Bir müddət əvvəl Türkiyədə haqqında cinayət işi açılan bəzi deputatlarının toxunulmazlıq hüquqlarının qaldırılmasına dair Konstitusiya dəyişikliyinin qüvvəyə minməsindən sonra ifadə vermək üçün məhkəmələrə çağırılan kürdyönümlü Xalqların Demokratik Partiyasının (HDP) bəzi deputatları bu çağırışa əməl etməyib. Bunu əsas gətirən prokurorluq isə onların həbsinə qərar verib.
Baki-xeber.com xəbər verir ki, polis ilk olaraq HDP həmsədrləri Səlahəddin Dəmirtaş və Figen Yüksəkdağı həbs edib. S.Dəmirtaş polis tərəfindən Diyarbəkirdəki evində, F.Yüksəkdağ isə Ankaradakı evində saxlanılıb. HDP-li millət vəkili, partiya həmsədrinin müavini Süreyya Sirri Öndər də Ankarada tutulub.
Həbs qərarları terrorçuluq fəaliyyətinin istintaqı çərçivəsində Diyarbəkir Prokurorluğu tərəfindən verilib. Bildirilir ki, S.Dəmirtaş və F.Yüksəkdağ iyunda ifadələri alınması üçün Ankara Cümhuriyyət Baş Prokurorluğunun çağırışına məhəl qoymayıblar.
S.Dəmirtaş, F.Yüksəkdağ və Sırrı Sürəyya Öndərdən başqa, Türkiyə parlamentinin DHP üzvü olan 11 deputat da saxlanılıb. Onların arasında Ziya Pir, Ferhat Encü, Leyla Birlik, Selma Irmak, Abdullah Zeydan, İdris Baluken, Nursel Aydoğan və Gülser Yıldırım olduğu bildirilir. Haqqında həbs qərarı çıxarılan Faysal Sarıyıldız, Tuğba Hezer Öztürkün isə xaricdə olduğu xəbər verilir.
Məlumata görə, Türkiyə Böyük Millət Məclisinin vitse-spikeri Pərvin Buldan da həbs olunan HDP həmsədrləri və deputatları ilə birlikdə Ankarada saxlanılıb. O, PKK ilə əlaqəsi olmaqda şübhəli bilinir. P.Buldan 2013-cü ildə İmralı adasındakı həbsxanada ömürlük həbs cəzası çəkən PKK lideri Abdulla Ocalana baş çəkib.
Bundan başqa HDP-li deputat İmam Taşçinar da saxlanıb. O, mehmanxanada olarkən saxlanılıb.
Həbslər Ankara, Diyarbəkir, Mardin və digər şəhərlərdə keçirilib. Onların bəziləri haqda məhkəmə qərarı ilə həbs qətimkan tədbiri seçilib.
HDP PKK terror təşkilatını dəstəkləməkdə ittiham edilir.
Həbslərlə bağlı açıqlama verən ədliyyə naziri Bəkir Bozdağ deyib ki, saxlanılan millət vəkilləri hüquqa hörmətsizlik ediblər. Nazir bu çərçivədə HDP-dən olan deputatların bəzilərinin saxlandığını bildirib: "15 millət vəkili saxlanılıb".
B.Bozdağ qeyd edib ki, Türkiyə hüquqi dövlətdir, qanun qarşısında hamı bərabərdir: "Bərabərlikdən niyə narahatsınız ki? Məlum olduğu kimi, 20 may 2016-cı ildə deputatların toxunulmazlığı aradan qaldırılıb".
O əlavə edib ki, saxlanılan millət vəkilləri hüququn işləməsinə şərait yaratmayıblar, hüququ tanımayıblar: "Hüquqa hörmətsizlik ediblər. Belə bir vəziyyətdə qanun və hüquq hansı tədbirin görülməli olduğunu açıq şəkildə yazır".
Qeyd edək ki, millət vəkillərinin toxunulmazlıq hüquqlarının ləğv edilməsini nəzərdə tutan konstitusiya dəyişikliyi bu ilin may ayında, Türkiyə Böyük Millət Məclisində 376 səslə, referenduma ehtiyac qalmadan qəbul edilmişdi.
TAHİR
