Bədərəddin Quliyev: “Trampın siyasəti belədir ki, qarşı tərəfə hücum edərkən bütün məsələlərdən istifadə edir"
ABŞ prezidenti Donakd Tramp Roma Papası XIV Leodan əl çəkmək istəmir, hətta onun dilindən yalan belə söyləməkdən çəkinmir. Roma Papası ilə Tramp arasında uzun aylardır ki, qarşılıqlı ittihamlar baş verir, bir-birinə ağır tənəli sözlər deyirlər.
Tramp artıq neçənci dəfədir deyir ki, Roma Papası “İranın atom bombasının dünya üçün təhlükə olmadığını” deyib.
Maraqlı budur ki, Papanın belə bir ifadə işlətdiyini analitiklər inkar edirlər. Qeyd edirlər ki, Papanın belə bir söz dediyinə də heç yerdə rast gəlinmir və Papa “İranın atom bombasına malik olması dünya üçün təhlükə deyil” ifadəsini dilə gətirməyib. Amma bu yalanı Tramp artıq dəfələrlə təkrar edib. Dünyada heç kəsin qəbul etmədiyi, ortada Papanın da belə bir söz dediyini sübut edən heç bir dəlil olmadığı halda Tramp niyə bu cür həqiqətə uyğun olmayan sözlərdən dəfələrlə Papaya qarşı istifadə edib? Qəsd və niyyət nədən ibarətdir?
Siyasətçi Bədrəddin Quliyev baki-xeber.com-a bildirdi ki, Trampla Roma Papası arasında ziddiyyətin kökündə əslində ABŞ prezidentinin Roma Katolik kilsəsini hədəfə alması dayanır. B.Quliyevin sözlərinə görə, Trampın təkcə XIV Leo ilə deyil, Papa Fransisklə də münasibətləri ziddiyyətli olub. “Roma kilsəsi Trampın apardığı siyasətə, xüsusən də miqrantlarla bağlı atdığı addımlara tənqidi yanaşıb. ABŞ Prezidentinin miqrantlara münasibəti onları qane etmirdi. Franksisdən sonra XIV Leonun Trampa qarşı tənqidi münasibəti özünü göstərir. Vatikanın siyasətinə uyğun insanların bərabər yaşaması, onlara şərait yaradılması əsas götürülür. Təbii ki, dünyada gedən proseslərlə bağlı insanların miqrasiyası, başqa ölkələrə köç etməsi qaçılmazdır.
İrana gəlincə, fars rejiminin həmişə Vatikanla gizli əlaqələri olub. Hətta dini qarşıdurmalarda belə farslarla onların əlaqələri var idi. İrana münasibətdə də Vatikan bu davranışı göstərdi. Papa Trampın İran siyasətini qəbul etmir. Papa XIV Leo ABŞ-ın İrana qarşı müharibəsini tənqid edərək "müharibəyə son qoyun" çağırışı edib, bu isə Trampın qəzəbinə səbəb olub.
Yevangelistlərlə katoliklər arasında qarşıdurma mövcuddur. Bunlar katolik dünyasını heç sayaraq belə addımlar atırlar. Düzdür, Marko Rubionun Vatikana getməsi münasibətlərdə yeni sistem yaradır. Müharibə aparan dövlət başçıları, xüsusən də katoliklər Vatkana hörmətlə yanaşırdı.
Vatikan xristian birliyinin dağılmasını istəmir, parçalanmanın qarşısını alır. Trampın Roma Papasının dilindən bu şəkildə danışması onların arasındakı ziddiyyətin göstəricisidir. Trampın siyasəti belədir ki, qarşı tərəfə hücum edərkən bütün məsələlərdən istifadə edir. Tramp qarşı tərəfi aşağılamaq üçün hər addımlar atır. Roma Papasının çəkinmədən Trampın apardığı müharibənin əleyhinə çıxması onu narahat edir və ona görə də bu cür davranışlar göstərir. Papanın nüfuzu, çıxışları Trampa qarşı seçkilərdə böyük təlatüm yarada bilər. Ümumiyyətlə aralıq seçkilərdə bu təsirlər qaçılmazdır”-deyə B.Quliyev qeyd etdi.
İradə SARIYEVA
