Amerika Birləşmiş Ştatları bir ay davam edən maliyyə blokadasından sonra İraqa ABŞ dolları nağd pulunun birbaşa hava yolu ilə çatdırılmasını bərpa edib.
Bu barədə İsrailİnfo-nun xəbərində deyilir. Xəbərə görə, Bağdad hava limanında əskinasları daşıyan Amerika xüsusi reysləri boşaldılarkən, İraq Baş nazirinin hüquq məsləhətçisi hakim Munir Həddad beynəlxalq analitikləri şoka salan bir rəqəm açıqlayıb: 2003-cü ildən bəri İraqdan 2 trilyon dollardan çox pul oğurlanıb və qaçaqmalçılıq yolu ilə çıxarılıb.
ABŞ Maliyyə Nazirliyi araşdırmanı dayandırarkən, Bağdaddakı Korrupsiyaya Qarşı Mübarizə Agentliyi "Şəfəq" kod adı altında genişmiqyaslı əməliyyata başlayıb. Əməliyyat zamanı ən gözlənilməz yerlərdə nağd pul tapılıb: gil təndirlər, üzgüçülük hovuzları, kondisioner dəlikləri, döşəkçələr…
Bununla yanaşı, orta və yüksək vəzifəli məmurların həm ölkə daxilində, həm də xaricdə etibarnamə ilə və ya ailə üzvləri üzərinə qeydiyyatdan keçmiş 50 və ya daha çox əmlaka sahib olduqları aşkar edilib.
İstintaq, hadisə ilə əlaqəli şəxslərin qaçmasının qarşısını almaq üçün ən ciddi məxfilik şəraitində aparılır. İraq Kürdüstanına sığınmağa cəhd edənlər isə gözlənilməz sərtliklə qarşılaşıb: Ərbil Bağdadla tam koordinasiya yaradıb və artıq səkkiz yüksək vəzifəli qaçaq məhbusu federal hakimiyyət orqanlarına təhvil verib.
Bağdad açıq şəkildə bildirir ki, bu məhkəmələrin miqyası və ictimaiyyətə açıqlığı Səddam Hüseyn və onun BƏƏS Partiyası üzvlərinin tarixi məhkəmələri ilə müqayisə edilə biləcək.
SAMİRƏ
