Səudiyyə Ərəbistanı və Qətər İŞİD-ə dəstək verir və ABŞ rəhbərliyinin də bundan xəbəri var. Baki-xeber.com xəbər verir ki, bu barədə "Wikileaks" tərəfindən sızdırılan yeni yazışmalarda bildirilir.
ABŞ-da demokratların prezidentliyə namizədi Hillari Klinton və onun seçki kampaniyasının başçısı Con Podestanın yazışmalarına görə, Klinton Səudiyyə Ərəbistanı və Qətərin Yaxın Şərqdə İŞİD və digər sünni radikal təşkilatlara maliyyə və maddi-texniki dəstək verdiyini düşünür.
Klintonun Podestaya yazdığı 17 avqust 2014-ci il tarixli bir məktubda deyilir: "...Diplomatik və daha ənənəvi kəşfiyyat təşkilatları üzərindən İŞİD-ə və bölgədəki digər sünni radikal qruplara gizli dəstək verən Qətər və Səudiyyə Ərəbistanı hökumətlərinə təzyiqi artırmalıyıq".
Klinton, həmçinin, Səudiyyə Ərəbistanı və Qətərin sünni dünyasında ambisiyaları ilə ABŞ-ın təzyiqi arasında seçim qarşısında qoyulmalı olduğunu deyir. Sənəddə İraqda İŞİD-lə döyüşdə peşmərgə və İraq ordusu daxilindəki etibarlı qruplardan istifadə edilməsinin vacibliyi də yer alır.
"The İndependent" qeyd edir ki, şərhçilər Klintonun sızdırılmış emaillərinin demokrat namizədin öz xarici siyasətində nə dərəcədə qeyri-ardıcıl olduğunu nümayiş etdirdiyini yazırlar.
Açıqlanmış emaillərin bir qismi 2014-cü ilin avqustuna aiddir. O vaxt xanım Klinton köməkçisi Podestaya 8 bənddən ibarət planını göndərmişdi. Bu həmin vaxtlar idi ki, prezident Barak Obama İŞİD-in məhv edilməsi üçün strategiyasını açıqlayırdı. Bu strategiyaya görə, İŞİD-in darmadağın edilməsində həm Suriya, həm də İraq kürdləri iştirak etməli idi. İndi isə bəlli olur ki, Obama administrasiyasının strategiyası Klintonun 8 bəndlik planı ilə eyni olub.
Bu emaillərin göndərildiyi tarixlərdə ABŞ körfəz ölkələrini özünün İŞİD-lə mübarizəsində müttəfiqi sayırdı.
Səudiyyə Ərəbistanı və Qətər hökumətləri İŞİD-ə dəstək verdikləri barədə iddiaları rədd etsələr də, tənqidçilər onların Bəşər Əsədin ələvi hökumətini ümumi düşmən saydıqlarına diqqət çəkirlər.
"The İndependent" yazır ki, "Wikileaks"ın açıqladığı Podesta emaillərinin sızdırılmasında demokratların milli konventinin serverlərinə haker hücumlarının əsas rol oynadığı söylənir. Bu isə belə bir şübhələr yaradır ki, Rusiya hökuməti ABŞ-da noyabr ayında keçiriləcək seçkilərə müdaxilə məqsədilə "Wikileaks" saytından alət kimi istifadə edib. Obama administrasiyası isə bildirib ki, "Wikileaks" saytının yeni açıqlamaları Rusiyanın motivlərilə üst-üstə düşür.
Onu da qeyd edək ki, bir müddət əvvəl saytın banisi Culian Assanj iddia etmişdi ki, onun ixtiyarında olan 50 min Podesta emaili hazırkı seçki kampaniyasının bir sıra qaranlıq məqamlarına işıq salır.
Bir müddət əvvəl İngiltərə Xarici İşlər Nazirliyinin nümayəndəsi Dan Chugg Körfəz ölkələrindəki kral ailələrinin radikal qrupları maliyyələşdirdiyini deyərək, bunun qarşısını almaq üçün bölgədəki ölkələri qanuni addımlar atmağa çağırmışdı.
"Əl Qaidə"yə də uzun illər maliyyə dəstəyi verdiyi iddia edilən Səudiyyə Ərəbistanının eyni zamanda Kosovodakı radikal islamçı təşkilatlara də dəstək verdiyi bildirilir.
TAHİR
