Afsəddin Nəbiyev: “Zaxarovanın “unutmayacağıq” xəbərdarlığı gələcək sanksiya və təzyiqlərin anonsu kimi görünür”
“Rusiya ictimaiyyəti Ermənistanın terrorçu Volodimir Zelenskiyə tribuna verməsini qəzəblə nəzərə aldı, bunu unutmayacaq”. Bu barədə Rusiya Xarici İşlər Nazirliyinin sözçüsü Mariya Zaxarova brifinqdə bildirib.
“Rusiya cəmiyyətində dərin qəzəb və anlaşılmazlıq içində təkcə bunu yox, həm də həmişə dost-qardaş ölkə kimi qəbul etdiyimiz Ermənistanın kimə tribuna verdiyini gördü. Rusiya cəmiyyəti bunu unutmayacaq”, - o deyib. Zaxarova qeyd edib ki, Ermənistan Avropanın hərbiləşdirilməsi planlarına daxildir, onu da Aİ-nin anti-Rusiya cəbhəsinə yaxınlaşdıracaqlar.
Görünən odur ki, seçki ərəfəsində Rusiyanın Paşinyan hakimiyyəti ilə qarşıdurması dərinləşir. Zelenskinin İrəvana səfəri Rusiya hakimiyyətinə od qoyub. Rusiya Zaxarovanın timsalında Paşinyan hakimiyyətinə kin, qisas püskürür.
Sözügedən məsələni baki-xeber.com-a şərh edən AMİP-in sədr müavini Afsəddin Nəbiyevin fikrincə, Mariya Zaxarovanın sərt bəyanatları və Zelenskinin İrəvana səfəri barədə müzakirələr göstərir ki, Rusiya-Ermənistan münasibətlərində artıq “qırmızı xətlər” keçilib: “Bu, Ermənistan üçün həm daxili, həm də xarici siyasətdə ciddi suallar doğurur. Paşinyan hakimiyyəti yenidən seçilərsə, Ermənistanın Qərbə yönələn xətti daha da güclənəcək. Lakin bu, Moskva tərəfindən “xəyanət” kimi qəbul olunur. Rusiya uzun illər Ermənistanı öz təhlükəsizlik çətiri altında saxlayıb, indi isə onu “strateji tərəfdaşdan rəqibə” çevirmək təhlükəsi var. Bu, hərbi baza, enerji asılılığı və iqtisadi təzyiqlərin işə salınması deməkdir. Ermənistan Fransa və Hindistandan silah alır, Avropa İttifaqı missiyası da fəaliyyət göstərir. Amma bunlar hələlik tam təhlükəsizlik zəmanəti yaratmır. İqtisadi tərəfdən də vəziyyət çətindir. Ermənistanın qazı Rusiyadan gəlir, malları isə Avrasiya İqtisadi İttifaqı vasitəsilə Rusiya bazarına çıxır. Kreml qazın qiymətini artırsa və “Yuxarı Lars” keçidində süni maneələr yaratsa, bu, Ermənistanın sosial sabitliyini ciddi sarsıda bilər. Qərbin Ermənistana marağı isə təkcə demokratiya dəstəyi deyil, həm də Rusiyanı Cənubi Qafqazdan sıxışdırmaq strategiyasının bir hissəsidir. Ermənistan böyük güclərin rəqabət meydanına çevrilir və əgər Paşinyan balansı qoruya bilməsə regional təcridə düşə bilər. Azərbaycan və Türkiyə ilə münasibətlər tam tənzimlənmədiyi halda Rusiyadan tam uzaqlaşmaq “strateji mühasirə” riskini artırır. Ona görə də indiki vəziyyətdə Ermənistan hakimiyyətini təmsil edən komandanın ən doğru seçimi Türkiyə və Azərbaycanla münasibətlərini ən üstün səviyyəyə çatdırmaq olmalıdır. Zaxarovanın “unutmayacağıq” xəbərdarlığı isə gələcək sanksiya və təzyiqlərin anonsu kimi görünür. Nəticədə Ermənistanın taleyi bir sualdan asılıdır. Rusiya Ukrayna müharibəsindən necə çıxacaq? Rusiya bu müharibədən güclü çıxarsa Ermənistan çox pis vəziyyətə düşə bilər. Çünki Moskvanın gücü və zəifliyi birbaşa Ermənistanın gələcəyini müəyyən edəcək. Ona görə nə qədər imkan var Paşinyan Azərbaycanın sadə şərtlərini yerinə yetirib Rusiya və Qərb dövlətlərinin asılılığından azad olmalıdır ki, prosesi uğurla başa çatdırsın. Bu da Cənubi Qafqazda uzunmüddətli sülhün təmini üçün olduqca vacibdir”.
Vidadi ORDAHALLI
