Akif Nağı: “Almaniyaya qarşı öz mənfi münasibətini göstərməyə çalışır”
Rusiya Təhlükəsizlik Şurasının sədr müavini Dmitri Medvedev vahid Almaniyanın mövcudluğunu “qanunsuz” hesab edir. Dmitri Medvedev deyib ki, müasir Almaniyanın mövcudluğu üçün “kafi hüquqi baza” yoxdur, onun fikrincə, Almaniya Federativ Respublikası ilə ADR-in birləşməsi “vətəndaşların iradəsini azad ifadə etmədən” baş verib. Medvedev deyir ki, Almaniya militarizasiya kursunu müəyyənləşdirib və İkinci Dünya Müharibəsində məğlubiyyətin qisasını almaq istəyir.
Mayın 7-də Rusiyanın dövlət televiziya kanalı RT üçün dərc olunan məqaləsində o, Almaniya hökumətini kəskin tənqid edib və bildirib ki, müasir Almaniya “onun mövcudluğu üçün kifayət qədər hüquqi bazaya belə malik deyil”.
Medvedevin fikrincə, 1990-cı ildə Almaniyanın yenidən birləşməsi referendum yolu ilə “vətəndaşların iradəsini azad ifadə etmədən” baş tutdu və Almaniya Federativ Respublikası tərəfindən ADR-in virtual “udma”sına çevrildi. “Almaniya dövlətçiliyinin hüquqi bazası çox kövrəkdir” deyən siyasətçi vurğulayır ki, “Almaniya Federativ Respublikası ilə ADR-in birləşməsinin başlanğıcından bəri baş verən hər şey” arzu olunarsa, hüquqi baxımdan əhəmiyyətsiz sayıla bilər.
Bununla belə, ekspertlərin fikrincə, yenidən birləşməyə dair referendum nə beynəlxalq hüquq baxımından, nə də Almaniya konstitusiyası nöqteyi-nəzərindən zəruri deyildi. İkinci Dünya Müharibəsindən sonra parçalanmış Almaniyanın yenidən birləşməsi həm Şərqi, həm də Qərbi Almaniyada qəbul edilən parlament qərarları əsasında 1990-cı il oktyabrın 3-də baş verdi. ADR Əsas Qanunun 23-cü maddəsinə uyğun olaraq Almaniya Federativ Respublikasına qoşuldu ki, bu da Almaniya Konstitusiyasının onların qoşulmasından sonra Almaniyanın digər hissələrinə də şamil edilməsini nəzərdə tutur.
Medvedev Almaniyanın birləşmiş dövlət kimi mövcudluğunu qanunsuz sayır, deyir ki, FRQ ADR-i sadəcə uddu.
Rusiya bununla nə demək istəyir?
Azad Vətən Partiyasının sədri Akif Nağı baki-xeber.com-a bildirdi ki, Almaniyanın tarixinin Rusiya rəsmisi tərəfindən saxtalaşdırılması növbəti təxribat kimi dəyərləndirilə bilər. O, hesab edir ki, alman xalqı öz iradəsini yerinə yetirib, ədalətsizlik isə İkinci Dünya Müharibəsindən sonra Almaniyanın parçalanması, bölünməsi olub. “Faşist Almaniyasının bəşəriyyətə, insanlığa qarşı cinayətləri baş verdi və dünyanın mütərəqqi qüvvələri birləşib faşizmə qalib gəldilər. Bu o demək deyildi ki, o hadisəyə görə alman xalqı bütövlükdə cəzalandırılmalı idi. Almaniyanın iki yerə bölünməsi alman xalqına bir cəza idi. Faşistlər onsuz da tarix qarşsında da, hüquqi müstəvidə də cəzalarını aldılar. Amma alman xalqını o şəkildə cəzalandırmaq doğru deyildi. Şərqi və Qərbi Almaniyanın birləşməsi üçün çox böyük proses gedirdi və alman xalqı birləşməyə çalışırdı. Berkin divarının üstündən nə qədər insan Şərqdən Qərbə doğru keçib getmək istədilər, həyatlarını itirdilər, həbs olundular. Birləşmək üçün almanların niyyətləri vardı. Nəhayət, 1990-cı ildə o proses başa çatdırıldı, iki Almaniya birləşdi. Şərqi Almaniya Sovet işğalının nəticələri altında idi. Bunlar başqa, Federativ Almaniya da tamam başqa bir yolda idi”.
A.Nağının sözlərinə görə, bu gün Medvedevin Almaniya, o dövlətin siyasəti haqda müəyyən fikir yaratmaq cəhdi düzgün deyil: “Medevedev özünün bu cür qəribə fikir və təşəbbüsləri ilə çıxış edir. Heç Rusiyada da, dünyada da onun fikirlərinə, təşəbbüslərinə ciddi yanaşmırlar. O, bununla Almaniyaya qarşı öz mənfi münasibətini göstərməyə çalışır”.
A.Nağı hesab edir ki, Almaniya son dövrlər militarist hərbi ritorika ilə çıxış edir, xüsusən də Hörmüz böhranından sonra öz mövqeyini ortaya qoyurlar, bu böhranın həllində iştiraka nail olmaq istəyirlər. “Eyni zamanda Avropa üçün Rusiya təhlıükəsi var və Almaniya geri çəkilmədən Rusiyaya qarşı öz mövqeyini ortaya qoyur. Bu da Medvedevin də, Rusiya rəhbərliyinin də xoşuna gəlmir. Rusiya özünü Avropaya qarşı kabus kimi, onlar üçün təhlükə mənbəyi olaraq göstərmək istəyir. Bunun müqabilində Almaniyadan əks-reaksiya görürlər. Rusiya Almaniyanı qaralamağa çalışır və bu cür bəyanatla bu ölkənin daxilinə sirayət etmək istəyir.
Yenə də qeyd edirəm, Almaniyanın birləşməsində qansuz heç nə yox idi”-deyə A.Nağı qeyd etdi.
İradə SARIYEVA
