(İkinci yazı)
Azərbaycan Ordusunun giziri Vüsal Mehdi oğlu Tahirov 1997-ci il mayın 1-də Naxçıvan MR Şərur rayonunun Danyeri kəndində anadan olub. Beş yaşı olanda ailəsi Abşeron rayonunun Xırdalan şəhərinə köçüb. Vüsal beşinci sinfə qədər Xırdalandakı 5 nömrəli tam orta məktəbdə oxuyub, sonra təhsilini buradakı 9 nömrəli tam orta ümumtəhsil məktəbində davam etdirib.
2015-2017-ci illərdə Azərbaycan Silahlı Qüvvələrinin Naxçıvan şəhərində yerləşən N saylı hərbi hissəsində müddətli həqiqi hərbi xidmətdə olub. Sonra hərbi təhsil alaraq gizir rütbəsinə yiyələnib, Xüsusi Təyinatlı Qüvvələrdə fəaliyyət göstərib. 2019-cu ildə xüsusi snayper tapşırıqları kursunu müvəffəqiyyətlə bitirib. 2020-ci ildə N saylı hərbi hissədə təşkil olunmuş atletika və gimnastika üzrə qaçış yarışında birinci yeri tutub, fəxri fərmanla təltif edilib. 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi üçün başlanan Vətən müharibəsi zamanı Xocavəndin və Şuşanın azadlığı uğrunda gedən döyüşlərdə iştirak edib, şücaət göstərib. Noyabrın 8-də Şuşa döyüşləri zamanı başından qəlpə yarası alıb, noyabrın 16-da şəhid olub. II Fəxri Xiyabanda dəfn edilib.
Subay idi.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən Vüsal Tahirov ölümündən sonra "Vətən uğrunda" medalı ilə təltif edilib.
Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Respublikasının Prezidenti İlham Əliyevin 29.12.2020-ci il tarixli Sərəncamına əsasən Vüsal Tahirov ölümündən sonra "Şuşanın azad olunmasına görə" medalı ilə təltif edilib.
Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Respublikasının Prezidenti İlham Əliyevin 24.06.2021-ci il tarixli Sərəncamına əsasən Vüsal Tahirov ölümündən sonra "Xocavəndin azad olunmasına görə" medalı ilə təltif edilib.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin müvafiq Sərəncamına əsasən Vüsal Tahirov ölümündən sonra III dərəcəli “Vətənə xidmətə görə” ordeni ilə təltif edilib.
Vüsal Mehdi oğlu Tahirov ölkə Prezidentinin müvafiq sərəncamı ilə ölümündən sonra “Şücaətə görə” medalı ilə də təltif edilib.
Ailə tərkibi
Atası: Tahirov Mehdi Hüseyn oğlu
Anası: Tahirova Rəsmiyyə Kərim qızı
Bacıları: Eyyubova Gülnar Mehdi qızı
Xəlilli Aysel Mehdi qızı
Həyatı və fəaliyyəti
Doğum tarixi: 01.05.1997-ci il
Doğum yeri: Şərur rayonu Danyeri kəndi.
Təhsili: Orta
Təhsil aldığı məktəb: Xırdalan şəhər 9 saylı tam orta məktəb
Ailə vəziyyəti: Subay
Qoşun növü: Quru Qoşunları
Mükəlləfiyyəti: Həqiqi hərbi xidmət
Rütbəsi: Gizir
Döyüşdüyü yerlər: Xocavənd, Şuşa
Medal və Ordenləri: “Şuşanın azad olunmasına görə”, “Xocavəndin azad olunmasına görə”, “Şücaətə görə”, “Vətən uğrunda” medalları və III dərəcəli “Vətənə xidmətə görə” ordeni
Yaralandığı tarix: 08.11.2020
Şəhid olduğu tarix: 16.11.2020
Şəhid olduğu yer: Xocavənd, Şuşa istiqaməti
Dəfn olunduğu yer: Bakı şəhəri, II Fəxri xiyaban
Ailəcanlı, dostcanlı, olduqca mehriban insan, Vətən fədaisi 23 yaşlı şəhidimiz Tahirov Vüsal Mehdi oğlu Xocavənd və Şuşa uğrunda gedən ağır döyüşlərdə iştirak edib, şücaət göstərib, döyüşlərin çoxunda fərqlənib, qorxmaz kəşfiyyatçı və kəskin snayperçi kimi ad qazanıb. 8 noyabr 2020-ci ildə Şuşa uğrunda gedən döyüşlərin birində yanına mərmi düşüb, başından qəlpə yarası alaraq xəstəxanaya yerləşdirilib. 8 gün komada qalıb.
Noyabrın 16-sı şəhidlik zirvəsinə yüksəlib. Noyabrın 17-si 2-ci Fəxri xiyabanda torpağa tapşırılıb.
Allah rəhmət eləsin!
Qeyd: Tahirov Vüsal Mehdi oğlunun əziz xatirəsi dünya durduqca ürəklərdə yaşayacaq, Vətən uğrundakı misilsiz xidmətləri unudulmayacaq. Nəsillər daim onun məzarını qürur hissi ilə ziyarət edəcək, onun qəhrəmanlığını özləri üçün bir nümunə, bir örnək biləcəklər.
