"Sanksiyalar Rusiya iqtisadiyyatına öz təsirini göstərir"
Almaniyanın xarici işlər naziri Frank-Valter Ştaynmayer G7-nin ("Böyük yeddilik") Rusiya ilə münasibətlərinə dair yeni təkliflə çıxış edib. Nazir bu haqda "Redaktions Netzwerk Deutschland" saytına müsahibəsində deyib: "Suriya və Ukraynada münaqişələrin davam etməsinə baxmayaraq, biz dünyanın ən böyük iqtisadiyyatlarının daxil olduğu klubumuzdan Rusiyanı kənarda saxlamağa maraqlı deyilik".
Moskva ilə danışıqlar aparmağın çətin olduğunu vurğulayan Ştaynmayer, bununla belə, itirilmiş etibarın bərpasında maraqlı olduqlarını dilə gətirib. O əlavə edib ki, indiki "yeddilik" (G7) Suriya və Ukraynanın şərqindəki böhranların nizama salınmasında əhəmiyyətli irəliləyiş əldə olunduqdan sonra Moskva ilə söhbətə hazır olacaq.
Bu arada Rusiya xarici işlər naziri Sergey Lavrov Avropa İttifaqı və ABŞ-la münasibətləri bərpa etməyə hazır olduqlarını bildirib. XİN başçısı bu barədə Moskva Dövlət Beynəlxalq Əlaqələr İnstitutunun tələbələri qarşısında çıxışı zamanı deyib: "Biz heç kimə üz çevirmək fikrində deyilik. Aİ və ABŞ-la normal, hərtərəfli münasibətləri bərpa etməyə hazırıq. Amma yalnız bərabərlik əsasında".
O da məlumdur ki, Rusiya iddialarından geri çəkilmədikcə, sanksiyalar dəyişməyəcək. "Böyük yeddilər"in Rusiyadan üç əsas tələbi var: Ukraynanın ərazi bütövlüyünü əməldə tanımaq, separatçılara canlı və texniki dəstək verməmək və Krımın işğalına son qoymaq. Ancaq müşahidələr göstərir ki, Rusiyanın yaxın perspektivdə bu məsələlərdə güzəştə gedəcəyi gözlənilmir. Maraqlıdır, bəs politoloqlar bunu necə dəyərləndirir? Politoloq Zərdüşt Əlizadənin fikrincə, Rusiyanın həmin qurumun üzvü olması ABŞ-dan asılıdır: "Bundan əvvəl Macarıstan, İtaliya, Fransa da demişdi ki, sanksiyalar aradan qaldırılsın. Amma bu dövlətlərin də rəyi nəzərə alınmadı. Sanksiya barədə qərarı dünyanın ağası Birləşmiş Ştatlar verib və asılı Avropa, Yaponiya və başqaları bunu müti şəkildə icra etməlidir. Ona görə də Rusiyanın G7-ə qayıtması ABŞ-dan asılıdır. Ancaq o da var ki, sanksiyalar Rusiya iqtisadiyyatına öz təsirini göstərir. Məsələn, ərazisində vətəndaş müharibəsi gedən, ərazi itirmiş Ukrayna qədər ərazi itirməyən, hətta qazanan Rusiyanın da iqtisadiyyatı dərin böhran keçirir. Ümumdaxili məhsulu azalıb, artım yoxdur, işsizlik artır, camaat iki dəfə kasıblayıb. İşıq ucu da görünmür. Mövcud üsul-idarə ilə Rusiya böhrandan çıxmağa qadir deyil. Rusiyanın görkəmli siyasətşünaslarının, ziyalılarının, iqtisadçılarının yazdıqlarını oxuduqda onların hamısının Rusiyanın süquta doğru getdiyini açıq-aydın vurğuladığını görmək olur. Rusiyanın dövlət kimi axırı yoxdur. Çünki bu hakimiyyət Rusiyanı ağ günə çıxara bilməyəcək".
Vidadi ORDAHALLI
