Sentyabr ayı yaxınlaşır. Dolanışıq üçün bütün yayı qızmar günəş altında qan-tər içində işləyən zəhmətkeş valideynlərin yay "tətilindən" sonrakı qayğıları başlayır. Sentyabrın 15-də uşaqlarını məktəbə yollayacaq valideynləri indidən dərd götürüb. Təhsildən başqa hər işlə məşğul olan orta məktəblərdə hər il feodal direktorların əmrləri hər kəsi şoka salır. Bu il məktəbli formaları bu rəngdə, bu dəbdə olacaq, vəssalam! Özüdə alınacaq məktəb formalarının ünvanlarını, mağazalarını, satıcısına qədər hər şeyi məktəb direktorları müəyyənləşdirirlər. Həttda bəzi məktəb direktorlarının tapşırığı ilə sinif rəhbərləri valideynlərə "votsap qrupu" ilə "sifarişlərini" verirlər. Hətta geyimlərin hansı ünvandan alınacağı da bildirilir. Filan mağazadan, filankəsin mağazasından. İndi cəsarətin var məktəb direktorunun dediyi yerdən yox, başqa bir yerdən alasan. Pahoooo, gör nə qiyamət qopur. İlk öncə sinif rəhbərini salacaqlar ortaya, sonra da qadın valideyn koordinator qarışacaq işə. Yazıq valideynə psixoloji təzyiq təzyiq üstünə!
Görəsən hər dəfə məktəbli formalarına "əl gəzdirib" bunu davamlı qazanc yerinə çevirən, bununla da gündəlik çörəkpulunu zorla qazanan imkansız valideynləri xərcə salan məktəb direktorlarında heçmi vicdan deyilən hissiyat qalmayıb? Axı qiymətlərin hər gün yox, hər saat qalxdığı bir dövrdə insanlar böyük çətinliklərlə üz-üzə qalıblar. İndi iş tapmaq, ailəni orta həddə dolandırmaq özü mürəkkəb məsələdir. Axı işsizlik problemi birbaşa yaşayış tərzini gündən-günə çətinləşdirir. Bir çox valideynlər ailənin gündəlik ehtiyaclarını ödəyə bilmirlər, süfrələrinə normal qida məhsulları qoya bilmirlər. Kommunal ödənişləri çətinliklə ödəyirlər. Hələ kirayədə yaşayan, xəstəsi olan, hər ay apteklərdən eyni reseptləri alanlar var. Belə olan halda ailədən 2 uşaq məktəbə göndərən valideyn məktəbli forması ala biləcəkmi? Axı bir uşağın məktəbə getməsi üçün tək məktəbli forması tələb olunmur. Bunun çantası, ayaqqabısı, kitab-dəftəri də var. Aylarla iş axtaran, tək özü çalışan ailə başçıları var ki, onları əlavə xərcə salmaq, əziyyət vermək insanlıq üçün utancdır. Özü də düşünəndə ki, bunu təhsilin beşiyi olan məktəb başbilənləri edir, bu daha ağır gəlir insana. Belə olan halda məktəbli formasının dəyişilməsi yumşaq desək, sadəcə VİCDANSIZLIQDIR!Axı məktəbli formalarını hər il dəyişdirmək üçün bunların bəhanəsi nədir?. Sən demə məktəbli formasındakı rənglərdən biri, məsələn bu cür yox, başqa cür olmalıdır. Rənglərin nə önəmi var axı??? Gözəllik salonundan məktəb direktoru kreslosuna adlamış, pedaqoji işdən xəbəri olmayan, "koryerası" boyu təhsil əvəzinə manikürlüklə məşğul olmuş "direktor xanımlar" məktəbli formasını əməllicə alver, biznes işinə döndəriblər. Elə məktəblərin özlərini alverə döndərdikləri kimi. Təhsil Nazirliyini heçə sayan, özlərini feodal xanlar kimi aparan bu direktor sürüsü təhsili, pedaqoji işi, məktəbdəki nizam-intizam problemlərini qoyublar bir qırağa, düşüblər məktəbli formalarının üstünə. İmkansız valideynləri qısnayırlar ki, məktəb rəhbərliyi hansı formanı dedisə, onu da almalısan. NİYƏ???
Axı məktəb direktorlarına kim icazə verib ki, belə azğın feodal olmaq həvəsinə düşsünlər? Əlbəttdə məktəb direktorlarının belə əl-qol açmasında təhsil üzərindəki funksiyası sıfıra enən Təhsil Nazirliyinin də az "əməyi" yoxdur. Acı da olsa reallıq odur ki, təhsilin başını buraxan Nazirlik, bütün səlahiyyətləri verib məktəb direktorlarına. Hazırda orta məktəblərdə idarəçilik bu düsturla həyata keçirilir: məktəb direktorları- sinif rəhbərləri- qadın valideyn koordinatorlar. Məhz bu üçlük təhsilin içinə necə ... gül qoyublarsa, qoxusu bütün cəmiyyəti bürüyüb. Bu gün məktəbli forması ətrafında açıq alverə israr edən məktəb rəhbərliyi, tədris prosesi gələn kimi qadın valideynləri "işə" cəlb edir, yenicə parta arxasında əyləşən, hələ məktəb nədir bilməyən körpə fidanları ilk gündən təhsilin anasını ağladan repititor yanına sürükləyir, əlamətdar günlərdə müəllimləri təbrik etmək adı ilə pullar yığdırır, uşağın biliyinə görə deyil, məktəbə ödədiyi "şirinlik" məbləğinə görə qiymət yazılır. Biz heç cür düzəlmirik. əsrlər boyu işimizi rüşvətlə aşırmağa adət etdiyimiz kimi, ən strateji sahə olan təhsili də on illiklərdir rüşvət "yağında qaynadırıq".Təhsilin bu günə düşməsinə həm də öz uşağının həqiqi bilik almasındansa rüşvət verib ona "yüksək qiymətlər" yazdıran valideynlər səbəbkardırlar. Məhz bu cür valideynlərdir təhsilin "anasını ağladan", küt, savadsız nəsil yetişdirmək üçün müəllim adına, direktor adına yaraşmayan adamları rüşvətə boğan. Bir qrup belə valideynin ucbatından bu gün həttda məktəbli formaları da alver predmetinə çevrilib. Unutmayaq ki, bu gün alver və qazanc oyununa çevrilən məktəb formaları, həm də o formanı geyinib parta arxasında oturan uşaqların gələcək bədbəxtliyi üçün açılan cığırdır. Bu cığır ancaq savadsız, rüşvətxor, gələcəyi olmayan KÜTLƏ SÜRÜSÜ yetişdirir, başqa heç nə!
Mətləb Salahov
