ABŞ və İran arasındakı gərginlik yeni mərhələyə keçib. Yaxın Şərqdə raket hücumları yenidən başlayıb. İran Hörmüz boğazında sakitlik bərpa olunana qədər ABŞ hədəflərinə hücumların davam edəcəyini bildirib.
İran İnqilab Keşikçiləri Korpusunun Aerokosmik Qüvvələrinin komandanı briqada generalı Məcid Musəvi bildirib ki, İranın effektiv və hədəflənmiş hücumları cənub sahillərində və Hörmüz boğazında sülh bərpa olunana qədər davam edəcək.
Bu arada, Küveyt İranın elektrik enerjisi istehsalı və su təmizləyici qurğunu hədəf aldığını açıqlayıb. Hücum nəticəsində qurğuya ziyan dəyib, yanğın baş verib və elektrik enerjisi istehsal edən qurğular sıradan çıxıb. Açıqlamada yanğınsöndürmə briqadalarının yanğını nəzarət altına aldığı və texniki qrupların zədələnmiş bölmələri təmir etmək və yenidən işə salmaq üçün işlərini davam etdirdiyi bildirilir.
İran İnqilab Keşikçiləri Korpusu (SEPAH) 15-ci hücum dalğasının ABŞ-ın Qətərdəki Əl-Udeyd hava bazasına da yönəldiyini açıqlayıb. Hava hücumunun uzaqmənzilli radar sistemini və bir neçə strateji ABŞ yanacaqdoldurma təyyarəsini məhv etdiyi bildirilib: "Düşmən və bölgədə düşmən bazalarına ev sahibliyi edənlər bilməlidirlər ki, qırmızı xətti keçib insanlara və mülki infrastruktura hücum şiddətli cavabla qarşılaşacaq. Düşmən bu istiqamətdə davam edərsə, müharibə tarixinə düşəcək cavablarımız davam edəcək" – deyə SEPAH bildirib.
İran İnqilab Keşikçiləri Korpusu İordaniyadakı bazada yerləşən ABŞ qırıcı təyyarələrini və yanacaqdoldurma təyyarələrini də raketlər və kamikaze dronlarla hədəfə aldığını açıqlayıb. İki mərhələli hücumda İordaniyada yerləşən ABŞ döyüş təyyarələrinin və yanacaqdoldurma təyyarələrinin çoxsaylı ballistik raketlər və kamikaze dronlarla hədəfə alındığı və onlardan bəzilərinin məhv edildiyi bildirilib.
Bəhreyn Müdafiə Qüvvələrinin Baş Komandanlığı isə İranın ölkəni hədəf alan hücumlarının hava hücumundan müdafiə sistemləri tərəfindən zərərsizləşdirildiyini açıqlayıb.
Bu arada, peyk görüntüləri Birləşmiş Ərəb Əmirliklərinin (BƏƏ) paytaxtı Əbu-Dabidəki Zayed hərbi şəhərciyindəki üç binanın İranın hücumu nəticəsində tamamilə dağıldığını ortaya çıxarıb.
SEPAH Bəhreyn və Küveytdəki ABŞ hədəflərinə qarşı həyata keçirdikləri 11-ci və 12-ci hücum dalğaları ilə bağlı da açıqlamalar verib. Bu kontekstdə, 11-ci hücum dalğasında ABŞ hərbi kəşfiyyat təyyarələri və helikopterlərinin yerləşdiyi Bəhreyndə yerləşən Sakhir Hava Bazasının kamikaze pilotsuz uçuş aparatları (PUA) ilə hədəf alındığı bildirilib.
Eynilə, 12-ci hücum dalğasında ABŞ hücumlarına cavab olaraq Küveytdəki raketdən müdafiə və erkən xəbərdarlıq radarı, silah anbarları, yer-yer raket buraxılış meydançaları və bu sistemlərə məxsus çoxsaylı ehtiyat raketlərin hədəfə alındığı bildirilib. 13-cü hücum dalğasında isə Omanın Qanem bölgəsində yerləşən hava idarəetmə radarı və Salameh qayalarında yerləşən dəniz idarəetmə radarı hədəf alınıb.
Qeyd edək ki, İranın Energetika Nazirliyi ABŞ-ın elektrik infrastrukturuna hücumlarından sonra cənub şəhərlərindəki sakinləri elektrik enerjisi təchizatını qorumaq üçün elektrik enerjisi istehlakını azaltmağa çağırıb.
Tahir TAĞIYEV