Əlbəttə, “şəhidlər ölməz, Vətən bölünməz!”...
Şəhidini uca tutan xalqı tarix də uca tutar... Bu anlamda Azərbaycan xalqı Vüsal kimi cəsur oğullarını əbədiyyətin sönməz işıqlarına çevirib...
Vətəni şair də vəsf edir, yazıçı da, rəssam da, bəstəkar da... Bu vəsflər yalnız sənətkarlıq xüsusiyyətləri kimi ehtiva edir. Ancaq cəsur oğullar sərrast hünər və əzmləri ilə vətəni elə vəsf edirlər ki, adam heyrət edir. Bu vəsf əbədiyyət üfüqü kimi daim işıqlı qalır...
Tahirov Vüsal Mehdi oğlunun ürəyi bu baxımdan Vətən eşqində təcəlla edirdi; könül aləmi də Vətən sevdaları ilə süslənmişdi. İndinin özündə onun üçün deyilən ağrı-acılar istər-istəməz sinə deşir...
Şəhidə isə ağı deməzlər. Çünki səslənən ağılar qəhrəman oğulların süst xəyallarına toxunur, onların mübarizlik sevdalarına sədd olur. Bir insanın ki, iç sevgisində əsas xətt Vətən, Ana, Yurd aspektləridir, onun üçün yas saxlamaq, zənnimizcə, doğru deyil.
Ailəsinin dediklərindən belə bir fəhm çıxarırıq ki, Vüsal yalnız Vətən üçün doğulmuşdu. O, hərbi xidmətinin başa vurduqdan sonra müddətli həqiqi hərbi xidmət keçmək üçün qarşısına ciddi məqsəd qoymuş, böyük israrla ata-anasına, bacılarına bu şərəfi üzərində daşımaq istəyini ifadə etmişdi. Doğrudur, ailəsi onun bu israrı qarşısında tərəddüd etməmişdi, sanki onların da istəyi Vüsalın istəyi ilə üst-üstə düşmüşdü... Bu, o anlamı ifadə edir ki, Vüsalın tərbiyə aldığı ailə, o ailənin üzvləri də əsl Vətən sevdalılarıdır.
Bəllidir ki, Vüsal Tahirov və onun kimi cəsur oğullar işğal əzablarını dadmaqdan təngə gəlmişdilər. Buna görə onlar vətənin yarımçıq qalmış arzularına ağ rəng qatmaq üçün ruhən duruldular, ağ sevdaların sorağına düşüb cəmi 44 günə xalqımıza sevinc yaşatdılar.
Nədəndirsə, həqiqi Vətən oğullarında həmişə fərqli bir milli sima, mənlik, qürur, kişilik əzmi olur. Bunlar yalnız məqam yetişəndə özünü parlaq şəkildə büruzə verir...
Vüsalın içindəki eşq, sevgi adi həyatdakı eşq və sevgi kimi deyildi. O, əsl Vətən sevgisi idi. Vüsal o eşqin sağlam qalması üçün qəlbini məyusluq doğuran iztirablara yaxın qoymadı, o eşqi qəlbinin ağ pərdəsi kimi qorudu; imkan vermədi ki, oraya çat düşsün.
Nəhayət, zamanı yetəndə o, bu eşq ilə vətəni sevinc hislərinə qərq etdi...
Vüsal Tahirovun Vətən eşqi, Yurd niskili xüsusi dəyərlərdir. Onun ömür anı, döyüş yolu beş-on kitablıq yazıdır. Biz də onun şəhid adına ehtiram olaraq bu kitaba xeyir-dua verdik. Əminik ki, biz dünyada olmayanda da bu kitab məhz Vüsal Tahirovun xatirinə oxunacaq...
Vüsalın Vətən eşqi onun sınmaz hünəri idi. O, şərəfli ölümü ilə elə bir himn bəstələdi ki, bugünkü və gələcək nəsillər bu himni elə cəsur oğulların qəhrəmalığı və şücaəti ilə lərzəyə gətirəcək, düşmənlərimiz bu səsdən qorxub-çəkinəcək.
***
Müzəffər Ali Baş Komandan, Prezident İlham Əliyev 2021-ci ildə şəhidlərin Anım Günü ilə əlaqədar xalqa müraciəti zamanı demişdi: “İkinci Qarabağ müharibəsi bizim şanlı tariximizdir. Bu Qələbə tarixdə əbədi qalacaq. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi... Biz düşməni torpaqlarımızdan qovduq və ədaləti, beynəlxalq hüququ bərpa etdik. Biz milli ləyaqətimizi bərpa etdik. Bu gün Azərbaycan xalqı müzəffər xalq kimi yaşayır. Bu gün Azərbaycan dövləti qalib dövlət kimi yaşayır. Biz bundan sonra müzəffər xalq və qalib dövlət kimi əbədi yaşayacağıq”.
Xalqımıza müzəffər xalq və qalib dövlət kimi əbədi yaşayamaq səadəti nəsib edən ümummilli liderimiz Heydər Əliyevə və ölkə başçımız İlham Əliyevə sonsuz minnətdarıq!
Həmçinin, bu səadəti xalqımıza yaşadan qeyrətli, qorxmaz, cəsur oğullara əbədi borcluyuq...
(Ardı var) Hikmət Məlikzadə
