Noyabrın 8-də ABŞ-da keçiriləcək prezident seçkilərinədək Federal Ehtiyatlar Sistemi (FED) pul-kredit siyasətini dəyişməyə bilər. "APA-Economics" xəbər verir ki, bunu Filadelfiya Federal Ehtiyat Bankının prezidentinin Patrik Harker bildirib.
Eyni zamanda P. Harkerin sözlərinə görə, ABŞ iqtisadiyyatı "heç də pis təsir bağışlamır" və əmək bazarı stabildir.
Maraqlıdır ki, FED rəsmiləri adətən seçki prosesindən kənarda qalmağa çalışır. Bu baxımdan P. Harkerin açıqlaması təəccüb doğurmaya bilməz. Ekspertlərin sözlərinə görə, P. Harkerin "qəribə etirafı" onu deməyə əsas verir ki, FED öz siyasətini yeni prezidentin kimliyindən asılı olaraq quracaq.
Düzdür, P. Harker bu il FED-in toplantılarında səsvermə hüququna malik deyil və yalnız 2017-ci ildə bu hüququ əldə edəcək. Daha bir maraqlı məqam ondan ibarətdir ki, P. Harker 1-2 noyabr tarixlərində baş tutacaq FED-in toplantısında müzakirələrdə iştirak edəcək.
İnvestorlar isə prezident seçkilərindən öncə uçot dərəcəsinin artırılacağına inanmır.
"Faiz dərəcələrini gözləniləndən daha tez bir vaxtda artırmaq məcburiyyətində qala bilərik". Bunu isə Boston Federal Ehtiyat Bankının prezidenti Erik Rozenqren (Eric Rosengren) CNBC telekanalına müsahibəsində deyib.
Onun sözlərinə görə, FED-in uzun müddət gözləmə mövqeyində olması faiz dərəcələrində daha kəskin yüksəlişə səbəb ola bilər: "İqtisadiyyat tam məşğulluq və inflyasiya hədəfinə yaxınlaşıb və faizlər artırılmalıdır. Dekabrda faiz dərəcələrinin artırılması daha münasibdir".
E. Rozenqren Federal Ehtiyatlar Sisteminin (FED) toplantılarında səsvermə hüququna malikdir.
Qeyd edək ki, FED-in növbəti iclası noyabrın 2-3-də baş tutacaq.
Əlavə edək ki, investorlar bu gün ABŞ-da pərakəndə satışlarla bağlı açıqlanan statistikanı və Federal Ehtiyatlar Sisteminin (FED) rəhbəri Canet Yellenin və Boston Federal Ehtiyat Bankının prezidenti Erik Rozenqrenin açıqlamalarına köklənib. Statistika artıq açıqlanıb. Analitiklərin proqnozlaşdırdığı kimi, pərakəndə satışlar sentyabr ayında 0,6% artıb.
Statistika açıqlanandan sonra diqqətlər C. Yellen və E. Rozeqrenə yönəlib.
Açıqlanan statistika və E. Rozenqrenin açıqlamaları dolların məzənnəsinə müsbət təsir edəcəyi şübhəsizdir.
