ABŞ və İsrailin İranda rejim dəyişikliyi planlarının necə pozulduğu ortaya çıxıb. Tramp İrana hücumlarının məqsədlərindən birinin əvvəldən İranda rejim dəyişikliyi olduğunu bildirmişdi. İsrail Ordusu Kəşfiyyat İdarəsinin (AMAN) keçmiş rəhbəri Tamir Hayman, İsrail Baş naziri Netanyahunun da hədəflərindən biri olan İranda rejim dəyişikliyi planlarının necə pozulduğunu açıqlayıb. Heyman Türkiyənin ABŞ və İsrailin İran rejimini devirmək planını pozduğunu və Prezident Ərdoğanın Trampı buna inandırdığını bildirib.
Heyman bildirib ki, ABŞ və İsrail 28 fevralda İrana qarşı başlatdığı və müvəqqəti atəşkəslə nəticələnən hücumlar zamanı Tehran rejimini devirmək üçün aralarında PKK terrorçularının da olduğu bəzi qruplar tərəfindən hücumların başladılması və İranın keçmiş prezidenti Mahmud Əhmədinejadın yenidən hakimiyyətə gətirilməsi də daxil olmaqla bir sıra gizli planlar həyata keçirməyə cəhd ediblər.
O, ABŞ və İsrailin İrandakı mövcud rejimi devirməyi və Əhmədinejadı hakimiyyətə gətirməyi planlaşdırdığını iddia edən “New York Times” qəzetinin 20 may tarixli xəbərinin doğru olduğunu bildirib: "Çox unikal bir sıra xüsusi əməliyyatlar planlaşdırılırdı və Əhmədinejad da həmin planın bir hissəsi idi. Kürd hərəkatı istisna olmaqla, əməliyyatların digər bir qismi ictimaiyyətə tam şəkildə açıqlanmadı. Çünki bütün əməliyyatlar zənciri kürd hərəkatı ilə başlamalı idi".
Heyman, ABŞ və İsrailin bəzi etnik silahlı qruplar vasitəsilə İrana qarşı həyata keçirməyə çalışdığı planın Ərdoğanın Trampı inandırmaq səylərindən sonra pozulduğunu deyib.
Heyman həmçinin "İsrailin Trampı İrana hücum etməyə inandırdığı" iddialarının da həqiqəti əks etdirmədiyini iddia edib.
Heyman Trampın bu addımı ABŞ-ın Venesuela prezidenti Maduroya qarşı müdaxiləsi ilə bağlı uğurundan həvəslənərək atdığını irəli sürüb: "Venesueladakı vəziyyət Trampı sosial mediada rejim əleyhinə etirazçılara "yardım yoldadır" deyə bir paylaşım etməsinə səbəb oldu. Bu, israillilər üçün böyük bir sürpriz oldu. Tramp "yardım yoldadır" deyəndə və İrana hücum etmək qərarı verəndə İsrail buna hazırlıqsız idi. Bu, yanvarın əvvəlində baş verirdi".
İsrailin o dövrdə heç bir hərbi hücum planının olmadığını iddia edən Heyman, Trampın İrana zərbə endirəcəyi açıqlaması ilə israilliləri təəccübləndirdiyini deyib: “Bu addım vəziyyəti dəyişdirdi. Trampın açıqlamasından sonra İsrailin planlaması və ABŞ-ın motivasiyası birləşdi. Bu proses 28 fevralda hərbi səfərbərliyə səbəb oldu"”.
Tahir TAĞIYEV
