ABŞ-İran razılaşmasından sonra Hörmüz boğazı açılıb. ABŞ prezidenti Donald Tramp gəmilərin Hörmüz boğazından keçməyə başladığını bildirib.
"Çox sayda neft tankeri Hörmüz boğazından çıxmağa başlayıb. Gəmilər tamamilə təhlükəsiz, etibarlı və problemsiz olan cənub dəhlizi boyunca hərəkət edir. İstifadə edilə biləcək digər tranzit yolları da var" – deyə Tramp bildirib.
Bu arada, ABŞ-ın vitse-prezidenti Vens sazişlə ilə bağlı tənqidlərə cavab verib: "Düşünürəm ki, İsraildə bəzi insanlar bu razılaşmadan olduqca məmnundurlar. Bəzən İranın dövlət mediasında sərt mövqe tutanların sazişi təhrif etdiyini görürük. Bəzən İsrail mediasında müəyyən dairələr də bu açıqlamaları götürüb yayırlar. Lakin insanlar bu sazişin mətnini görəndə başa düşəcəklər ki, bu, bütün regionu daha təhlükəsiz edəcək".
Vens İranla birbaşa təmasda olduqlarını da bildirib: "Hazırda İran rejimi ilə birbaşa təmasdayıq. Artıq qarşılıqlı kanallar vasitəsilə mesaj göndərmirik. Həmkarlarımızla birbaşa görüşürük. Bu, nəyin real, nəyin təbliğat olduğunu, hansı məsələlərə ciddi yanaşdıqlarını və hansı məsələlərə ciddi yanaşmadıqlarını daha aydın başa düşməyimizə imkan verir.
Əslində, bütün kartlar bizim əlimizdədir. Əgər iranlılar öhdəlik götürməsələr, onlara heç nə verməyə məcbur deyilik. Biz İrana açıq əl uzadırıq. Əgər bizimlə münasibətlərini dəyişdirmək istəyirlərsə, biz də İranla münasibətlərimizi dəyişdirəcəyik. Təklif budur".
Vens Körfəz ölkələrinin razılaşmaya yanaşmasına da toxunub: "Körfəz koalisiyası Obamanın İran razılaşmasından nifrət edirdi, çünki onlar bunun İranın pis aktyor olmağa davam etməsinə imkan verdiyini düşünürdülər. Prezident Trampın sülh razılaşmasını isə sevirlər, çünki onu yeni Yaxın Şərq qurmaq üçün bir fürsət kimi görürlər".
Tahir TAĞIYEV
