Rusiyada yeraltı dünyasının əsas adamlarından sayılan, mediada da adı tez-tez çəkilən Zahari Kalaşov həbs edilib. "Şakro Molodoy” ləqəbilə tanınan 63 yaşlı Kalaşovun polisin keçirdiyi əməliyyatla Moskva yaxınlığında lüks malikanəsində tutulduğu bildirilir. Onun barəsində avqustun 15-dək həbs-qətimkan tədbiri seçilib.
Baki-xeber.com xəbər verir ki, "İzvestiya” qəzeti, "Şakro Molodoy"un Moskvada "Element" adlı bir Koreya restoranı ilə bağlı yaranmış 30 min dollarlıq mübahisədə iki nəfərin öldürülməsi hadisəsində barmağı olduğu iddiası ilə həbs edildiyini yazır.
Bir müddət əvvəl Rusiya mətbuatı yazırdı ki, uzun illər İspaniyada həbsdə yatan, sonradan Rusiyaya dönən "Şakro Molodoy” keçən il öldürülən yaxın dostu və ortağı "Ded Hasan"ın (Aslan Usoyan) yerini alıb.
"Argument fakt” qəzetində yer alan məlumatlara görə, 1953-cü ildə Tiflisdə doğulan yezidi kürd kökənli Zahari Kalaşov 2006-ci ildə İspaniyada çirkli pul yumaq və digər bəzi cinayətlərə görə 7 il həbsdə olduqdan sonra, Rusiyaya gəlib.
Qəzet yazır ki, o dövrdə ittihamnaməni hazırlayan prokuror Jose Qrinda Kalaşovun Rusiya hərbi kəşfiyyat təşkilatının təlimatı ilə PKK-ya silah satdığı iddiasını ortaya atıb.
2004-cü ildə "Hürriyet' qəzeti yazırdı: "İspaniyadakı Rusiya mafyası ilə bağlı araşdırma aparan İspaniya baş prokuroru Jose Qonzalesə görə, Rusiya dövləti, vaxtilə hərbi kəşfiyyat xidmətinə işləyən rus-gürcü mafiyasının lideri Zahari Kalaşov vasitəsilə PKK-ya silah satıb. Boris Yeltsin dövründə (10 iyul 1991 - 31 dekabr 1999) həyata keçirilən bu satış, əvvəllər də gündəmə gəlib, ancaq heç vaxt mövzunu bu qədər dərindən bilən biri tərəfindən təsdiqlənməmişdi. Hazırda İspaniyada həbs yatan "Şakro" ləqəbli Kalaşov, bu məlumatları verən baş prokuror Qonzales tərəfindən dindirilib”.
"WikiLeaks” sənədlərində də PKK-nın silahlandırılmasında Zahari Kalaşovun xüsusi rolu olduğu bildirilirdi. Londonda öldürülən keçmiş Rusiya kəşfiyyat agenti Aleksandr Litvinenko da Kalaşovun PKK-ya silah satdığını iddia etmişdi.
Məlumatlara görə, Kalaşov, Gürcüstanda 2003-ci ildə hakimiyyət dəyişikliyindən sonra İspaniyaya köçüb. İspaniyada silah ticarəti və Rusiya mafiyasının çirkli pullarının yuyulmasına rəhbərlik edib. 2005-ci ildə İspaniya təhlükəsizlik qüvvələri "Eşşək arısı" kod adı ilə Rusiya mafiyasına qarşı xüsusi əməliyyat keçirib. Həmin vaxt bir çox rus mafiya lideri ələ keçirilsə də, Kalaşov İspaniyadan qaçmağı bacarıb. 2006-ci ildə İnterpol vasitəsilə Birləşmiş Ərəb Əmirliklərində keçirilən ikinci əməliyyatla Zahari Kalaşov ələ keçirilib və İspaniyaya ekstradisiya edilib. Kalaşov burada 7 il həbs cəzasına məhkum edilib.
"Novaya Gazeta”, "Şakro Molody"un şıxsi sərvətinin 200 milyon dollara yaxın olduğunu yazır.
Rusiya Daxili İşlər Nazirliyinin mafiya başçısının saxlanması ilə bağlı görüntülər də yayıb.
