"Hesab edirəm ki, bununla Avropanı heç bir fəlakət gözləmir"
Fransanın xarici ticarət naziri Matthias Fekl bildirib ki, ölkəsi Avropa Birliyi ilə ABŞ arasında böyük ticarət sazişilə bağlı danışıqların bitirilməsini istəyir və Avropa Komissiyasına belə bir çağırış edəcək. Fekl avqustun 30-da RMC radiosuna deyib ki, "artıq Fransada bu danışıqlara siyasi dəstək yoxdur". Nazir deyir ki, Transatlantik Ticarət və İnvestisiya Tərəfdaşlığı (TTIP) üzrə danışıqlar yeni raund başlamadan dayandırılmalıdır.
ABŞ-ın ticarət məsələləri üzrə təmsilçisi Michael Fromanın sözçüsü avqustun 30-da Almaniyanın "Der Spiegel" jurnalına bildirib ki, danışıqlarda "ciddi irəliləyiş" əldə olunub.
Amma Almaniyanın xarici işlər naziri Frank-Valter Ştaynmayer də AB ilə ABŞ-ın razılaşmadan hələ xeyli uzaq olduğunu söyləyib.
Almaniya rəsmiləri danışıqların faktiki olaraq iflasa uğradığını, amma heç kəsin bunu etiraf etmədiyini bildirib. Göründüyü kimi, artıq Avropanın iki ən böyük ölkəsi bu ideyanı dəstəkləmir. Bu qərardan sonra Avropanı nə gözləyir?
Politoloq Qabil Hüseynli qəzetimizə açıqlamasında bildirdi ki, TTIP-in gələcəyinə böyük ümidlər bəslənirdi: "Bu ideya reallaşsaydı, dünyanın ən böyük azad iqtisadi zonası olacaqdı. Avropa bəzən kənardan monolit görünür. Prinsipial məsələlərlə bağlı Avropanın böyük ölkələri arasında ciddi fikir ayrılıqları mövcuddur. Avropa ilə ABŞ daha çox NATO çərçivəsində böyük əməkdaşlıq edib. Bu da vaxtilə SSRİ, daha sonra isə Rusiya amilinə görə olub. Fransa ilə Almaniya Avropanın özəyini təşkil edən ölkələrdir və iqtisadiyyatları yüksək templə inkişaf edir. Ümumdaxili məhsulun həcminə görə digər ölkələri üstələyirlər. Bu baxımdan da onlar Avropa Birliyinə daxil olan ölkələrin bir çoxunu özləri üçün yük hesab edir. Bu iki ölkənin tarixi maraqları hər zaman ümdə olub. Onlar özlərinə imperiya varisləri kimi baxır. Bunu açıq edə bilməsələr də, gizlində belə siyasət yürüdürlər. Bu ölkələr ABŞ-ın Avropada güclənməsində deyil, zəifləməsində maraqlıdır. Yəqin ki, perspektivdə həmin ideyanın onların ziyanına olacağını hesablayıblar. Bilirsiniz ki, dünyanın idarə olunmasında böyük maraqları olan ölkələr heç vaxt düşünülməmiş addım atmır. İki ölkənin birlikdə belə qərara gəlməsi ideyanın reallaşmayacağından xəbər verə bilər. Hesab edirəm ki, bununla Avropanı heç bir fəlakət gözləmir".
Məhəmmədəli QƏRİBLİ
