Təbriz Musayev: “Birləşmiş Ştatlar regionda fəallığını artıracaq və iqtisadi layihələrə dəstəyini gücləndirəcək”
ABŞ Konqresi TRIPP üçün maliyyə vəsaiti ayırır. Belə ki, ABŞ Nümayəndələr Palatasının Təxsisatlar Komitəsi 2027-ci maliyyə ili üçün Daxili Təhlükəsizlik, Dövlət Departamenti və Əlaqəli Proqramların Səlahiyyətləndirilməsi Qanun Layihəsini qəbul edib.
Qanun layihəsi Cənubi Qafqaz ölkələrinə genişləndirilmiş maliyyə yardımını nəzərdə tutur.
Sənəddə Trampın Beynəlxalq Sülh və Rifaha Doğru Yolu (TRIPP) layihəsinin həyata keçirilməsinə toxunularaq deyilir: “Komitə ABŞ-ın Cənubi Qafqazda davamlı sülhün təşviqi, eləcə də region ölkələrinin təhlükəsizliyinin və rifahının gücləndirilməsi səylərini qətiyyətlə dəstəkləyir”.
Qanunun qəbulundan sonra ABŞ dövlət katibi 90 gün ərzində TRIPP proqramı çərçivəsində vəsaitlərin ayrılması və görülən tədbirlər barədə ətraflı hesabatı Konqresə təqdim etməlidir. Bu hesabatda investisiya maliyyələşdirməsi təmin edənlər də daxil olmaqla, icraçı tərəfdaşlar müəyyən edilməli və TRIPP proqramının qurulmasına, inkişafına və uğurlu fəaliyyətinə dəstək verməkdə İnkişaf Maliyyə Korporasiyası (DFC) və Ticarət və İnkişaf Agentliyi kimi digər müvafiq federal qurumların rolunu təsvir etmək lazımdır.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, bütün bunlar sözügedən layihənin Birləşmiş Ştatlar üçün nə qədər önəmli olduğunu ortaya qoyur: “Təkcə Zəngəzur dəhlizi deyil, ümumiyyətlə Cənubi Qafqazın ABŞ üçün önəmi, oynadığı rol artır. İranla müharibə başlayandan sonra müəyyən yanlış təsəvvürlər var idi ki, guya TRIPP gündəlikdən çıxıb və Vaşinqton buna önəm verməyəcək. Xüsusən də Rusiya mediasında bu, davamlı olaraq şişirdilirdi. Ancaq ABŞ Konqresinin gündəliyinə bunun daxil edilməsi göstərdi ki, təkcə prezident Donald Tramp bu layihənin tərəfdarı deyil. Ümumiyyətlə, ABŞ-ın strateji maraqları baxımından dəhliz önəmli iqtisadi və geosiyasi çəkiyə malikdir. Birincisi ona görə ki, Orta Dəhliz və onun vacib seqmenti olan Zəngəzur dəhlizi Rusiyadan yan keçir. İkincisi, bu, Birləşmiş Ştatların Mərkəzi Asiyada maraqlarının təmin edilməsi baxımından vacibdir. Çünki başda Azərbaycan olmaqla Cənubi Qafqaz burada açar rolunu oynayır. Təsadüfü deyil ki, hələ Baydenin prezidentliyi dövründən başlayaraq Orta Asiya ölkələri dövlət başçılarının Vaşinqtonda toplanması bir ənənə halını alıb. Mərkəzi Asiya ölkələri 3 tərəfdən ABŞ-a rəqib, o cümlədən düşmən olan ölkələrlə əhatə olunub. Ona görə də Birləşmiş Ştatların həmin regiona ən təhlükəsiz yolu Cənubi Qafqazdan keçir. Bu baxımdan güman edirəm ki, ABŞ regionda fəallığını artıracaq və iqtisadi layihələrə dəstəyini gücləndirəcək. Bu sırada nəqliyyat dəhlizlərinin vacib həlqələri ən ön sırada dayanır”.
Vidadi ORDAHALLI
