Ukraynada prezident Viktor Yanukoviç devriləndən və qəzəbli adamlar onun dəbdəbəli malikanəsinə daxil olandan bəri ötən iki ildə ilk dəfə olaraq yeni hakimiyyət rəsmilərinin sərvəti açıqlanıb.
Baki-xeber.com xəbər verir ki, bu ilin martından bəri ölkənin siyasətçi və məmurları öz əmlakları barədə bəyannamə təqdim etməlidirlər. Bütün məmurlar oktyabrın 31-dək öz gəlirləri barədə məlumat verməliydilər. Yanlış məlumat verənə isə 2 il həbs cəzası nəzərdə tutulur. Ukraynanın Milli Antikorrupsiya Bürosu bəyannamələrin hamısını öz saytında dərc edib.
Ancaq açıqlanan bəyannamələrdən sonra bir çoxları təzələrin köhnələrdən heç də yaxşı olmadığını düşünməyə başlayıb. "The Guardian" yazır ki, bu siyasətçilərin arasında bahalı qol saatlarına, Fabergé yumurtalarına və silah kolleksiylarına sahib olanları da var. Bir siyasətçi hətta şəxsi kilsəsinin olduğunu bəyan edib. Lakin ən böyük şoku Ukrayna siyasətçilərinin bu qədər nağd pula malik olması yaradıb. Təqdim olunan bəyannamələrdən görünür ki, Ukrayna siyasətçiləri iri məbləğlərdə nağd pul saxlayırlar. Məsələn baş nazir Volodimir Qroysman 1, 2 milyon dollar və 460 min avro pulu olduğunu bəyan edib. Dövlət maliyyə xidmətinin rəhbəri Roman Nasirov isə bəyan edib ki, arvadı ilə birlikdə onların İsveçrə istehsalı olan saatları, brilyantları, xəz paltoları və 2 milyon dollar nağd pulları var. Başqa rəsmilər də yüz minlərlə dollar pullarının olduğunu bəyan ediblər. Müşahidəçilərdən bəziləri deyirlər ki, əgər Milli Bankın direktoru öz əmanətlərini dollarda saxlayırsa, əhalinin milli valyuta olan qrivnaya necə etimadı arta bilər?
Təhqiqatçılar deyir ki, kiminsə varlı olmasını başa düşmək olar, amma bir rəsminin 10 lüks qol saatına, 30 torpaq sahəsinə malik olması təəccüb doğurur.
Hazırkı prezident milyarder Petro Poroşenko bəyannamələrin açıqlanmasını "həqiqətən də tarixi açıqlıq və şəffaflıq hadisəsi" kimi qiymətləndirilib.
Qeyd edək ki, bir çoxları bəyannamədə standart maşın, mənzil, şirkət kimi əmlakla yanaşı, çox maraqlı əşyalar göstəriblər. Ali Radanın üzvü Sergey Melniçuk bəyannaməsində bir trilyon qrivna və ya 38 milyard dollara yaxın nağd pulu olduğunu yazıb. Deputatın illik maaşı 3 min dollardır. Melniçukun daxil olduğu deputat qrupunun mətbuat xidməti bunu "uğursuz zarafat" kimi qiymətləndirib. Deputat sonradan bəyannamədə düzəliş etməyə söz verib.
Qalmaqallı siyasətçi, Radikal Partiyanın sədri Oleq Lyaşkonun bəyan etdiyi əşyalar arasında yaba da var. Onun siyasi reklamlarında deyilir ki, o və birlikdə yaşadığı xanımı banklarda və nəğd formada bir milyon dollaradək pul saxlayır. Bundan başqa, onların 3 avtomobili (“Mercedes-Benz S 500L”, “Mazda CX-5”, “Toyota Land Cruiser”), xarici qızıl və gümüş sikkədən ibarət 5 kolleksiyası, "Breguet", "Ulysse Nardin", "Audemars Piguet", "Vacheron Constantin" markalı saatları var.
Onun partiyadaşı Andrei Lozovoysa öz bəyannaməsində "içində XIII əsrə aid müqəddəs nəşin olduğu xaçşəkilli enkolpion", XIX əsrə aid mebel, 8 rəsm əsəri, biri XVI əsrə aid, 73 ikonadan, və XI-XX əsrlərə aid 32 soyuq silahdan ibarət kolleksiya bəyan edib. Bəyannaməyə əsasən, onun 200 min dollar nağd pulu da var.
