İranın Hörmüz boğazında ABŞ-ın hərbi “Apaçi” helikopterini vurmasından sonra yenidən başlayan İran-ABŞ münaqişəsi şiddətlənməkdə davam edir.
İran mediası ABŞ müdafiə naziri Pit Heqsetin "Bu gecə İrana çox güclü zərbə endirəcəyik" açıqlamasından sonra ölkədə hava hücumundan müdafiə sistemlərinin işə salındığını açıqlayıb. Həmçinin yerli sakinlərin partlayışlara bənzər səslər eşitdikləri, lakin bu səslərin hava hücumundan müdafiə sistemlərinin işləməsi ilə əlaqəli olduğu bildirilib.
ABŞ Mərkəzi Komandanlığı isə prezident Trampın əmri ilə İrandakı birdən çox hədəfə özünümüdafiə hücumları başlatdıqlarını açıqlayıb. Komandanlıq bu hücumların İran təcavüzünə cavab olaraq həyata keçirildiyini bildirib.
Bu arada, İran dövlət televiziyası Kiş adasının sakinlərinin də uzaqdan səslər eşitdiklərini və bunun mənbəyinin hələ də məlum olmadığını bildirib. Partlayış səsləri Hörmüz boğazı yaxınlığındakı Sirik və Minab şəhərlərindən də eşidilib. Hörmüzqan rəhbərliyinə istinadən verilən xəbərlərdə hücumlar nəticəsində partlayışların Qeşm və Hənqam adalarında baş verdiyi bildirilib. Bundan əlavə, Bəndər Abbas şəhərində də partlayış səsləri eşidilib. İranın rəsmi xəbər agentliyi IRNA, Hörmüz boğazı yaxınlığındakı liman şəhəri olan Bəndər Abbasdakı partlayış səslərinin hava limanından gəldiyini bildirib.
İran mətbuatındakı son xəbərlərə görə, İranın cənub ərazilərində İran və ABŞ qüvvələri arasında toqquşmalar baş verib.
İran İnqilab Keşikçiləri Korpusu (SEPAH) ABŞ-ın İranın cənubuna hücumlarına cavab olaraq Küveyt və Bəhreyndə ABŞ-a məxsus "18 əsas hədəf"i vurduğunu açıqlayıb.
ABŞ hücumlarında Bəndər Abbas hava limanı, polis və təhlükəsizlik bölmələrinin hədəf alındığı bildirilən açıqlamada, İran Hərbi Hava Qüvvələri və donanmanın ABŞ bazalarına qarşı cavab zərbələri endirdiyi bildirilir.
Qeyd edilir ki, iki hücum dalğasında Küveytdəki Əli Əl-Salem və Əhməd Əl-Cabir hava bazalarına, eləcə də Bəhreyndə Şeyx İsa hava bazasında Amerika ordusuna məxsus "18 əsas hədəf" vurularaq məhv edilib.
İran mediası bir F-16 qırıcı təyyarəsinin ölkənin hava məkanını pozduğunu, İnqilab Keşikçilərinin müdaxiləsindən sonra təyyarənin bölgədən çəkildiyini bildirib. İnqilab Keşikçiləri isə Hörmüz boğazının bağlandığını elan edib: "Amerika terrorizminin davam edən hücumları və işğalçı ordunun cənub Hörmüzqan əyalətinin müəyyən ərazilərinə hücumlarının başlaması və bölgədəki təhlükəsizliksizlik səbəbindən Hörmüz boğazı bu andan etibarən neft tankerləri və ticarət gəmiləri də daxil olmaqla bütün növ gəmi hərəkəti üçün bağlıdır və hər hansı bir keçidə müdaxilə ediləcək".
Bu arada, "The New York Times" qəzeti Qətər nümayəndə heyətinin heç bir irəliləyiş əldə etmədən İranı tərk etdiyini iddia edib. Lakin CNN xəbəri təkzib edərək nümayəndə heyətinin hələ də Tehranda olduğunu bildirib.
Tahir TAĞIYEV
