Avropanın ən böyük nüvə obyekti olan Zaporojye Atom Elektrik Stansiyasını enerji ilə təmin edən istilik elektrik stansiyası intensiv bombardmanlara məruz qalıb.
Beynəlxalq Atom Enerjisi Agentliyi (MAQATE) rəsmi sosial media hesabında bu səhər Zaporojye Atom Elektrik Stansiyasının yaxınlığında yerləşən Zaporojye İstilik Elektrik Stansiyasına ağır hücumlar edildiyi barədə məlumat aldıqlarını açıqlayıb.
MAQATE-nin monitorinq qrupu istilik elektrik stansiyasından qatı tüstü qalxdığını və bölgədə şiddətli hərbi toqquşmaların yaşandığını bildirib. Bombardman səbəbindən stansiya işçiləri təhlükəsiz sığınacaqlara girməyə məcbur olublar.
Sözügedən istilik elektrik stansiyası Zaporojye Atom Elektrik Stansiyasına elektrik enerjisi təchizatında mühüm rol oynayır. MAQATE rəsmiləri bildiriblər ki, son zamanlar baş verən intensiv hücumlar nüvə elektrik stansiyasını xarici dünya ilə birləşdirən sonuncu elektrik xəttinin də kəsilə biləcəyi ilə bağlı ciddi narahatlıqlar yaradır. Elektrik xətti hazırda işlək vəziyyətdədir.
MAQATE-nin baş direktoru Rafael Mariano Qrossi də hücumlarla bağlı dərin narahatlığını bildirib. Qrossi Zaporojye Atom Elektrik Stansiyasında uzun müddət davam edən elektrik kəsintisinin nüvə təhlükəsi yarada biləcəyi barədə xəbərdarlıq edib və bütün tərəfləri bölgədəki hərbi hücumları dərhal dayandırmağa çağırıb.
2022-ci ilin mart ayından bəri Rusiya ordusunun nəzarəti altında olan Zaporojye Atom Elektrik Stansiyası, elektrik təchizatının tamamilə kəsiləcəyi təqdirdə soyutma sistemlərinin sıradan çıxması və nüvə partlayış riski təhlükəsi yaradır.
Tahir TAĞIYEV