Daxili işlər naziri Arsen Avakov isə avtomobil bəyan etməyib. Əvəzində bunları göstərib: - şəkil və qravürlər kolleksiyası (78 ədəddən çox); - 760 şüşə "Mouton-Rothchild" şərabı və etiketi; - XIX - XX əsrlərə aid 7 ədəd soyuq silahdan ibarət kolleksiya; - video və səs yazısı kolleksiyası (5 minədək disk, kaset, val, lent); - XVIII-XXI əsrə aid 8 min nüsxədən ibarət kitabxana; - "Chateau Lafite-Rothschild" şərabının kolleksiyası; - xəz, cəvahirat və başqa qiymətli əşyalar.
"Müxalifət blokundan" deputat Nestor Şufriç öz bəyannaməsində 9 mənzil, 3 avtomobil və 9 milyon dollar nağd pulla yanaşı, bunları göstərib: – rəsm əsərləri kolleksiyası (287 ədəd); – qədim çini qablar (121 ədəd); – 17 saat; –156 ədəd odlu silahdan ibarət kolleksiya; – 578 ədəd,əsasən, qədim soyuq silahdan ibarət kolleksiya; – əntiq bürünc heykəl və daş saat kolleksiyası (37 ədəd); – heraldika (herblər) kolleksiyası (438 ədəd); – 51 qədim ikona və 71 qədim kitab.
Deputat Oles Dovgiy qaynanasına olan 888 min qrivna (35 min dollara yaxın) borcunu bəyan edib. O bu pula "Lexus LS 460" avtomobili alıb. Onun bəyannaməsində onlarla rəsm əsəri və bir neçə heykəl də var.
Dneprin icra başçısı Boris Filatov öz bəyannaməsində yapon incəsənətinə aid və toplam dəyəri 6,4 milyon dollara yaxın əşyalardan (618 ədəd) ibarət kolleksiyanı qeyd edib. Bəyannamədə onun 2009-cu ildə "Virgin" şirkətindən aldığı kosmosa bilet də göstərilib.
Kiyev meri Vitali Kliçko isə öz bəyannaməsində 7 velosiped, "FineCustomPuncher" markalı motosiklet, ağ rəngli "Yamaha" royalı və tanınmış markalardan olan saatları qeyd edib. Klichko-nun özünün avtomobili yoxdur, ancaq arvadının "Toyota Sequoia" və "Land Rover Discovery 3.0" tipli iki avtomobili var.
Ölkə prezidenti Petro Poroşenko bank hesablarındakı 27 milyon dolları, 104 şirkəti, bir neçə torpaq sahəsini, bir neçə bina və mənzili bəyan edib. Prezidentin "Patek Phillip" və iki ədəd "Hublot" qol saatı, XIX - XX əsrlərə aid rəsm əsərləri kolleksiyası (65 ədəd), XIX - XX əsrə aid heykəl kolleksiyası (6 ədəd), royalı, çantaları və mebeli var.
"Petro Poroshenkonun bloku" parlament fraksiyası sədrinin müavini Anatoli Matvienko öz bəyannaməsində Vinnisk vilayətində bir kilsəsinin olduğunu göstərib. Onun bir neçə torpaq sahəsi, iki avtomobili və dörd mənzili də var.
"The Guardian" yazır ki, orta əməkhaqqının aya 300 dollar olduğu bir ölkədə bu bəyannamələr yalnız siyasi elita ilə əsasən yoxsul ukraynalılar arasındakı uçurumun dərinliyini göstərir. Qeyd edilir ki, bəyannamələrin əsl dəyəri hakimiyyət orqanları bu sənədləri lazımınca araşdırmağa başlayanda bilinəcək.
"The Guardian" yazır ki, 2014-c ildə baş vermiş Maydan inqilabının əsas tələblərindın biri də ölkəni bürümüş korrupsiya ilə mübarizə idi. Etriazçılar Yanukoviçin malikanəsinə daxil olanda orada qızıl suyuna çəkilmiş qolf çubuqları, kiçik zoopark və süni göldə lövbərlənmiş İspan qaleonu tapmışdılar.
Prezident Poroşenko milyarder maqnat olsa da, daha şəffaf siyasət vəd edib. Müşahidəçilər isə bildirirlər ki, islahatlar ləng gedir, hökumət isə Ukrayna biznesi və siyasətinin simasını dəyişə bilməyib.
