ABŞ-lı Demokrat konqresmen Ro Xanna İsrail işğalının humanitar aspektlərini birbaşa müşahidə etmək üçün getdiyi İordan çayının qərb sahilində israilli köçkünlər tərəfindən girov götürülüb.
Fələstin kəndlərindən birində “Reuters” agentliyinə danışan Xanna, İordan çayının qərb sahilində köçkünləri hücumlarına məruz Fələstinin Xirbet Zanuta kəndini gəzərkən, içində olduqları mikroavtobusun Amerika istehsalı olan M4 tüfəngləri ilə silahlanmış israilli köçkünlər tərəfindən mühasirəyə alındıqlarını deyib.
"İsrail köçkünləri tərəfindən dağıdılmış bir kənddə idik, onlar məktəbi və kəndin özünü yerlə-yeksan etmişdilər. Elə bu anda Amerika istehsalı olan M4 hücum tüfəngləri daşıyan kişilər peyda oldu və yolu bağlayaraq bizi saxladılar" - deyə Hanna bildirib.
Xanna, qrupun İsrail ordusunu bölgəyə çağırdığını, lakin əsgərlərin köçkünlərin tərəfini tutduğunu bildirib. Xannanın köməkçisi Kameron Kaski, ABŞ-ın Qüdsdəki səfirliyindən yardım istədiklərini, təxminən bir saat ərzində silahlı şəxslər tərəfindən girov saxlandıqlarını deyib. Daha sonra polis hadisəyə müdaxilə edib və qrup sərbəst buraxılıb.
İsrail ordusu bildirib ki, əsgərlər və polis Xirbet Zanuta ərazisində nəqliyyatın blokadası barədə məlumat aldıqdan sonra əraziyə gəlib. İsrail Müdafiə Qüvvələrinin məlumatına görə, müdaxilədən sonra İsrail mülki əhalisi dağılıb və nəqliyyatın hərəkəti bərpa edilib.
2028-ci il prezident seçkilərində potensial namizəd kimi təqdim edilən Xanna, səfərin Demokrat Partiyasının Yaxın Şərqə yanaşmasını yenidən nəzərdən keçirmək öhdəliyini gücləndirdiyini deyib.
"Əgər siz Fələstin hüquqlarını müdafiə etməyə, Qəzzada və İordan çayının qərb sahilində baş verənlərə qarşı çıxmağa hazır deyilsinizsə, bu, artıq mənəvi məsələyə çevrilir" – deyə konqresmen bildirib.
İsrailin fələstinlilərə qarşı siyasəti ABŞ daxilində getdikcə daha çox mübahisəyə çevrilir. Bəzi Demokratlar İsrailə hərbi yardımın məhdudlaşdırılmasını müdafiə edir, Respublikaçılar isə Təl-Əvivlə sıx münasibətlərini davam etdirilməsini dəstəkləyirlər.
Tahir TAĞIYEV
