Özbəkistan Nazirlər Kabineti prezident İslam Kərimovun vəziyyətinin ağırlaşması barədə xəbər yayıb. Baki-xeber.com gazeta.ru-ya istinadən bildirir ki, bəyanatda, həmçinin, onun bir neçə gün öncə insult keçirdiyi də təsdiq olunur. Nazirlər Kabinetinin açıqlamasında deyilir: "Çox təəssüflə bildiririk ki, ötən sutka ərzində prezidentimizin səhhəti qəfil pisləşib, həkimlərin fikrincə, onun vəziyyəti kritikdir".
Ancaq bu xəbərdən sonra "Reuters" agentliyi Özbəkistan prezidenti İslam Kərimovun vəfat etdiyi barədə məlumat yayıb. Agentlik 3 mənbəyə istinadən İ.Kərimovun artıq öldüyünü yazıb.
Bu arada "TRT Haber"in məlumata görə, Türkiyədə 65-ci hökumətin 100 günü ilə bağlı iclasda baş nazir Binəli Yıldırım Özbəkistan prezidenti İslam Kərimovun ölümü ilə bağlı başsağlığı verib. "Özbəkistan prezidenti ölüb. Allah rəhmət eləsin. Türkiyə Cumhuriyyəti adından Özbəkistan xalqına dərin hüznlə başsağlığı verirəm", - deyə o bildirib.
Baş nazir bu barədə məlumatı haradan aldığını açıqlamayıb.
Qeyd edək ki, hökumətin iclası bir sıra telekanallarda canlı yayımlanıb.
Kremlin sözçüsü Dmitri Peskov isə bildirib ki, Kremldə Özbəkistan prezidenti İslam Kərimovun sağlamlıq durumu ilə bağlı xəbər yoxdur: "Hələlik heç bir məlumatımız yoxdur. Mənbələrin xəbərlərinə istiqamətlənməyi düzgün hesab etmirik. Fikrimizcə, yalnız Daşkənddən daxil olan rəsmi məlumat birinci mənbə hesab oluna bilər".
Maraqlıdır ki, belə bir vaxtda Özbəkistan prezidentinin doğulduğu torpaqda - Səmərqənddə dəfninə hazırlıq görüldüyü barədə xəbərlər yayılıb. Yerli "ferqana.ru" saytının bununla bağlı yaydığı xəbərdə deyilir ki, İslam Kərimov tarixi Şahi-Zində memarlıq abidəsinə bitişik Səmərqənd qəbiristanlığında anası və qardaşları ilə bir sırada torpağa tapşırılacaq.
Lakin hazırlıqlar getsə də, prezidentin ölümü rəsmən elan olunmayıb. Portal onu da xəbər verir ki, artıq 78 yaşlı mərhumun nəşi xüsusi təyyarə ilə Daşkənddən Səmərqəndə yola salınıb. Bu ərəfədə ABŞ mülki aviasiya xidməti də diqqətçəkən xəbər yayıb. Xəbərdə bildirilir ki, Səmərqənd aeroportu sentyabrın 3-də bütün uçuşlara qapalı olacağına dair bəyanat yayıb. Qurumun saytında bildirilir ki, sentyabrın 2-nə icazələrin hamısı ləğv olunub.
"İnterfaks"ın xəbərinə görə, "Associated Press" agenliyi isə Qırğızıstandakı diplomatik mənbəyə istinadən bu ölkənin baş nazirinin Özbəkistan prezidentinin dəfninə gələcəyini bildirib. Eyni zamanda Əfqanıstandan olan bir məmur Əfqanıstan prezidentinin dəfn mərasiminə dəvət olunduğunu və bu məqsədlə Özbəkistana gedəcəyini açıqlayıb. "Ferqana.ru" saytı isə daha öncə bildirmişdi ki, sentyabrın 2-3-də matəm tədbirlərinə MDB məkanının bir çox ölkə rəhbərlərinin gəlişi gözlənir.
Gün ərzində bir sıra saytlar İslam Kərimovun dünyasını dəyişdiyi barədə xəbər yaydı və ortada rəsmi açıqlama (!) olduğunu bildirdilər. Özbəkistan Nvzirlər Kabineti isə dərhal duruma müdaxilə edərək xəbərin yalan olduğunu bəyan etdi...
Günün sonunda isə İslam Kərimovun 78 yaşında vəfat etdiyi rəsmən açıqlanıb. Özbəkistan hökuməti və parlamentinin yaydığı rəsmi məlumatda deyilir ki, İslam Kərimovun dəfn mərasimi sentyabrın 3-də Səmərqənddə baş tutacaq. Prezidentin vəfatı ilə əlaqədar ölkədə 3 günlük matəm elan ediləcək.
Xatırladaq ki, 78 yaşlı Özbəkistan prezidenti İslam Kərimovun insult keçirməsi və xəstəxanaya qaldırılması ilə bağlı "ferqana.ru" saytı hələ avqustun 29-da xəbər yaymışdı. Avqustun 30-da isə sözügedən sayt prezidentin ölüm xəbərini yaydı. Lakin, saytın israrla doğru olduğunu bildirməsinə baxmayaraq, xəbər rəsmi təsdiqini tapmadı.
İslam Abduqəni oğlu Kərimov 1938-ci ildə Səmərqənddə doğulub. 1989-cu ildə Özbəkistan Kommunist Partiyası Mərkəzi Komitəsinin 1-ci katibi seçilib, sonra Özbəkistan SSR-in, SSRİ dağıldıqdan sonra isə müstəqil Özbəkistanın prezidenti olub.
