Azər Həsrət: "Bu pullar xüsusilə onun vəzifədə olduğu dövrdəki qaçqın-köçkün əhalinin vəsaitlərindən əldə olunub"
Prezident Administrasiyasının sabiq rəhbəri Ramiz Mehdiyevin evindən cinayət yolu ilə əldə edildiyi deyilən 17 milyon manatdan çox vəsait aşkar edilib. Bununla bağlı Dövlət Təhlükəsizliyi Xidməti ötən gün videogörüntülər yayıb. Videoda həmçinin Ramiz Mehdiyevin xarici xüsusi xidmət orqanları ilə telefon danışığının səs yazısı da yer alıb.
Ən mühüm sual isə budur: milyonlarla manatlıq vəsait niyə bank sistemində deyil, yaşayış ünvanında saxlanılıb? Bu pullar hansı mərhələlərdən keçib? Hansı kanallar vasitəsilə formalaşıb?
Siyasi şərhçi Azər Həsrət bu xüsusda "Bakı-Xəber" qəzetinə bildirib ki, Ramiz Mehdiyevin evindən tapılan pullar, təbiidir ki, qanunsuz yollarla əldə edilib, qanunsuz pullar olduğuna görə də onların leqallaşdırılması mümkün olmayıb. Ekspert hesab edir ki, o pullar banka yatırılsaydı, birincisi, həmin məbləğlər barədə informasiya cəmiyyətə sızardı, dövlətin müvafiq orqanları da bundan xəbər tutardı, ikincisi isə suallar yaranardı ki, bu pullar hardandır - çünki Ramiz Mehdiyev yüksək vəzifəli dövlət qulluqçusu idi, onun əməkhaqqı bu qədər vəsaitə sahib olmaq üçün yetərli deyildi: "Ona görə də həmin vəsaiti evdə və ya bizim bilmədiyimiz başqa yerdə saxlamağa üstünlük verib. Mənə elə gəlir ki, 17 milyon manat həmin məbləğin görünən hissəsidir".
Siyasi şərhçi hesab edir ki, bu pulları Ramiz Mehdiyev rüşvət və korrupsiya yolu ilə "qazanıb" – bu pullar xüsusilə onun vəzifədə olduğu dövrdəki qaçqın-köçkün əhalinin vəsaitlərindən əldə olunub: "Bilirsiniz ki, həmin dövrdə bizim qaçqın-köçkün əhali çox pis vəziyyətdə yaşayırdı, ağır günlər keçirmişik… Ona görə də bu cür çətin vəziyyətdə yaşayan adamların ahı bir gün Ramiz Mehdiyevləri tutmalı idi və tutdu da. Yəni bu gün Ramiz Mehdiyev ifşa olunub, bizim gördüklərimiz yalnız DTX-nın paylaşdıqlarıdır. Qeyd etdiyim kimi, bu hələ tam deyil, yalnız görünən hissəsidir. Qarşıda bizi daha böyük, geniş, dəhşətli sürprizlər gözləyir."
Akif NƏSİRLİ
