Almaniyanın Xristian Demokrat Partiyasının (CDU/CSU) parlament qrupunun lideri, alman mərkəz-sağçı siyasətçi Yens Spahn ikili standartlara görə tənqid olunub: o, “əri” ilə birlikdə (Spahn Daniel Funke ilə eyni cinsli nikahdadır) ABŞ-da surroqat anadan istifadə edərək övlad sahibi olduqlarını açıqlayıb.
Maraqlıdır ki, Almaniyada surroqat analıq qadağandır və Spahnın partiyası bu qadağanı dəstəkləyir. Hətta bir neçə il əvvəl o özü surroqat analığa qarşı çıxıb.
Nəticədə siyasətçi hakim koalisiyanın bir hissəsi olan CDU/CSU parlament qrupunun lideri vəzifəsindən istefa verib.
Əslində siyasətçi qanunu pozmuş sayılmır: surroqat anadan doğulan uşağı Almaniya xaricində böyütmək qadağan deyil. Buna baxmayaraq, Spahn, o cümlədən, öz partiyasının üzvləri tərəfindən tənqidlərlə üzləşib.
Şənbə günü yayımlanan açıqlamada Spahn yazıb: "Şəxsi xoşbəxtliyimin - ailəmi ərimlə davam etdirmək və ata olmağın siyasi vəzifəmlə uyğunsuz olduğunu anladım".
Xristian Demokrat İttifaqının rəhbəri kansler Fridrix Merz onun qərarını "düzgün" və "qaçılmaz" adlandırıb.
46 yaşlı Jens Spahn və “əri” Daniel Funke çərşənbə günü ailələrində artım olduğunu elan ediblər.
1990-cı il Embrionların Qorunması Qanununa əsasən, Almaniyada surroqatlıq üç ilə qədər həbs cəzası və ya cərimə ilə cəzalandırılır. Buna görə də, həm eyni cinsli, həm də heteroseksual olan bir çox alman cütlük xaricdəki surroqat anaların köməyinə müraciət edir.
2020-ci ildə Səhiyyə naziri olan Spahn Almaniyada surroqatlığa qoyulan qadağanı yumşaltmaq yönündə liberal Azad Demokrat Partiyasının çağırışını rədd edib.
2015-ci ildə GQ jurnalı üçün məqaləsində o yazırdı: "Bir gey kişi və xristian olaraq, şəxsən mən "icarəyə götürülmüş uşaqlıq" ideyasını qəbul etməkdə çətinlik çəkirəm".
Bu ilin fevral ayında partiya konfransında Spahn "surroqatlığı biznes modelinə çevirən kommersiya və ya neytral modellərin" ortaya çıxmasının qarşısını almaq üçün Almaniyanın özündə surroqatlığa qoyulan qadağanı dəstəklədiyini bir daha təsdiqləyib.
Spahn ABŞ-da surroqat ana vasitəsilə ata olan yeganə partiya üzvü deyil: bu ilin əvvəlində eyni cinsli nikahda olan Hendrik Strack da eyni şeyi edib.
Yaşıllar lideri Feliks Banaszak şəxsən Spahn və “ərinə” ən xoş arzularını bildirib, lakin surroqat analıqla bağlı etik məsələlər "əhəmiyyətsiz" olmadığı üçün ortaya çıxıb mövqeyini izah etməli olduğunu bildirib.
Yaşılların digər nümayəndəsi Yanoş Damen isə məsələnin uşağın doğulması deyil, siyasi nüfuz və ikili standartlar olduğunu vurğulayıb: "Siyasi baxımdan qaydaları müdafiə edən hər kəs bu qaydaların niyə şəxsən ona şamil edilmədiyini aydın şəkildə izah etməlidir".
Liberal FDP-dən Henning Höhne öz ölkəsində qanunlar qəbul edən, sonra isə "pul və əlaqələrlə beynəlxalq səviyyədə o qanunları pozan" siyasətçilərə hörmət edə bilməyəcəyini bildirib.
SAMİRƏ
