Birləşmiş Millətlər Təşkilatının Təhlükəsizlik Şurasında (BMT TŞ) müvəqqəti üzv kimi boş qalan yerlər üçün seçkilər keçirilib. "Qərbi Avropa və digərləri" qrupunda olan Almaniya, Avropadan Portuqaliya və Avstriya ilə yarışıb, lakin lazımi səsləri toplaya bilməyib.
193 üzvü olan BMT-də keçirilən gizli səsvermədə Portuqaliya 134 səslə, Avstriya isə 131 səslə qalib gəlib. Müvəqqəti üzvlük üçün əvvəlki bütün seçkilərdə qalib gələn Almaniya cəmi 104 səs toplayıb. Bununla da Almaniya tarixdə ilk dəfə olaraq BMT TŞ üzvlüyünə seçilə bilməyib.
Almaniya 1990-cı ildə birləşməsindən bəri hər səkkiz ildən bir müvəqqəti üzvlük üçün müraciət edib və hər dəfə də seçilib. İndiyə qədər altı dəfə BMT Təhlükəsizlik Şurasının müvəqqəti üzvü seçilən Almaniya sonuncu dəfə bu vəzifəni 2019-2020-ci illər ərzində tutub.
Almaniyanın xarici siyasəti bütün dünyada tənqid olunur. Berlinin İsrailin Qəzzada törətdiyi qırğınlara qarşı səssizliyi sərt reaksiyalara səbəb olub. ABŞ və İsrailin İrana hücumları və ABŞ-ın Venesueladakı hərəkətlərinə qarşı səssizliyi də bir çox BMT üzvünün Almaniyadan uzaqlaşmasına səbəb olub.
Tahir TAĞIYEV
