Ali məktəbələrə qəbul imtahanının yaz sessiyası başa çatıb. Artıq iki ixtisas qrupu üzrə nəticələr bəllidir. Abituriyentlər arasında maksimum bal – 700 bal toplayan az saydadır. Hələlik digər ixtisas qrupları üzrə, eyni zamanda yay imtahanının nəticələri bəlli olmasa da, mütəxəssislər son illərdə maksimal bal toplayanların sayında kəskin azalma olduğunu bildirirlər. Buna səbəb kimi isə imtahan suallarının çətinləşdirildiyi iddia edilir.
Bəzi sualların orta məktəb dərsliklərində olmayan materiallardan yazıldığı iddiaları var. Habelə 3-cü qrup üzrə 6 iyulda keçirilən imtahanda test tapşırıqlarından birinin səhv olduğu haqda məlumat yayılıb. Bu haqda təhsil eksperti Sabir Əsədov öz Facebook səhifəsində ilginc məlumat açıqlayıb: “Dövlət İmtahan Mərkəzi 6 iyul tarixində keçirilmiş qəbul imtahanında ədəbiyyat fənni üzrə yenə bir şou göstərdi. Onsuz da müəyyən qədər psixoloji problemlərin çox olduğu bir dönəmdə ədəbiyyat kitablarını qarşısına qoyub cümlə-cümlə köçürməyə nə lüzum var ki? Üstəlik, əsərdəki bir faktı səhv köçürüb, sonra da onu düzgün cavab kimi göstərmək.
6 iyul 2022- ci il. 3-cü qrup üzrə sual kitabçası.
“A” variantında 86-cı test tapşırığı;
“B” variantında 86-cı test tapşırığı
“C” variantında 83-cü test tapşırığı
“D” variantında 85-ci test tapşırığı.
Açıq tipli test tapşırığıdır. C. Cabbarlı “Oqtay Eloğlu” faciəsi.
Əsərdə belədir: Xaspolat.( Oqtay Eloğlu haqqında): Türküstanda hökumət əleyhinə çalışdığı üçün Sibirə sürgün edilmişdir.
Sual kitabçasında: 2-ci bənddə: Türkmənistanda hökumət əleyhinə çalışdığı üçün Sibirə sürgün edilmişdir.
Və bu ikinci bənd, sırf 4 bəndlik cavab alınsın deyə, 1,2,4,5 kimi düzgün cavab götürülüb. Amma düzgün cavab 1,4,5-dir.
Mən həmişə bu cür yanaşmalardan və yazılardan kənar durmağa çalışmışam. Amma bu qədər də olmaz. Xahiş edirəm, dostlar da paylaşsın ki, bəlkə bu məsələyə rəsmi aydınlıq gətirilə və ədalət öz yerini tuta. “Oqtay Eloğlu” 1922-ci ildə yazılıb. O vaxt Türkmənistan adı keçərli idimi. Və ya əsərdəki bir faktı öz istədiyimiz kimi dəyişib doğru cavab kimi götürmək olarmı? Əgər bu texniki səhvdirsə, o zaman yenə rəsmi açıqlaması olmalıdır".
Qeyd edək ki, qəbul imtahanları ilə bağlı şikayətlərin sayı həddindən artıq çoxdur.
“Hər il suallar üç meyarla - asan, orta və çətin olmaqla hazırlanır, bu il də eyni prinsip tətbiq olunub”
Təhsil eksperti Nizami Hüseynov qeyd etdi ki, açıq tipli sualların cavablandırılması çətinlik doğurur. Bunun nəticəsində də maksimal nəticə toplayanların sayında azlıq var: “Ümumilikdə hansısa ildə sualların daha çətin, hansısa ildə daha asan olması yoxdur. Hər il suallar üç meyarla - asan, orta və çətin olmaqla hazırlanır. Bu il də eyni prinsip tətbiq olunub. Sadəcə abituriyentlərin pandemiya dövründəki çətinlikləri, distant təhsil və s. onların ümumi imtahan nəticələrinə təsir edib”.
Ekspert onu da əlavə etdi ki, elə il olur, suallar nisbətən yüngülləşdirilir, bəzən isə nisbətən çətinləşdirilir. Bu da plan məsələsi ilə bağlıdır. Problem ondan ibarətdir ki, Rusiya, Polşa, Ukrayna və digər ölkələrdə attestatla qəbul məsələsi var. Həmçinin orada ödənişlər bizdən xeyli aşağıdır. Ona görə də əksər məzunlar təhsil almaq üçün xaricə üz tutur ki, bu da insan kapitalının ölkəmizdən getməsi deməkdir.
Günel CƏLİLOVA
