Rusiya Ermənistandan balıq məhsullarının idxalını tamamilə dayandırıb. Baytarlıq və Fitosanitar Nəzarəti üzrə Federal Xidməti (“Rosselxoznadzor”) əvvəllər qismən güzəştlər verilmiş iki şirkətin sertifikatlaşdırılmasını aşkar edilmiş pozuntular aradan qaldırılana qədər dayandırıb.
“Rosselxoznadzor”Ermənistandan balıq idxalını tədricən məhdudlaşdırıb. Əvvəllər iki şirkətə, "M-F Export" və "Invest Plus"a laboratoriya nəzarətinin gücləndirilməsi şərti ilə müvəqqəti icazə verilmişdi. Lakin bu şirkətlərin heç biri artıq sertifikatlaşdırılmayıb. Beləliklə, Ermənistandan Rusiyaya bütün balıq məhsullarının daşınması rəsmi olaraq dayandırılıb.
Ermənistanın Avropa İttifaqı ilə yaxınlaşması Rusiya-Ermənistan ticarət münasibətlərinə birbaşa təsir göstərir. Hesab edilir ki, bütün bu məhdudlaşdırıcı tədbirlər Paşinyana təzyiq göstərmək üçün Moskva tərəfindən istifadə edilən vasitələrdir.
Rusiya Balıqçılıq Assosiasiyasının məlumatına görə, Ermənistandan balıq idxalı Rusiyanın ümumi idxalının 7%-dən azını təşkil edir və idxalçı ölkələr arasında 10-cu yerdədir. Ekspertlər qeyd edirlər ki, bu boşluğu Çin, İran və Türkiyə asanlıqla doldura bilər və bu pərakəndə satış qiymətlərinə heç bir əhəmiyyətli təsir göstərməyəcək.
Ermənistanda konservləşdirilmiş balıq istehsalçılarından bildirib ki, Rusiya bazarı şirkətin ixracının 30 faizini təşkil edir və bu məhdidiyyət onlar üçün ağır zərbə olacaq.
"Qaz ultimatumu" təhdidi ilə yanaşı, Moskva Ermənistandan idxal edilən bir çox məhsul qrupuna, o cümlədən spirtli içkilərə, meyvə-tərəvəzlərə, çiçəklərə, "Cermuk" mineral suyu və balıqlara embarqo tətbiq edib.
Erməni iqtisadçı Nairi Sarkisyan bildirib ki, Rusiyanın ticarət məhdudiyyətləri uzadılsa, Ermənistan iqtisadiyyatı çökə bilər. "Ermənistan iqtisadiyyatı sabit, acınacaqlı vəziyyətdən qeyri-davamlı acınacaqlı vəziyyətə keçib. Hansı məhdudiyyətlərin tətbiq oluna biləcəyini və ya nə qədər davam edəcəyini proqnozlaşdırmaq mümkün deyil. Əgər, Allah eləməsin, bu vəziyyət uzanarsa, iqtisadi çöküşün və ölkənin iqtisadi təməlinin dağılmasının şahidi olacağıq", - deyə o bildirib.
Sarkisyanın sözlərinə görə, əvvəlcə kənd təsərrüfatı, ardınca emal sənayesi, daha sonra isə bu sektorlarla əlaqəli təchizatçılar çökəcək. Bu, Ermənistan iqtisadiyyatında zəncirvari reaksiyaya səbəb ola bilər.
İqtisadçı hesab edir ki, belə bir ssenarinin nəticələri işsizliyin artması, əmək haqqının kütləvi şəkildə azaldılması və ya onların ödənişində gecikmələr olacaq ki, bu da onun fikrincə, ciddi sosial gərginliyə səbəb olacaq.
Tahir TAĞIYEV
