Maastrixt şəhər hakimiyyəti muşketyor D`Artanyanın qalıqlarının tapıldığı Müqəddəslər Peter və Paul kilsəsində aparılan qazıntıların qanunsuz olduğuna qərar verib.
Buna səbəb arxeoloji işlərin bələdiyyənin icazəsi, hətta bildiriş olmadan aparılması olub. Hakimiyyət orqanlarının məlumatına görə, onlara bildiriş verilməzdən əvvəl, ehtimal olunan dəfn yerindən bir bazu sümüyü və iki diş çıxarılaraq Almaniyaya aparılıb və onların hazırda Münhen Universitetinin Məhkəmə Tibbi Ekspertizası İnstitutunda saxlanıldığına inanılır.
Qazıntılar barədə 5 martda məlumat yayıldıqdan sonra bələdiyyə dərhal işi dayandırıb və Hollandiyanın Mədəni İrs Müfəttişliyinə məlumat verib. Agentliyin təsdiqi ilə bələdiyyənin vurğuladığı kimi, 13 martda rəsmi "təcili arxeoloji əməliyyat" aparılıb. Bələdiyyə hesab edir ki, ilkin mərhələdə arxeoloji qaydaların pozulması tapıntının "elmi dəyərinin əhəmiyyətli dərəcədə itirilməsinə" səbəb olub və sonrakı tədqiqatları çətinləşdirib.
Buna baxmayaraq, holland mütəxəssisləri qalıqları, o cümlədən DNT testlərini təhlil etməyə davam edirlər, lakin ictimai marağın artması səbəbindən ilkin tapıntılar gizli saxlanılır. Qalmaqal fonunda 21 mayda "De Telegraaf" qəzeti arxeoloq Vim Deykmanın həbs olunması barədə məlumat verib. Polis onu 20 mayda qalıqların gizlədilməsi ehtimalına görə qısa müddətə həbs edib və şübhəli kimi saxlayıb. Daha əvvəl, 25 martda NOS televiziya kanalı Maastrixt kilsəsində, ehtimal ki, D`Artanyana məxsus bir skeletin aşkar edildiyini bildirib: o, fevral ayında keçmiş qurbangahın ərazisində bir sandıqda, yanında musket gülləsi və bir fransız sikkəsi olaraq tapılıb.
SAMİRƏ
