ABŞ prezidenti Donald Tramp "Fox News"a verdiyi müsahibədə İrana qarşı zərbələri gücləndirməklə hədələməsi ilə böyük ajiotaj yaradıb. "Gələn həftə onlar üçün vəziyyət çox pis olacaq. Biz onların bütün elektrik stansiyalarını yerlə-yeksan edəcəyik. Onların bütün körpülərini vuracağıq", - deyə Tramp bildirib.
Hələlik bu, sadəcə başqa bir təhdiddir, lakin onu həyata keçirmək hazırkı cavab zərbələri siyasətindən uzaqlaşmaq olardı. Massaçusets Texnologiya İnstitutunun təhlükəsizlik üzrə eksperti professor Barri R. Posen “Bild”ə açıqlamasında bütün dünyanın yeni maharibədən təsirlənəcəyini deyib: "İndiyə qədər bütün bu münaqişə əsasən danışıqlar və İranın artıq qazandığına inandığı şeylərə bağlı qalması ətrafında fırlanırdı. Əgər Tramp məyusluqdan İran infrastrukturunu məhv etmək təhdidini həyata keçirsə, bu, dəyişəcək".
Posen bildirib ki, bu halda İran Fars körfəzinin o biri tərəfindəki infrastrukturu vurmağa çalışacaq. Bu, Bəhreyn, Küveyt və Əmirlikləri hədəf alacaq. Bu baş verərsə, "neft qiymətləri sürətlə yüksələcək və hətta İsrail də yenidən müharibəyə cəlb oluna bilər". Bu o deməkdir ki, böyük eskalasiya təhlükəsi yaranır.
Lakin Trampın yeni eskalasiya üçün çox az vaxtı var. ABŞ-da müharibədən narazılıq həm müxalifət, həm də prezidentin partiya yoldaşları arasında artır. ABŞ-da yeni Konqres seçkiləri isə 3 noyabrda keçiriləcək.
Politoloq və Harvard Universitetinin professoru Metyu A. Baum isə bildirir ki, bu müharibənin qısamüddətli həlli yoxdur: “Çünki Trampın İrana son razılaşmadan başqa nə təklif edə biləcəyini bilmirəm. Nüvə proqramı və Boğazın nəzarəti ilə bağlı kompromislər ABŞ baxımından mümkün deyil".
Əgər mübarizə şiddətlənərsə və qiymətlər qalxarsa, bu məsələ mediada ön plana çıxacaq. Baum bildirib ki, bu da öz növbəsində Konqresə təzyiqi artıracaq. Trampın bu şəraitdə təhdidini həyata keçirmək qərarına gəlib-gəlməyəcəyi hələ də məlum deyil.
Tahir TAĞIYEV
