Bu gün Azərbaycanın təbii qaz ixrac etdiyi 16 ölkədən məhz 10-u Avropa İttifaqının (Aİ) üzvü olan ölkədir. Çexiya Azərbaycandan mavi qazın alınmasında maraqlıdır, bu istiqamətdə danışıqlar aparır. Bu da onu göstərir ki, yaxın vaxtlarda Aİ üzvü olan Azərbaycandan mavi qaz alan ölkələrin sayında artımlar müşahidə olunacaq. Bu da Azərbaycanın Aİ-nin enerji təhlükəsizliyinə daha yaxından töhfə verəcəyi anlamına gəlir. Azərbaycan hazırda Aİ-nin mavi qaz idxalında ən böyük 5-ci tərəfdaşdır. Bu da ölkənin Aİ-nin enerji təhlükəsizliyinin formalaşmasındakı rolunu bir daha təsdiq edir. Təəssüf ki, Avropa Parlamentində olan müxtəlif qruplar Azərbaycan-Aİ münasibətlərinə xələl gətirməyə çalışırlar.
Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallasın Azərbaycana səfəri bunlar fonunda mühüm siyasi hadisə oldu. Bu səfər Avropa İttifaqının Cənubi Qafqaz siyasətində Azərbaycana verdiyi əhəmiyyəti açıq şəkildə nümayiş etdirir. Eyni zamanda, Avropa Şurası Parlament Assambleyası və Avropa Parlamentinin ölkəmizə qərəzli yanaşması fonunda bu addım Avropa İttifaqının daha tarazlı mövqe tutmağa və balans yaratmağa çalışdığını göstərir. Belə vəziyyətdə Rusiya XİN-in rəsmi nümayəndəsi Mariya Zaxarovanın açıqlamaları da xüsusi maraq doğurur. O bəyan edib ki, Avropa Parlamentinin suveren dövlətlərə münasibətdə siyasəti fonunda Azərbaycanın bu struktur ilə əməkdaşlığı dayandırması qərarı təəccüb doğurmur. Mariya Zaxarova Moskvada keçirilən brifinqdə Bakının qərarını şərh edib. O vurğulayıb ki, Azərbaycan Avropa Parlamentinin “kobudluğu, hörmətsizliyi və ölkənin daxili işlərinə birbaşa müdaxiləsi” ilə qarşılaşan yeganə dövlət deyil. Bu, Azərbaycanın suveren hüququdur: “Bu, Bakının qondarma Avropa Parlamenti ilə əlaqəni dayandırmaq barədə suveren qərarıdır. Həmin qərar təəccüb doğurmur”. Rusiya XİN-in rəsmi nümayəndəsi Avropa Parlamentinin qəbul etdiyi qətnamələri kəskin tənqid edərək, onları “təkcə siyasiləşdirilmiş deyil, həm də feyk” adlandırıb. O əlavə edib ki, “bu qurum nasaz printer kimi bu cür sənədləri sonsuza qədər çap edir”. M. Zaxarova, həmçinin bildirib ki, Avropa Parlamentinin üçüncü ölkələrlə bağlı qətnamələrinin ritorikası “təkəbbürlü mentor tonuna malikdir. Sanki hər hansı metropoliya öz müstəmləkələri ilə danışır”. Diplomatın sözlərinə görə, Avropa Parlamenti “çoxdandır ki, Brüsselin yeni ultra-liberal siyasətinin ruporuna çevrilib və demokratiya ilə heç bir əlaqəsi yoxdur”. O, həmçinin qurumu feyk xəbərlər yaymaqda, söz azadlığını boğmaqda və tarixin manipulyasiyasında ittiham edib. Eyni zamanda, Zaxarova qeyd edib ki, Azərbaycan Avropanın başqa strukturları ilə qarşılıqlı fəaliyyətini davam etdirir: “Bakı Avropanın digər strukturları ilə dialoqunu davam etdirir, amma yenə də bu məsələdə suveren hüquqa malikdir”.
Tahir TAĞIYEV
