Sahil Kərimli: “Paşinyan bu seçkidə də qələbə qazanacağına əmindir və böyük ehtimalla seçicilərin əksəriyyətinin səsini qazanacaq”
Ermənistan baş naziri Nikol Paşinyan 2028-ci ildə Avropa Siyasi Birliyinin sammitində iştirak etmək üçün Azərbaycana gəlmək niyyətində olduğunu açıqladıqdan sonra ölkəsindəki Rusiyayönümlü müxalifət ona qarşı sərt bəyanatlar səsləndirməyə başlayıb. Bu, Ermənistandakı Rusiyayönümlü müxalifət o qədər ciddi ciddi şəkildə qəzəblənib ki, hətta Paşinyanı təhqir etməkdən belə çəkinməyiblər. Ona qarşı “Azərbaycanın ayağının altını yalamağa başlayacaq”, “bu güzəştə getməyin daha bir ifadəsidir” kimi fikirlər söyləyiblər.
Paşinyanın 2028-ci ildə Bakıda keçiriləcək sammitə gəlməyindən erməni müxalifəti niyə belə narahatdır? Xüsusən Paşinyanın seçki ərəfəsində "mən sammitdə iştirak etmək üçün Bakıya gedəcəyəm” deməsi artıq onu ifadə etmirmi ki, Paşinyan iyunun 7-də keçiriləcək seçkidə qalib gələcəyinə qəti şəkildə şübhə etmir, yüz faiz öz qələbəsinə inanır və bu cür bəyanatla da müxalifətin kürkünə birə salır. Bu Paşinyanın növbəti seçkidə 100 faiz qalib gələcəyinə qətiyyətli inamının ifadəsi sayıla bilərmi?
Politoloq Sahil Kərimli baki-xeber.com-a bildirdi ki, bu gün Rusiyanın siyasi dairələri açıq-aydın şəkildə Ermənistanda keçiriləcək seçkiyə çox ciddi və sərt müdaxilə etməyə çalışırlar. “Xüsusilə də Rusiya prezidenti Vladimir Putinin Ermənistanın baş naziri Nikol Paşinyanla bu istiqamətdə açıq danışması, Rusiyanın maraqlarını açıq-aydın dilə gətirməsi təbiidir ki, bu gün Ermənistandakı Rusiyapərəst qüvvələri daha da qızışdırıb və ayaqlandırıb. Bu yöndə Paşinyana qarşı çox ciddi anti-təbliğat həyata keçirilir. Bu gün Paşinyanın seçkidə inamlı qələbə qazanması real görünür. Çünki böyük ehtimalla Paşinyan ölkə daxilindəki seçicilərin etimadını qazanıb seçkidə səs çoxluğu əldə edəcək. Eyni zamanda da Paşinyanın son dövlərdə atdığı addımlar, xüsusilə də Azərbaycanla Ermənistan arasında sülh müqaviləsinin imzalanması istiqamətində müəyyən irəliləyişlərə və uğurlara nail olması bu gün erməni cəmiyyətini çox ciddi şəkildə maraqlandırır, erməni xalqının böyük əksəriyyəti də artıq müharibə istəmir, Azərbaycanla sülh istəyir. Bununla da Nikol Paşinyan sülh istəklərini dilə gətirir. Paşinyanın gələcəkdə dünya miqyaslı sammitlər çərçivəsində Azərbaycana səfər etmək istəməsi təbiidir ki, Ermənistandakı radikal qüvvələlərin əlində bir bəhanəyə çevrilib. Bundan Paşinyana qarşı istifadə etməyə çalışırlar və guya belə bir fon yaradırlar ki, Paşinyan Azərbaycanla sülh müqaviləsi imzalamaq, bir neçə ildən sonra Bakıya gəlmək istəklərini dilə gətirməklə Azərbaycan mövqeyi tutur. Bunu da onlar böyük xəyanət kimi qiymətləndirirlər. Amma reallıq ondan ibarətdir deyil”.
S.Kərimlinin fikrincə, reallıq bundan ibarətdir ki, artıq Ermənistan rəhbərliyi də çox yaxşı anlayır və Azərbaycanın gücünü, bölgədə yaratdığı tamamilə yeni reallığı artıq qəbul edir, prosesləri düzgün hesablayır. O, qeyd etdi ki, bu səbəbdən də bölgənin gələcəyi, təhlükəsizliyi üçün Azərbaycanın mövqeyinin qəbul olunması əsas amillərdən biridir. “Bütün bunlarla yanaşı Paşinyan bu seçkidə də qələbə qazanacağına əmindir və böyük ehtimalla seçicilərin əksəriyyətinin səsini qazanacaq”-deyə S.Kərimli qeyd etdi.
İradə SARIYEVA
