Təbriz Musayev: “O zamandan erməni diasporuna satıldığı üçün belə sarsaq bəyanatla çıxış edib”
Məlum olduğu kimi, Nyu-Yorkun meri Zohran Məmdani qondarma “erməni soyqırımı” ilə bağlı sərsəm bəyanatla çıxış edib. Məmdani çıxışında bildirib ki, 1915-ci ildə Osmanlı İmperiyası dövründə indiki Türkiyə, Suriya və Ermənistan ərazilərində 1.5 milyon erməni öldürülüb. Lakin əsas diqqət çəkən məqam bundan sonra gəlir. O, 2020-ci ildə Azərbaycan və Türkiyənin Qarabağdakı erməni əhaliyə hücum etdiyini, 2023-cü ildə isə Azərbaycanın yüz mindən çox ermənini bölgədən çıxardığını və bununla guya yüz ildən artıq davam edən “soyqırım kampaniyasını” davam etdirdiyini iddia edir.
Burada maraq və təəccüb doğuran həm də odur ki, müsəlman və əslən Hindistandan olan Məmdani belə bir sərsəm bəyanatla çıxış edib. Hindistanın da Azərbaycana və Ermənistana münasibəti bəllidir. Yəni onun bir Hindistan kökənli olması deməyə əsas verirmi ki, Məmdani özünün siyasi, beynəlxalq baxışları nöqteyi-nəzərindən tam şəkildə erməni lobbisi və diasporunun təsiri altındadır? Belə demək olarmı?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, məlum sərsəm bəyanatdan sonra Məmdaninin erməni lobbisinə bağlı olmasına heç bir şübhə qalmadı: “Əvvəla, Zohran Mamdani ABŞ Demokratlar Partiyasının üzvü və Nyu-York Ştat Assambleyasının millət vəkili olub. 2025-ci ildə keçirilən Nyu-York meri seçkilərində iştirak edərək şəhər tarixində mer postuna namizəd və qalib olan ilk müsəlman kimi tarixə düşüb. Məmdaninin “ermənidən çox erməni” kimi mövqe sərgiləməsi daha çox təmsil olunduğu partiya ilə əlaqədardır. Məsələ ondadır ki, ABŞ-dakı erməni lobbisi daha çox Demokratlar Partiyası ilə yaxındır. Təsadüfü deyil ki, ABŞ-ın sabiq prezidenti Cozef Bayden 2021-ci ilin aprelində qondarma “erməni soyqrımı”nı tanıdı. Seçki kampaniyası dövründə erməni lobbisi Məmdaninin seçilməsinə maliyyə dəstəyi verib. O zamandan erməni disporuna satıldığı üçün belə sarsaq bəyanatla çıxış edib. Gör erməni lobbisinin təsiri necə böyük olub ki, Qarabağ ermənilərinin 2023-cü ildə oranı könüllü tərk etmələrini Məmdanı “genosidin davamı” kimi təqdim etməyə çalışıb. O baxımdan hesab edirəm ki, bu məsələdə hər şey ortadadır”.
Vidadi ORDAHALLI
