Türkiyənin ana müxalifət lideri, Cümhuriyyət Xalq Partiyasının (CHP) sədri Kamal Kılıçdaroğlunun avtomobil karvanı Artvin vilayəti ərazisində hərəkət edərkən polislə terrorçular arasındakı atışmanın ortasında qalıb.
APA-nın "Hürriyet"ə istinadən verdiyi məlumata görə, K. Kılıçdaroğlu bu gün əvvəlcə təyyarə ilə Qars şəhərinə, oradan isə avtomobillə Gürcüstanla həmsərhəd Artvinə gedib. O, Artvin vilayətinin Şavşat şəhərinin mərkəzində toplaşan tərərfdarları qarşısında çıxış edib. Sonra Artvin şəhərinə yola düşən müxalifət liderinin avtomobil karvanının hərəkəti vilayətin Ardanuç rayonunun Yanıklı kəndi yaxınlığında polislər tərəfindən dayandırılıb. Yol kənarında barrikada qurulduğunu müəyyən edən polis orada terrorçuların gizləndiyini ehtimal edərək həmin nöqtəni atəşə tutub. K. Kılıçdaroğlunun avtomobili isə mühafizə məqsədilə əhatəyə alınıb, sonra ərazidən uzaqlaşdırılıb.
K. Kılıçdaroğlunun müşavirlərindən biri hadisənin müxalifət liderinə hücum olmadığını və avtomobil karvanının hərəkət etdiyi ərazidə təhlükəsizlik qüvvələri ilə terrorçular arasında atışma baş verdiyini söyləyib. Lakin başqa bir məlumata görə, naməlum terrorçular K. Kılıçdaroğluna hücum planlaşdırıb.
Məlumata görə, terrorçular Kamal Kılıçdaroğlunun avtomobil karvanını qumbaraatanla atəşə tutmaq istəyib.
Hadisə yerinə gələn təhlükəsizlik qüvvələri K. Kılıçdaroğlunu zirehli texnikaya əyləşdirərək onu ərazidən uzaqlaşdırıblar. Terrorçularla atışmada 3 əsgər yaralanıb, onlardan birinin durumu ağırdır.
Türkiyə prezidenti Rəcəb Tayyib Ərdoğan olaydan bir qədər sonra Kamal Kılıçdaroğluna telefon açaraq onunla danışıb.
K. Kılıçdaroğlu “CNN Türk”ə açıqlamasında durumunun normal olduğunu bildirib: “Biz yola çıxarkən polis yolda atışma olduğuna dair hər hansı xəbərdarlıq etmədi. Güman edirəm ki, atışma biz oradan keçərkən başlayıb. Avtomobildən düşməyimizə icazə verilmədiyi üçün tam olaraq nə baş verdiyini anlamadıq. Sonra zirehli maşınla oradan uzaqlaşdırıldıq. Təhlükəsizlik qüvvələri sürətlə lazımi tədbirləri gördülər. Hər hansı problemimiz yoxdur. Təhlükəsiz şəraitdəyik”.
Qeyd edək ki, terrorçuların PKK mənsubları olduğu güman edilir. PKK son aylarda Türkiyənin Qara dəniz vilayətlərində də fəallaşıb.
Türkiyənin daxili işlər naziri Əfqan Ala bildirib ki, Türkiyənin Artvin vilayətinin Şavşat şəhərindən Ardanuç qəsəbəsinə gedən yolda, Yanıklı kəndi yaxınlığında hücumun hədəfi Cümhuriyyət Xalq Partiyasının sədri Kamal Kılıcdaroğlunun maşın karvanı olub. Ə. Ala deyib ki, PKK terrorçuları maşın karvanını müşayiət edən və karvanın önündə gedən hərbçilərin olduğu avtomobil atəşə tutulub. Nəticədə avtomobilin sürücüsü olan hərbçi başından ağır, maşındakı 2 hərbçi isə yüngül yaralanıb. Daxili işlər naziri deyib ki, PKK terrorçuları Orduda, Girəsunda Qara dəniz bölgəsinə çıxmağa səy göstərirlər: “Bölgədə xüsusi əməliyyat aparılır. İnşallah, bu hücumu təşkil edənlər yaxalanacaq”.
Ə. Ala CHP sədrinin səfərini planlaşdırdığı kimi davam etməsi üçün vertolyot da göndərdiklərini qeyd edib.
Türkiyə hökuməti isə CHP lideri Kamal Kılıçdaroğlunun maşın karvanına edilən hücumu pisləyir. Trend-in TRT Haber telekanalına istinadən verdiyi məlumata görə, bunu Türkiyə Baş nazirinin müavini Numan Kurtulmuş deyib.
