bildirib. İrandan gələn açıqlamada isə ABŞ-ın atəşkəsi pozduğu iddia edilib.
İran dövlət televiziyası Qeşm adasındakı partlayışın Bəhmən sərnişin körpüsündə baş verdiyini, Fars Xəbər Agentliyi isə Qeşm adasında İran silahlı qüvvələri ilə düşmən ünsürləri arasında toqquşmaların baş verdiyini bildirib.
ABŞ prezidenti Donald Tramp İrana hücumları Vaşinqtonun həyata keçirdiyini etiraf edərək "Hücumlar yüngül bir şillə idi, atəşkəs hələ də qüvvədədir" deyib: "Əgər İran razılaşmasa, daha sərt zərbələr endirəcəyik. İran dəlilər tərəfindən idarə olunur".
Tramp bildirib ki, üç ABŞ hərbi gəmisi Hörmüz boğazından keçib. ABŞ-ın bölgədəki blokadasını "polad divar" adlandıran Tramp, gəmilərin blokadada iştirak edəcəyini bildirib.
Tasnim Xəbər Agentliyi isə Qeşm adasındakı Bəhmən körpüsündə partlayışın Birləşmiş Ərəb Əmirlikləri (BƏƏ) tərəfindən törədildiyini iddia edib. Bunu "düşmənçilik hərəkəti" adlandıran agentlik bildirib ki, BƏƏ Qeşm adasına edilən hücumlarda iştirak edibsə, bunun bədəlini ağır ödəyəcək. BƏƏ-nin hücumu mini-dronlardan istifadə edərək həyata keçirdiyi və partlayış səslərinin aktivləşdirilmiş hava hücumundan müdafiə sistemləri səbəbindən olduğu iddia edilib.
İran dövlət televiziyası hərbi mənbəyə istinadən xəbər verib ki, "Təcavüzkar ABŞ ordusunun İran neft tankerinə hücumundan sonra Hörmüz boğazındakı düşmən elementlər İranın raket atəşinə məruz qalıb. Düşmən bölmələri zərər çəkdikdən sonra qaçmağa məcbur olub".
İranın hərbi əməliyyatlarını həyata keçirən bölmə olan Xatəm əl-Ənbiya Mərkəzi Qərargahının sözçüsü İbrahim Zülfiqari də ABŞ ordusunun İran neft tankerinə hücum edərək atəşkəsi pozduğunu bildirib: "ABŞ ordusu Cask bölgəsindən İran sahil sularında Hörmüz boğazına doğru üzən İran neft tankerini hədəf alaraq atəşkəsi pozub".
İran sözçüsü həmçinin qeyd edib ki, ABŞ ordusu Birləşmiş Ərəb Əmirliklərinin Fuceyra sahillərində Hörmüz boğazına daxil olan başqa bir gəmiyə də hücum edib.
İranın tərəfi bildirib ki, ABŞ İranın bir neft tankerini və başqa bir gəmini hədəf alaraq atəşkəsi pozub. Qeyd edilirki, Tehranın qərbində hava hücumundan müdafiə sistemləri işə salınıb. İran donanması Hörmüz boğazı yaxınlığında üç ABŞ esminesini hədəf alıb.
“Fox News”a danışan yüksək vəzifəli bir ABŞ rəsmisi bildirib ki, ABŞ ordusu İranın Qeşm və Bəndər Abbas şəhərlərinə hava hücumları həyata keçirib, lakin bu, atəşkəsin bitdiyi anlamına gəlmir.
ABŞ ordusunun Qeşm adası və Bəndər Abbas şəhərlərinə hava hücumları ilə bağlı açıqlama yayan CENTCOM, hücumları "səbəbsiz İran hücumlarına qarşı özünümüdafiə" adlandırıb: "Mayın 7-də ABŞ Hərbi Dəniz Qüvvələrinin idarə olunan raket esminetsləri Hörmüz boğazından Oman körfəzinə doğru keçərkən, ABŞ qüvvələri İranın səbəbsiz hücumlarının qarşısını alıb və qanuni özünümüdafiə zərbələri ilə cavab verdi".
Açıqlamada İranın raketlər, dronlar və kiçik qayıqlardan istifadə edərək çoxsaylı hücumlar etdiyi iddia edilib, lakin ABŞ Hərbi Dəniz Qüvvələrinin heç bir aktivinin vurulmadığı vurğulanıb.
Tahir TAĞIYEV
